2025 අගෝස්තු 25 වැනි දින නිකුත් කරන ලද ගැසට් නිවේදනයක් මගින් ආනයනික ලොකු ලූනු සඳහා කිලෝවලට රු. 10 සිට 50 දක්වාත් අර්තාපල් කිලෝවක් සඳහා රු. 60 සිට 80 දක්වාත් විශේෂ වෙළෙද භාණ්ඩ බද්ද වැඩි කර ඇති බව විපක්ෂ නායක සජිත් ප්‍රේමදාස හෙළි කරයි.
ඔහු මෙම කර්ණ හෙළි කළේ අද පාර්ලිමේන්තුවේ දී ස්ථාවර නියෝග 27 (2) යටතේ ආනයනික අර්තාපල් සහ ලොකු ලූනු සදහා රජය පනවා ඇති බද්ද සම්බන්ධයෙන් ප්‍රශ්න කරමිනි.
එම අවස්ථාවේ දී වැඩි දුරටත් අදහස් දැක්වූ විපක්ෂ නායකවරයා...
වාර්ෂිකව අර්තාපල් ලොකු ලූනු ගොවීන්ට ලැබෙන සහනය කුමක් ද...?
''මෙම බදු වැඩි කිරීම මගින් ලක්ෂ 220ක් පාරිභෝගික ජනතාවට අතිරේක බර පැටවීමක් සිදුව තිබෙනවා. මෙමඟින් අර්තාපල් සහ ලොකු ලූනු ගොවියා ආරක්ෂා වුණා ද කියා බොහෝ දෙනා ප්‍රශ්න කරනවා. ආර්ථික අර්බුධයෙන් පසු දරිද්‍රතාව මිලියන 7ක් දක්වා ඉහළ ගිය තත්ත්වයක් තුළ රජයේ මේ පියවර සමාජයේ වැඩි වශයෙන් විවේචනයට ලක් වෙලා. දැනට ලංකාවේ ලොකු ලූනු සහ අර්තාපල් වගා කරන ගොවීන් සංඛ්‍යාවත්, ඔවුන් සාර්ථක ලෙස අස්වනු ලබා ගන්නා කාලයත් එම කාලය ඇතුළත්ව 2024 වසරේ දේශීය නිෂ්පාදනය කළ ලොකු ලූනු සහ අර්තාපල් ප්‍රමාණයත් එම නිෂ්පාදනය දේශීය ලොකු ලූනු සහ අර්තාපල් නිෂ්පාදනය කොපමණ ප්‍රමාණයක් ද කියා දැන ගැනීමට අවශ්‍ය යි.
එසේම SCL හෙවත් විශේෂ වෙළෙද භාණ්ඩ බද්ද හරහා වාර්ෂිකව අර්තාපල් ලොකු ලූනු ගොවීන්ට ලැබෙන සහනය ඉදිරිපත් කරන ලෙසත් මේ සහන තුළින් සමස්ත අර්තාපල් සහ ලොකු ලූණු ගොවියන්ට ප්‍රමාණවත් ආරක්ෂාවක් හිමි වන්නේද කියා දැන ගැනීමට අවශ්‍ය යි. 2007 වසරේ සිට වාර්ෂිකව මෙරටට ආනයනය කරන ලොකු ලූනු සහ අර්තාපල් ප්‍රමාණය, ඒ සදහා අය කළ වාර්ෂික බදු ප්‍රතිශතය සහ ආදායම ඉදිරිපත් කරන්න.
මේ බදු අයකිරිමත් සීනි බදු වංචාව හා සමාන ක්‍රියාවක්
2025 අගෝස්තු මාසයේ බදු වැඩි කිරිමට පෙර රට තුළ ගබඩා කර තිබූ ආනයනික ලොකු ලූනු සහ අර්තාපල් ප්‍රමාණයත් වෙළදුන්ට අයතා ලාභයක් ලැබීමට අවස්ථාවක්. එම නිසා මෙය පසුගිය රජය සමයේ සිදු කළ සීනි බදු වංචාව හා සමාන ක්‍රියාවක්.
ලොකු ලූනු සහ අර්තාපල් සඳහා බදු පැනවීමට පෙර ආහාර සුරක්ෂිතතා කමිටුව ජාතික බදු ප්‍රතිපත්ති කමිටුව මගින් මෙම බදු වැඩි කිරීමේ අනුමත කිරීමේ ක්‍රියාවලියේ දී අනුගමනය කළ නිර්නායක ඉදිරිපත් කරන්න. සීමිත තෝරාගත් ප්‍රමාණයකට බදු පැනවීමෙන් සෑම විටම අතරමැදි ගැනුම්කරුවන් කිහිප දෙනකු පමණක් වාසි ලබන නිසා ගොවීන්ට සහ පාරිභෝගිකයාට වාසි ලැබෙන විකල්ප වැඩපිළිවෙළක් තිබිය යුතු බැවින් එය ඉදිරිපත් කරන්න.''
