පිරිමි පාපන්දු තරගාවලිය කණ්ඩායම් 16 සිට 12 දක්වා ඇකිළීමට ජගත් ඔලිම්පික් කමිටුව (IOC) බදාදා තීරණය කිරීමෙන් පසුව තරාදිය ක්‍රීඩිකාවන්ගේ පැත්තට බරව තිබෙනවා. ඒ අතරම, ඔලිම්පික් බලධාරීන් කාන්තා පාපන්දු තරගාවලිය කණ්ඩායම් 16 දක්වා කණ්ඩායම් හතරකින් වැඩිකර තිබෙනවා. කාන්තා ජල පෝලෝ තරගාවලියට තවත් කණ්ඩායම් දෙකක් එක් කිරීම හා කාන්තා බොක්සිං තරගාවලියට තවත් බර පංතියක් එක් කිරීම මගින් එම ඉසව්වලට සහභාගි වන කණ්ඩායම් සංඛ්‍යාව පිළිවෙලින් 12 සහ 7 දක්වා ඉහළ ගොස් තිබෙනවා. මේ අනුව ක්‍රීඩාවන් 36ක් හරහා කාන්තාවන්ට තරග ස්ථාන 5,655ක් හිමිව තිබෙන අතර පිරිමින්ට තිබෙන්නේ ස්ථාන 5,543ක්.
මේරි කොම්
කාන්තාවන් බොහෝ දෙනෙකුට ක්‍රීඩාවට නැඹුරු වීම පිණිස මෙය ඉතා වැදගත් තීරණයක් වනු ඇති බව 2012 ලන්ඩන් ඔලිම්පික් උළෙලේ ලෝකඩ පදක්කම හිමිකර ගත් මේරි කොම් (Mary Kom) බොක්සිං ක්‍රීඩිකාව පවසනවා. “අපට නොලැබුනු අවස්ථාවක් වර්තමාන පරම්පරාවට ලැබෙනවා. ඔලිම්පික්ස්වල තරග කරන්න ලොකු කාලයක් බලා සිටින්න සිදු නොවී අද මම තරග බිමේ හිටියා නම් කොච්චර හොඳ ද කියලා මට දැන් හිතෙනවා” යනුවෙන් ඇය කියනවා.
වසර 2002 සහ 2010 අතර කාලය තුළ ලෝක ශූරතාවලියන් පහක් ජය ගත් කාන්තා බොක්සිං ක්‍රීඩාවේ පුරෝගාමියෙකු වන මේරි ට ඔලිම්පික් ක්‍රීඩා උළෙලක තරග කිරීම සඳහා වසර 2012 තෙක් බලා සිටීමට සිදුවුනා. ඒ වනතුරු, බොක්සිං ක්‍රීඩිකාවන්ට ලොව ලොකුම ක්‍රීඩා සාදයට ආරාධනා කෙරුනේ නැහැ. ඔවුන් ඊට ඇතුළත් කරගත් පසුව වූව ද, පිරිමින් සඳහා බර පංති 10ක් තිබියදී කාන්තාවන් වෙනුවෙන් අනුමත කරනු ලැබුවේ බර පංති තුනක් පමණයි.
එහෙත් 2012 ඔලිම්පික් වැඩසටහනට කාන්තා බොක්සිං එක් කිරීමෙන් ස්ත්‍රී පුරුෂ සමානත්වය සඳහා වන පළමු විශාල පියවර තැබුනා. එ අනුව, 1900 වසරේදී ප්‍රථම වතාවට තරග කිරීමෙන් පසුව කාන්තාවන්ට ඔලිම්පික් ක්‍රීඩා උළෙලක සෑම ඉසව්වකම පදක්කමක් සඳහා තරග කිරීමට අවස්ථාව උදාවුනා.
දොළොස් වසරකට පසුව, ඉතිහාසයේ තවත් විශේෂ අවස්ථාවක් සනිටුහන් කරමින් 2024 පැරිස් ඔලිම්පික් උළෙලේදී පළමු වතාවට ස්ත්‍රී පුරුෂ දෙපාර්ශවය ට ම එක සමාන ඉසව් සංඛ්‍යාවක් ලැබුනා. සමාන බව සඳහා වූ වසර 124ක සටනක අවසන්වීමක් පැරිසිය සලකුණු කළා නම්, ලොස් ඇන්ජලීස් නගරය තවත් පියවරක් ඉදිරියට තබමින් සියයට 50.5ක කාන්තා නියෝජනයක් ප්‍රදර්ශනය කිරීම විශේෂත්වයක්.
පැරිසියේ දී, ඉන්දියාව 110කින් යුත් කණ්ඩායමකින් කාන්තාවන් 45ක් තරග බිමට ඉදිරිපත් කළා. ඔවුන්ගේ කාන්තා හොකී සහ ක්‍රිකට් කණ්ඩායම් සුදුසුකම් ලැබුවහොත් මේ සංඛ්‍යාව ලොස් ඇන්ජලීස් හි දී වැඩිවීමට ඉඩ තිබෙනවා.
ස්ත්‍රී පුරුෂ සමානාත්මතාවේ ලොකුම අරගලය පැවති රට අමෙරිකාව යි. සමාන වැටුප් සහ අයිතීන් වෙනුවෙන් අමෙරිකානු කාන්තා පාපන්දු කණ්ඩායම එරට පාපන්දු සම්මේලනය අධිකරණයට ඇදගෙන ගියා. වසර හයක නීතිමය වාද විවාදවලින් පසුව 2022 වසරේදී ඔවුන් සන්ධිස්ථානයකට පැමිණෙමින් ක්‍රීඩිකාවන්ගේ ඉල්ලීම් ලබා දීමට එකඟ වුනා.
කාන්තා පාපන්දුව ඔලිම්පික් වැඩසටහනට හඳුන්වා දුන් ස්ථානය වූයේ ද අමෙරිකාව. ඒ 1996 වසරේ. එහිදී එම සත්කාරක කණ්ඩායම රන් පදක්කම දිනා ගත් අතර එය ඔවුන්ගේ වාර්තාගත ශූරතා පහෙන් පළමුවැන්න වූ අතර 2024 පැරිස් ඔලිම්පික් ජයග්‍රහණය ද ඊට ඇතුළත්. 2028 වසරේදී අමෙරිකාව විසින් මවනු ඇත්තේ මෙතෙක් පැවති විශාලතම කාන්තා ඔලිම්පික් තරගාවලියේ සිරස්තල.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com