සමගි ජන බලවේගයේ (SJB) නියෝජ්‍ය ලේකම්වරයා මෙන්ම කුරුණෑගල ප්‍රධාන සංවිධායකවරයා ලෙස කටයුතු කළ හිටපු රාජ්‍ය අමාත්‍ය අශෝක් අබේසිංහ, එම පක්ෂය තුළ තමන් දැරූ සියලු නිලතලවලින් ඉල්ලා අස්වීමට තීරණය කර ඇත.
ඔක්තෝබර් 12 වැනිදා සිට ක්‍රියාත්මක වන පරිදි තම ඉල්ලා අස්වීම බාරදෙමින්, ඔහු සජබ නායක සහ විපක්ෂ නායක සජිත් ප්‍රේමදාස වෙත ලිඛිතව මේ බව දැනුම් දී තිබේ.
අත්හළ තනතුරු මොනවාද?
අශෝක් අබේසිංහ විසින් යොමුකර ඇති ලිපියට අනුව ඔහු ඉවත් වී ඇති ප්‍රධාන තනතුරු පෙළගැස්ම මෙසේය:
* පක්ෂයේ නියෝජ්‍ය ලේකම් ධුරය
* කුරුණෑගල දිස්ත්‍රික් ප්‍රධාන සංවිධායක ධුරය
* සමගි සේවක සංගමයේ සභාපති ධුරය
* විපක්ෂ නායකවරයාගේ වෘත්තීය සමිති සම්බන්ධීකරණ ලේකම් ධුරය
* පක්ෂ කෘත්‍යාධිකාරී මණ්ඩල සාමාජිකත්වය
තීරණයට හේතුව: පාක්ෂිකයන්ගේ අපේක්ෂාව සහ පල්වෙන දේශපාලනය
තම ඉල්ලා අස්වීමට තුඩුදුන් දේශපාලන පසුබිම පැහැදිලි කරමින් හිටපු මන්ත්‍රීවරයා මාධ්‍ය හමුවේ පෙන්වා දෙන්නේ, එක්සත් ජාතික පක්ෂය සහ සමගි ජන බලවේගය එකට එක්ව ගමනක් යා යුතු බවට පාක්ෂිකයන් තුළ දැඩි ඉල්ලීමක් පවතින බවයි.
එම පාර්ශ්ව දෙක එක්සත් කිරීම වෙනුවෙන් තමන් දීර්ඝ කාලයක සිට පෙනී සිටි බවත්, ඒ පිළිබඳව මෑතකදී හිටපු ජනාධිපති රනිල් වික්‍රමසිංහ ගෙන් පවා විමසූ බවත් ඔහු සඳහන් කරයි. එජාප නායකත්වය ඊට අකමැත්තක් පළ නොකළ ද, සජබය සහ එජාපය අතර එවන් සන්ධානයක් ගොඩනැගීමේ ක්‍රියාවලිය කිසිදු ප්‍රගතියක් නොමැතිව එක තැන පල්වීම නිසා පාක්ෂිකයන් නගන ප්‍රශ්න හමුවේ තමන් දැඩි අපහසුතාවට පත්ව ඇති බව අබේසිංහ වැඩිදුරටත් අවධාරණය කළේය.
එක්සත් ජාතික පක්ෂයේ සිට සජබය බිහිවීම දක්වා වූ ගමන්මගේදී සජිත් ප්‍රේමදාස සමඟ සමීපව කටයුතු කිරීමට ලැබීම පිළිබඳව සිය කෘතඥතාව පළ කර ඇති ඔහු, පක්ෂයේ අනාගත කටයුතු සඳහා සුබපැතුම් ද එක්කර තිබේ.
අශෝක අබේසිංහ විසින් සජබ නායක, සජිත් ප්‍රේමදාස වෙත යොමුකර ඇති ලිපියේ පිටපතක මතු පළවේ.
