එක්නැළිගොඩ නඩුවේ සාක්ෂියට හිටපු බුද්ධි ප්‍රධානී සුරේෂ් සලේ අධිකරණයට

විශේෂ ආරක්ෂාව මැද ත්‍රිපුද්ගල විනිසුරු මඩුල්ල හමුවට

වසර දහතුනකට අධික කාලයක් පුරා මෙරට දේශපාලන හා මානව හිමිකම් ක්ෂේත්‍රයේ දැඩි අවධානයට ලක්ව ඇති මාධ්‍යවේදී ප්‍රගීත් එක්නැළිගොඩ පැහැරගෙන ගොස් අතුරුදන් කිරීමේ නඩුව, අද කොළඹ විජේරාම මාවතේ පිහිටි ස්ථිර ත්‍රිපුද්ගල මහාධිකරණයේදී විභාගයට ගැනිණි.

නයනා සෙනවිරත්න (සභාපති), නලින් හේවාවසම් සහ ලක්මාලි හේවාවසම් යන ත්‍රිපුද්ගල විනිසුරු මඩුල්ල ඉදිරියේ මෙම නඩු විභාගය පැවැත්විණි.

අපරාධ පරීක්ෂණ දෙපාර්තමේන්තුවේ විශේෂ ආරක්ෂක රැකවල් යටතේ හිටපු රාජ්‍ය බුද්ධි ප්‍රධානී සුරේෂ් සලේ අධිකරණය හමුවට කැඳවා තිබූ අතර, ඔහු මෙම නඩුවේ 90 වන සාක්ෂිකරු ලෙස සාක්ෂි ලබා දීමට කැමැත්ත පළ කළේය.

හමුදා නීතිය සහ බුද්ධි ලේඛන ගැන විමසීම්

නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් වසන්ත පෙරේරා විසින් සාක්ෂි මෙහෙයවීම සිදු කරන ලදී.

හමුදා බුද්ධි අංශයේ නිල ලේඛන හැසිරවීම, යුද හමුදා නීතිමය ක්‍රියාපටිපාටීන් මෙන්ම සුරේෂ් සලේ මීට පෙර විමර්ශන නිලධාරීන්ට ලබාදී තිබූ ප්‍රකාශ පදනම් කරගනිමින් මෙහිදී දීර්ඝ ලෙස ප්‍රශ්න කිරීම් සිදුවිය.

මීට අමතරව, නඩුවේ සිව්වන සාක්ෂිකරු වන සුමතිපාල සුරේෂ් කුමාර හෙවත් 'මුරලි' යන අයගේ සාක්ෂිය නැවත කැඳවීමද අද දින අධිකරණය හමුවේ සිදු කෙරිණි.

නඩුවේ පසුබිම සහ චෝදනා පත්‍රය

2010 ජනවාරි 25 වන දින හෝ ඊට ආසන්න දිනකදී ගිරිතලේ, හබරණ සහ කොට්ටාව යන ප්‍රදේශවලදී මාධ්‍යවේදී ප්‍රගීත් එක්නැළිගොඩ රහසිගතව සිරකර තැබීමේ අරමුණින් පැහැරගෙන යාම ඇතුළු චෝදනා කිහිපයක් යටතේ නීතිපතිවරයා විසින් මෙම නඩුව ගොනු කර ඇත.

ගිරිතලේ යුද හමුදා කඳවුරේ හිටපු අණදෙන නිලධාරී ලුතිනන් කර්නල් ෂම්මි කුමාරරත්න ඇතුළු යුද හමුදා බුද්ධි අංශ සාමාජිකයින් නව දෙනෙකුට එරෙහිව දණ්ඩ නීති සංග්‍රහය යටතේ අධිචෝදනා ගොනු කර තිබේ.

නඩුවේ වැඩිදුර විභාගය ලබන ඔක්තෝබර් 22 වන දිනට නියමිතය.