අනෝජන් සිවරාසාට පනවා තිබූ මරණ දඬුවම අවලංගු කිරීමට සෞදි අරාබියේ ශ්‍රේෂ්ඨාධිකරණය පියවර ගෙන ඇතැයි විදේශ කටයුතු සහ විදේශ රැකියා නියෝජ්‍ය අමාත්‍ය අරුන් හේමචන්ද්‍ර සිය නිල ෆේස්බුක් පිටුවේ සටහනක් තබමින් තහවුරු කර තිබේ.
ඒ අනුව, මෙම දඬුවම අවලංගු කිරීමේ තීරණය, ඔක්‌‌තෝබර් 13 වෙනිදා ගෙන ඇති බවත්, එය ශ්‍රී ලංකා රජය විසින් අඛණ්ඩව සිදුකළ රාජ්‍යතාන්ත්‍රික හා නීතිමය මැදිහත්වීම්වල ප්‍රතිඵලයක් අනුව සිදුව ඇති බවත් නියෝජ්‍ය අමාත්‍යවරයා සඳහන් කරයි.
සෞදි අරාබි රජය ලබාදුන් සහයෝගය වෙනුවෙන් සිය කෘතඥතාවය ද නියෝජ්‍ය අමාත්‍යවරයා විසින් පළ කර ඇති අතර සෞදියේ ශ්‍රී ලංකා තානාපතිවරයා, විදේශ කටයුතු අමාත්‍යාංශයේ ලේකම්වරයා සහ නිලධාරීන්, ශ්‍රී ලංකා විදේශ සේවා නියුක්ති කාර්යාංශයේ සභාපතිවරයා ඇතුළු නිලධාරීන් මෙන්ම ශ්‍රී ලංකා සහ සෞදි අරාබි නීති කණ්ඩායම් ද මේ වෙනුවෙන් දැක්වූ කැපවීම නියෝජ්‍ය අමාත්‍යවරයා අගය කර ඇත.
