දශක ගණනාවක් පැරණි බන්ධනාගාර නීති පද්ධතිය සහ මෙරට සාම්ප්‍රදායික ආගමික වටිනාකම් අතර මතුව ඇති සංවේදී ගැටුමට පරිපාලනමය විසඳුමක් සෙවීමේ මූලික පියවර මේ වන විට ගෙන තිබේ.
ත්‍රෛනිකායික මහා සංඝරත්නය සහ ජනාධිපතිවරයා අතර පැවති සාකච්ඡාවල ප්‍රතිඵලයක් ලෙස පත්කළ විශේෂ කමිටුවේ අතුරු වාර්තාව ජනාධිපති ලේකම් ආචාර්ය නන්දික සනත් කුමානායක මහතා වෙත අද (14) නිල වශයෙන් භාර දෙනු ලැබිණි.
නිත්‍ය නියෝගවලට එන වෙනස කුමක්ද?
වත්මන් බන්ධනාගාර ආඥාපනත යටතේ ක්‍රියාත්මක නිත්‍ය නියෝග 356 සංශෝධනය කර 356 (අ) ලෙස නව වගන්තියක් එක් කිරීමටත්, දෙපාර්තමේන්තු නියෝග 550 සංශෝධනයටත් කමිටුව නිර්දේශ කර ඇත.
අධිකරණ සහ ජාතික ඒකාබද්ධතා අමාත්‍ය නීතිඥ හර්ෂණ නානායක්කාර මහතා පෙන්වා දෙන්නේ මෙම නිර්දේශ මඟින් ප්‍රධාන කාරණා දෙකක් ආවරණය වන බවයි:
* දින 10ක සහන කාලය: යම් භික්ෂුවක් බන්ධනාගාරගත කිරීමේදී, එතෙක් පැළඳ සිටි ඇඳුම ඉවත් කර සිරකරු ඇඳුම ලබාදීමට පෙර ඒ පිළිබඳ බෞද්ධ කටයුතු දෙපාර්තමේන්තුවට දැනුම්දී පියවර ගැනීම සඳහා බන්ධනාගාර කොමසාරිස්වරයාට දින 10ක කාලයක් හිමිවේ.
* පිටතට වැඩම කරවීමේදී චීවරය: නඩු කටයුතු හෝ වෙනත් අවශ්‍යතා සඳහා බන්ධනාගාරයෙන් පිටතට වැඩම කරවීමේදී චීවරය දැරීමට පූර්ණ අවසරය හිමිවන අතර, අදාළ නිකායෙන් හෝ පාර්ශවයෙන් ඊට පටහැනි නිල දැනුම්දීමක් කරන තුරු එම අයිතිය නොවෙනස්ව පවතී.
මෙම ක්‍රමවේදය වෙනත් ආගමික පූජකවරුන් සම්බන්ධයෙන් ද ඒ ඒ ආගමික පසුබිමට ගැළපෙන සේ සංශෝධනය කර ක්‍රියාවට නැංවීමට නියමිත බව අමාත්‍යවරයා සඳහන් කළේය.
විශේෂ කමිටු වාර්තාව ජනාධිපති ලේකම්වරයාට භාර දෙයි
අධිකරණය සහ මහමඟ උණුසුම
පරිපාලනමය මට්ටමින් මෙම නිර්දේශ ඉදිරිපත්වන පසුබිමක, පූජ්‍ය ගලගොඩඅත්තේ ඥානසාර හිමියන්ගේ චීවරය ඉවත් කිරීමේ තීරණයට එරෙහිව ගොනුකර ඇති පෙත්සම් විභාගය සඳහා අභියාචනාධිකරණය හමුවේ අමල් රණරාජා, මහෙන් ගොපල්ලව සහ ප්‍රියන්ත ප්‍රනාන්දු යන විනිසුරුවරුන්ගෙන් සමන්විත ත්‍රිපුද්ගල විනිසුරු මඩුල්ලක් නම් කර තිබේ.
එමෙන්ම මහනුවරින් ඇරඹි ‘සිවුරට යුක්තිය – ජාතික අධිෂ්ඨාන පූජාව සහ නිදහසේ පාද යාත්‍රාව අද නිට්ටඹුවේ සිට කඩවත පැමිණි අතර, හෙට දිනයේ කොළඹට පැමිණීමට නියමිතය. ආගමික අනන්‍යතාව සහ බන්ධනාගාර නීතිය අතර සමබරතාව රැකගැනීමේ මෙම ක්‍රියාවලිය දෙස සමාජයේ විවිධ පාර්ශ්ව දැඩි විමසිල්ලෙන් පසුවේ.