පිය උරුමයේ දේශපාලනය සහ අනන්‍යතාව
පිය උරුමය පමණක් පෙරදැරි කරගනිමින් දේශපාලන නායකත්වය ලබාදීමට කිසිවෙකුටත් නොහැකි බව පාර්ලිමේන්තු මන්ත්‍රී දිලිත් ජයවීර අවධාරණය කරයි.
TV සුප්‍රීම් ඔස්සේ විකාශනය වන ''ඇත්ත කියන්න'' ට රූපවාහිනී සංවාදයකට එක්වෙමින් ඔහු පෙන්වා දුන්නේ, ආර්. ප්‍රේමදාස මහතාගේ පුත්‍රයා වීමෙන් තොර වූ දේශපාලනයක් සජිත් ප්‍රේමදාස මහතාට නොමැති තාක් ඔහුට ඉදිරි ගමනක් නොමැති බවයි.
එමෙන්ම මහින්ද රාජපක්ෂ මහතාගේ සාටකය පැළඳි පමණින් නාමල් රාජපක්ෂ මහතාටද පැවැත්මක් නොමැති බව ඔහු සඳහන් කළේය. දේශපාලන නායකයෙකු වීමට නම් තමන්ටම ආවේණික අනන්‍යතාවක් සහ මතවාදයක් ගොඩනගා ගැනීම අත්‍යවශ්‍ය කාරණයක් බව ඔහුගේ නිරීක්ෂණයයි.
ජනාධිපතිවරයාගේ ගමන්මග සහ වත්මන් අභියෝග
වත්මන් ජනාධිපති අනුර කුමාර දිසානායක මහතාගේ දේශපාලන සම්ප්‍රාප්තිය සම්බන්ධයෙන් අදහස් දක්වමින් මන්ත්‍රීවරයා කියා සිටියේ, මෑත කාලීන දේශපාලනය තුළ ඔහු පැමිණි ගමන්මග ප්‍රශංසනීය මෙන්ම විශ්මයජනක එකක් බවයි.
එසේ වුවද, ජනාධිපතිවරයා තමන්ගේ මුල් දේශපාලන දර්ශනයෙන් බැහැරව අතරමං නොවී සිටියේ නම් මීට වඩා යමක් රට වෙනුවෙන් ඉටු කිරීමට ඉඩකඩ තිබූ බව ඔහු පෙන්වා දුන්නේය. තවමත් ඔහුට නිශ්චිත අනන්‍යතාවක් සහිත ස්වාධීන ආර්ථික හා සමාජීය ගමනක් යාමට නොහැකි වී ඇති බවට දේශපාලන විචාරකයින් මත පළකරන බවද ඔහු සිහිපත් කළේය.
ආර්ථික අර්බුදය හමුවේ සාමූහික එකඟතාවක අවශ්‍යතාව
රටේ පවතින සැබෑ අභියෝගය වන්නේ ජනතාව මත බදු බර පැටවීම නොව, ඩොලර් හිඟය සහ නිෂ්පාදන ධාරිතාව පහත වැටීම බව දිලිත් ජයවීර පෙන්වා දෙයි.
2028 සහ 2029 වන විට රට හමුවේ නිර්මාණය විය හැකි මූල්‍ය අර්බුදයන්ට සාර්ථකව මුහුණ දීමට නම්, පටු දේශපාලන හෝ පලිගැනීමේ න්‍යායපත්‍රවලින් මිදී සියලු පාර්ශ්ව එකඟ වන ජාතික වැඩපිළිවෙළක් ක්‍රියාත්මක විය යුතු බව ඔහු වැඩිදුරටත් කියා සිටියේය.
සෑම සඳුදා දිනකම රාත්‍රි 9.30ට TV සුප්‍රීම් ඔස්සේ විකාශනය වන 'ඇත්ත කියන්න' දේශපාලන වැඩසටහන නිමේෂ් විජේසූරිය සහ මාධවී ජයවික්‍රම විසින් මෙහෙයවන අතර නිෂ්පාදනය චින්තක බණ්ඩාර තෙන්නකෝන් විසිනි.
සම්පූර්ණ සංවාදය නරඹන්න :