ඊළඟ ජනාධිපතිවරණයේදී රනිල් වික්‍රමසිංහට සහය පළ නොකර සිටීමට පොහොට්ටුවට අයිතියක් නැතැයි තමන් පෞද්ගලිකව විශ්වාස කරන බව නාගරික සංවර්ධන හා නිවාස අමාත්‍යවරයා ප්‍රකාශ කර තිබේ.
ප්‍රසන්න රණතුංග ඇමැතිවරයා ගාල්ල දිස්ත්‍රික් සම්බන්ධීකරණ කමිටුවට සහභාගි වීමෙන් අනතුරුව මාධ්‍යවේදීන් වෙත අවධාරණය කළේ ඊළග ජනාධිපතිවරණයේදී පොහොට්ටුවට විකල්ප අපේක්ෂකයෙක් නැත්නම් රනිල් වික්‍රමසිංහට සහාය පළ කිරිම වඩාත් සුදුසු බවයි.
“ජනාධිපති රනිල් වික්‍රමසිංහ මහතාව ජනාධිපති කරන්න තීන්දුව ගත්තේ අපේ පක්ෂයේ නායකයින්. අපේ පක්ෂයේ නායකයින් දුන් උපදෙස් අනුවයි අපි පාර්ලිමේන්තුවේදී ජනාධිපතිවරයා විදියට රනිල් වික්‍රමසිංහ මහතාව පත් කරන්න අපේ සහයෝගය ලබා දුන්නේ. ඔහු මේ වනවිට ආර්ථික අභියෝගය ජයග්‍රහණය කරලා රටේ ප්‍රශ්න විසදමින් සිටිනවා. රනිල් වික්‍රමසිංහ මහතාව පත් කරන්න පොහොට්ටුව ගත් තීරණය ඒ වෙලාවේ ගත යුතුව තිබූ හොඳම තීරණය ලෙසයි මා සලකන්නේ. මේ ආර්ථික අර්බුදයෙන් මේ රට ගොඩගන්න වෙන කිසිවෙකුට හැකියාවක් තිබුණේ නෑ. ඒ වෙලාවේ ජනාධිපති ධුරය භාර ගන්න කියලා ඉල්ලීම් කළාම ඒ අය ඒක ප්‍රතික්ෂේප කළා. අනුර කුමාර දිසානායාක, සජිත් ප්‍රේමදාස කියන දෙන්නත් මේ වගකීම භාර ගන්න අකමැති වුණා. ඒ නිසා මම හිතනවා මේ මොහොතේ පක්ෂයක් විදියට අපි ගත යුතුව තිබෙන නිවැරැදිම තීන්දුව තමයි රනිල් වික්‍රමසිංහ මහතාට ඊළග ජනාධිපතිවරණයේදී සහාය පළ කිරීම.”
බැසිල් රාජපක්ෂ ලංකාවට පැමිණි පසුව පක්ෂ යන්ත්‍රණය ශක්තිමත් කර ජනාධිපතිවරණය සම්බන්ධව තීරණයක් ගනු ඇතැයි ඇමැතිවරයා සඳහන් කළේය.
මේ වසරේදී අනිවාර්යෙන්ම ජනාධිපතිවරණය පැවැත්වීමට ආණ්ඩුව සුදානම් වෙමින් සිටින බැවින් ඒ සම්බන්ධයෙන් ඇතැමුන් කරන ප්‍රකාශ පිළිබදව කළබල විය යුතු නැතැයි නාගරික සංවර්ධන හා නිවාස අමාත්‍ය ප්‍රසන්න රණතුංග තවදුරටත් පැවසීය.
(චතුරංග මේදිස්)
සබැඳි පුවත් :
රනිල් අපේක්ෂකයා කළ යුතුයි කියන්නේ පොහොට්ටුවේ සුළු පිරිසක් - නාමල්
