සමාජ නොසන්සුන්තාව සහ විරෝධතාවල යටිපෙළ
පූජ්‍ය ගලගොඩඅත්තේ ඥානසාර හිමියන් බන්ධනාගාරගත කිරීම සහ උන්වහන්සේගේ චීවරය ඉවත් කිරීමේ සිදුවීම මුල්කරගනිමින් මහා සංඝරත්නය මෙන්ම සමාජයේ ඇතැම් කොටස් අතර ප්‍රබල කම්පනයක් මතුව තිබේ.
මෙම තත්ත්වය හුදෙක් එක් භික්ෂූන් වහන්සේ නමකගේ සිදුවීමකට පමණක් සීමා නොවූ, කලක් තිස්සේ ගොඩනැඟුණු ආගමික හා සංස්කෘතික සංවේදීතාවන්හි ප්‍රකාශනයක් බව සර්වජන බලය නායක, පාර්ලිමේන්තු මන්ත්‍රී දිලිත් ජයවීර මහතා පෙන්වා දෙයි.
උන්වහන්සේගේ ඇතැම් ප්‍රකාශ හෝ හැසිරීම් විවේචනයට ලක්ව තිබුණද, පොදු සමාජය උන්වහන්සේ සාම්ප්‍රදායික ගණයේ අපරාධකරුවෙකු ලෙස නොසලකන බව මන්ත්‍රීවරයාගේ අදහසයි. පෞද්ගලික ලාභ ප්‍රයෝජනවලින් තොරව කටයුතු කළ හිමිනමක් ලෙස මහජන අවධානය දිනාගත් පසුබිමක, මෙම සංවේදී කාරණය සමස්ත බෞද්ධ සභ්‍යත්වයට එල්ල වූ බලපෑමක් ලෙස බහුතර පාර්ශ්ව දකින බවද ඔහු සඳහන් කරයි.
ජනාධිපති සමාව සහ නීතිමය පසුබිම
අධිකරණයට අපහාස කිරීම සම්බන්ධයෙන් වරදකරු වූ ඥානසාර හිමියන්ට මීට පෙර විධායකය විසින් ජනාධිපති සමාව ලබාදීමේ ක්‍රියාවලිය අධිකරණ සමාලෝචනයට ලක් වූ අයුරු මෙහිදී සාකච්ඡාවට ගැනේ. එකී ක්‍රියාවලියේදී නිරීක්ෂණය වූ පරිපාලනමය හා ක්‍රියාපටිපාටික දුර්වලතා නිවැරදි කරමින්, යළිත් එම සමාව ලබාදීමේ හැකියාව පවතින බවදිලිත් ජයවීර මහතාගේ අදහස වී තිබේ.
අධිකරණ තීන්දුවල හරය නිසි ලෙස තේරුම් ගනිමින්, පවතින පරිපාලනමය පරතරයන් පියවීම තුළින් ආණ්ඩුවට මෙම නෛතික ගැටලුව ප්‍රජාතන්ත්‍රවාදී රාමුවක් තුළ නිරාකරණය කළ හැකි බව ඔහු අවධාරණය කරයි.
පැලැස්තර විසඳුම් වෙනුවට තිරසර පියවරක්
බන්ධනාගාරගත වන භික්ෂූන් වහන්සේලාගේ ඇඳුම හෝ බාහිර ස්වරූපය සම්බන්ධයෙන් තාවකාලික උපක්‍රම සෙවීමෙන් පමණක් මෙම ප්‍රශ්නය අවසන් නොවන බවට පෙන්වා දෙන දිලිත් ජයවීර මහතා, ගැටලුවේ මූලික සංස්කෘතික හරය ස්පර්ශ කළ යුතු බව පවසයි. කලින් සිදු වූ පරිපාලන දෝෂ නිවැරදි කරමින් නිසි ලෙස ජනාධිපති සමාව ලබා දෙන්නේ නම්, පොලිස් බලය යෙදවීමකින් තොරව පැය කිහිපයක් තුළ මෙම අර්බුදය නිරාකරණය කරගත හැකි බව ඔහු පෙන්වා දෙයි.
රට බරපතළ ආර්ථික හා සමාජීය අභියෝග රැසකට මුහුණ දී සිටින මොහොතක, මෙවැනි අර්බුදයක් තවදුරටත් දුරදිග යාම සමස්ත ජාතික ස්ථාවරත්වයට මෙන්ම ජාත්‍යන්තර ප්‍රතිරූපයටද හිතකර නොවන බව ඔහුගේ අදහසයි. සමාජ කණ්ඩායම් හෝ විරෝධතා දැඩි පාලනයකට ලක්කිරීම වෙනුවට, ජනතා හැඟීම්වලට සංවේදී වෙමින් නීත්‍යනුකූල මෙන්ම සාධාරණ මැදිහත්වීමක් සිදුකිරීම වත්මන් පාලනාධිකාරියේ ප්‍රමුඛ වගකීමක් බව ඔහු වැඩිදුරටත් කියා සිටියි.
පාර්ලිමේන්තු මන්ත්‍රී දිලිත් ජයවීර සහභාගී වූ මාධ්‍ය හමුවේ ප්‍රකාශය