තමන් උපන් රට වන ශ්‍රී ලංකාවේ පුරවැසිභාවය අහිමිවී, බ්‍රිතාන්‍ය පුරවැසිභාවයෙන් ද ඉවත් වීම හේතුවෙන් මේ වන විට තමන් කිසිදු රටකට හිමිකම් නොකියන ‘රටක් නොමැති පුරවැසියකු’ බවට පත්ව ඇතැයි හිටපු සංචාරක රාජ්‍ය ඇමැතිනි ඩයනා ගමගේ මහත්මිය කොළඹ මහාධිකරණය හමුවේ ප්‍රකාශ කර සිටියාය.
ව්‍යාජ තොරතුරු ඇතුළත් කර හැඳුනුම්පතක් ලබාගැනීමේ චෝදනාවට අදාළ නඩුව කොළඹ මහාධිකරණ විනිසුරු නදී අපර්ණා සුවඳුරුගොඩ මහත්මිය ඉදිරියේ විභාගයට ගත් අවස්ථාවේදී විත්ති කූඩුවේ සිට සාක්ෂි දෙමින් ඇය මේ බව සඳහන් කළාය.
සාක්ෂි සටහන් යළි සැකසීමට නියෝගයක්
මෙම නඩුවේ මීට පෙර කැඳවූ අවස්ථාවක සටහන් කරගත් සාක්ෂි සටහන් අසම්පූර්ණ බව පෙන්වා දෙමින් විත්තිය වෙනුවෙන් පෙනී සිටි ජ්‍යෙෂ්ඨ නීතිඥ මොහාන් සෙනවිරත්න මහතා අධිකරණයට කරුණු වාර්තා කළේය.
ඉදිරිපත් වූ කරුණු සලකා බැලූ මහාධිකරණ විනිසුරුවරිය, අදාළ සාක්ෂි සටහන්වල සම්පූර්ණ පිටපතක් යළි සකස් කර නඩු ගොනුවට ඇතුළත් කිරීමටත්, එහි පිටපත් පැමිණිල්ල සහ විත්තිය වෙත ලබාදීමටත් මහාධිකරණ ලේඛකාධිකාරිවරියට නියෝග කළාය. සාක්ෂි සටහන්වල වැඩිදුර නිරවුල් කිරීම් සඳහා නඩුව යළි කැඳවීමට ද දින නියම විය.
නීතිමය අර්බුදය සහ 'රටක් නොමැති' තත්ත්වය
2024 වසරේදී ශ්‍රේෂ්ඨාධිකරණය ලබාදුන් තීන්දුවෙන් පසුව තමන් නීතිඥ උපදෙස් මත ශ්‍රී ලංකාවේ පුරවැසිභාවය ඉල්ලා යළි අයදුම්පතක් යොමු කළ බව ඩයනා ගමගේ මහත්මිය අධිකරණයට පැහැදිලි කළාය.
එහෙත් කොළඹ ප්‍රධාන මහේස්ත්‍රාත් අධිකරණයේ පවතින නඩු කටයුතු හේතුවෙන් එම අයදුම්පත තාවකාලිකව බහා තබන ලෙස ආගමන විගමන පාලකවරයාට උපදෙස් ලැබී ඇති බවත්, ඒ හේතුවෙන් තමන් කිසිදු නීත්‍යානුකූල අනන්‍යතාවක් නොමැති අසරණ තත්ත්වයකට පත්ව ඇති බවත් ඇය සංවේදී වෙමින් අධිකරණය හමුවේ කියා සිටියාය.
දේශපාලන පසුබිම සහ පෞද්ගලික ගැටුම්
තමන්ගේ ඥාතීන් සියලු දෙනාම පාහේ එංගලන්තයේ ජීවත් වන බවත්, ලංකාව තුළ තමන් ගොඩනගාගෙන තිබූ සියලු සමාජ සබඳතා බිඳවැටීමට හිටපු සැමියා වන සේනක ද සිල්වා මහතාගේ ක්‍රියාකලාපය බලපෑ බවත් ඇය චෝදනා කළාය.
20 වැනි ආණ්ඩුක්‍රම ව්‍යවස්ථා සංශෝධනයට පක්ෂව ඡන්දය ප්‍රකාශ කිරීමට සිදුවූයේ ද හිටපු සැමියාගේ බලපෑම මත බව පැවසූ ඇය, එම දේශපාලන තීරණයත් සමඟ සමගි ජන බලවේගය තුළින් තමන්ට එල්ල වූ විරෝධය හමුවේ ආණ්ඩුවට එක්වීම හැර වෙනත් විකල්පයක් නොවූ බවද සඳහන් කළාය. පසුව ඇතිවූ පෞද්ගලික පවුල් ආරවුල් සහ වෙන්වීම හේතුවෙන් තමන් ඉලක්ක කර ගනිමින් විවිධ අධිකරණවල නඩු පැවරීම් සිදුවූ බව විත්තිකාරිය වැඩිදුරටත් කියා සිටියාය.
චෝදනා ප්‍රතික්ෂේප කිරීම
තමන්ට එරෙහිව ගොනු කර ඇති කූට ලේඛන සැකසීමේ චෝදනා මුළුමනින්ම ප්‍රතික්ෂේප කරන බව ඩයනා ගමගේ මහත්මිය අවධාරණය කළාය. ජීවිත කාලය තුළ කිහිප වතාවක් නම් සංශෝධනය කළ ද කිසිදු අවස්ථාවක උප්පැන්න සහතිකය සංශෝධනය කිරීමේ අවශ්‍යතාවක් මතු නොවූ බව ඇය සඳහන් කළාය.
ශ්‍රී ලංකාවේ පුරවැසියකු නොවන බව දැන දැනම, නීත්‍යානුකූල නොවන අයුරින් ‘ඩයනා ගමගේ’ යන නමින් හැඳුනුම්පතක් සහ විදේශ ගමන් බලපත්‍රයක් ලබාගැනීම සඳහා අංක 4658 දරන කූට උප්පැන්න ලේඛනයක් සකස් කිරීම සහ ඊට අනුබල දීම සම්බන්ධයෙන් නීතිපතිවරයා විසින් දණ්ඩ නීති සංග්‍රහය යටතේ අධිචෝදනා ගොනු කර තිබේ.
මෙම නඩුව කැඳවූ අවස්ථාවේදී පැමිණිල්ල වෙනුවෙන් රජයේ අධිනීතිඥ තරුෂි මූනසිංහ මෙනෙවිය සහ රජයේ අධිනීතිඥ අකිලා දල්පදාදු මහත්මිය පෙනී සිටි අතර, විත්තිය වෙනුවෙන් ජ්‍යෙෂ්ඨ නීතිඥ මොහාන් සෙනවිරත්න මහතා පෙනී සිටියේය.