ප්‍රවීණ චරිතාංග රංගන ශිල්පියකු වන රහල් බුලත්සිංහල ඊයේ (22) අභාවප්‍රාප්ත විය.
අසනීප තත්වයෙන් සිටි හෙතෙම අභාවප්‍රාප්ත වී ඇත්තේ පෞද්ගලික රෝහලක ප්‍රතිකාර ලබමින් සිටියදී ය. මියයන විට හැත්තෑ තුන් වැනි වියේ පසුවූ බව පැවසේ.
රහල් බුලත්සිංහල, ටෙලිනාට්‍ය මෙන් ම වේදිකාවේ ද ආදරය සහ ජනප්‍රියත්වය දිනාගත් ප්‍රවීණ රංගන ශිල්පිනියක වන සුසිලා කෝට්ටගේ ගේ ආදරණීය ස්වාමිපුරුෂයා ය. හෙතෙම ක්ෂේත්‍රයේ වඩාත් ජනප්‍රියත්වයට පත්ව සිටියේ 'ලොකු හාමුදුරුවෝ' යන නාමයෙනි; ඒ, ඔහු ටෙලි තිරයේ වඩාත් දක්නට ලැබුණේ බෞද්ධ භික්ෂු චරිතවලින් වන බැවිනි.
බන්ධනාගාර සේවයෙන් කලා ක්ෂේත්‍රයට
රහල් බුලත්සිංහල, සාම්ප්‍රදායික රංගන ගමන අභිභ වූ වෙනස් ම පසුබිමකින් කලාවට පිවිසි කලාකරුවෙකි. ඔහු සිය වෘත්තීය ජීවිතය ආරම්භ කර ඇත්තේ බන්ධනාගාර නිලධාරියෙකු ලෙසිනි. විසිදෙවසරක් පමණ බන්ධනාගාර දෙපාර්තමේන්තුවේ සේවය සේවය කළ හෙතෙම පසුකාලීනව කලා ක්ෂේත්‍රයට පිවිස ඇත.
රහල්, වඩාත් ජනප්‍රියත්වයට සහ ප්‍රේක්ෂක ගෞරවයට පාත්‍ර වූයේ 2021 සහ 2022 වසරවල විකාශය වූ 'නාඩගම්කාරයෝ' ටෙලිනාට්‍යයේ 'ලොකු හාමුදුරුවන්' ලෙස කළ රංගනයෙනි. මෙම චරිතය වෙනුවෙන් හෙතෙම එදිනෙදා ජිවිතයේ දී ලබාගන්නා ආහාර පාන පවා වෙනස් කර ගනිමින් ඉතා ගැඹුරු කැපවීමක් කර ඇත. මීට පෙර රහල් අපට හමුවන්නේ 'කෝපි කඩේ' පොඩි මහත්තයා ලෙස ය. එමෙන් ම 'කොඩි ගහ යට' ටෙලිනාට්‍යයේ ඉදිරිපත්කළ රංගනය ද ඉතා දැඩි ලෙස ප්‍රේක්ෂක මතකයේ රැඳුණි.
සැබැවින් ම ගිහි දිවියට සමු දෙන්නට සූදානම්ව…
හෙතෙමසිය සිනමාගමනය අරඹන්නේ 1995 වසරේ තිරගත වූ 'රෝදයා' සිනමා නිර්මාණයෙනි. අනතුරුව: පෙම් මල් මාලා (1997), ලෙෆ්ට් රයිට් සර් (2004), ක්වේ සෙරා (2014), සාම කුමරු කතාව (2019) සහ තේජා යනාදි සිනමා නිර්මාණ සඳහා සිය රංගන දායකත්වය ලබා දී ඇත. මෙම වසරේ (2026) නිර්මාණය වූ කෙටි සිනමා නිර්මාණයකට ද භික්ෂුවකගේ චරිතයට පණ පෙවිමට ද හෙතෙම සමත් වී ඇත; ඒ, 'ද එම්ප්ටි රෝබ්' නම් වූ කෙටි සිනමා නිර්මාණය යි.
රංගන ජීවිතය තුළ බෞද්ධ භික්ෂුව ගේ චරිතය සඳහා ප්‍රසිදධියක් උසුලා සිටි හෙතෙම එක් අවධියක දී ගිහි ගෙය කලකිරී සැබැවින් ම පැවිදි දිවියට ඇතුළත් වීමට සූදානම්ව සිට ඇති බව ද එකල දැනගන්නට ලැබිණි.
රංගන ශිල්පියකු වීමට පෙර ඔහු ගේ ජීවන වෘත්තිය වූ බන්ධනාගාර නිලධාරී කාල සිමාවේ අත්දැකීම් ද විවිධ නිර්මාණ තුලින් පිළිබිඹු කිරිමට හෙතෙම සමත් විය. ඒ අතර: නෙත් එෆ්.එම් රේඩියෝවේ 'මා බාල කාලේ', සියත රූපවාහිනියේ 'ආදරණීය ජීවිතය' සහ 'අසංග ලයිව්' යනාදි වැඩසටහන් ප්‍රමුඛස්ථානයක් උසුලයි.
රහල් බුලත්සිංහල ගේ දේහය අද (23) පෙරවරුවේ සිට කොළඹ පිහිටි පෞද්ගලික මල් ශාලාවක තැන්පත් කිරීමට නියමිත අතර අවසන් කටයුතු ලබන ඉරිදා (25) පස්වරුවේ බොරැල්ල පොදු සුසාන භූමියේ දී සිදු කිරීමට නියමිත ය.
