කේටරින් සේවයේ ‘නොගෙවූ’ දේශපාලන සාද
රාජ්‍ය සම්පත් අවභාවිතය පිළිබඳ සොයා බැලූ ජනාධිපති පරීක්ෂණ කොමිෂන් සභාව (PCoI) සහ බරපතළ වංචා විමර්ශන කොමිසම (PRECIFAC) අනාවරණය කළ කරුණු අතරින් ප්‍රධාන තැනක් ගන්නේ ශ්‍රීලංකන් කේටරින් සමාගමයි. වාර්තාවලට අනුව, ආයතනය තුළ සිදුවූ අක්‍රමිකතා 26ක් සම්බන්ධයෙන් තොරතුරු තහවුරු වී තිබේ.
පසුගිය මැතිවරණ සමයන්හිදී ඉහළ පෙළේ දේශපාලන උත්සව සඳහා සුඛෝපභෝගී ආහාර පාන සැපයුවද, ඒ වෙනුවෙන් නිසි බිල්පත් හෝ ගෙවීම් ලේඛන සකස් කර නොතිබූ බව විමර්ශන පෙන්වා දෙයි. මහජන මුදලින් නඩත්තු වන ආයතනයක සම්පත් පක්ෂග්‍රාහී දේශපාලන වුවමනාවන් වෙනුවෙන් යොදවා ගත්තේ කාගේ අනුමැතියෙන්ද යන්න මෙතෙක් අනාවරණය වී නොමැත.
සැකසහිත ගුවන්යානා බදු ගැනීම් සහ කොමිස් ගැටලුව
වෙළෙඳපොළ වටිනාකමට වඩා වැඩි මිලකට ගුවන්යානා බදු ගැනීම (Aircraft leasing) හරහා මහා පරිමාණ කොමිස් මුදල් හුවමාරු වූ බවට පාර්ලිමේන්තු කාරක සභා හමුවේ කරුණු හෙළි විය. මීට අමතරව, මගීන් ආයතනයේ නිල වෙබ් අඩවියෙන් සෘජුවම ලබාගත් ගුවන් ප්‍රවේශපත්‍ර සඳහා පවා ප්‍රාදේශීය විකුණුම් නියෝජිතයන්ට (RSAs) ඩොලර් මිලියන ගණනින් කොමිස් මුදල් ගෙවීම බරපතළ මූල්‍ය විනය විරෝධී ක්‍රියාවක් ලෙස නිරීක්ෂකයෝ පෙන්වා දෙති.
හිටපු සභාපති නිශාන්ත වික්‍රමසිංහ ඇතුළු එවකට පරිපාලනයේ සිටි නිලධාරීන්ට එරෙහි නීතිමය ක්‍රියාමාර්ග දිගින් දිගටම ප්‍රමාද වීම මෙහිදී කැපී පෙනෙන තත්ත්වයකි.
ඊමේල් හැක් කර ඩොලර් විදේශ ගිණුමකට
මෑතකදී හෙළිදරව් වූ සයිබර් වංචාව ආයතනයේ අභ්‍යන්තර මූල්‍ය පාලනය පිළිබඳ තවත් ප්‍රශ්නාර්ථයක් මතු කරයි. බාහිර සේවා සපයන්නකුගේ විද්‍යුත් සන්නිවේදන පද්ධතියක් හැක් කරමින්, ගුවන් සමාගම මඟින් මුදල් විදේශීය වංචනික ගිණුමකට බැර කරවාගෙන තිබේ.
අපරාධ පරීක්ෂණ දෙපාර්තමේන්තුව (CID) සහ එක්සත් අරාබි එමීර් රාජ්‍යයේ බලධාරීන් මේ පිළිබඳ පරීක්ෂණ පැවැත්වුවද, අහිමි වූ මුදල, අභ්‍යන්තර නිලධාරීන්ගේ සත්‍යාපන ක්‍රියාවලියේ අඩුපාඩු සහ මුදල් නැවත අයකර ගැනීමට ගත් පියවර පිළිබඳ නිල තොරතුරු තවමත් මහජනතාවට විවෘතව අනාවරණය වී නොමැත.
බිලියන 24.6ක සංචාරක බදු හිඟය
ශ්‍රීලංකන් ගුවන් සේවය මගීන්ගෙන් අයකරගත් ගුවන් තොටුපළ බදු මුදල් (Embarkation Levy) වලින් රුපියල් බිලියන 24.6ක් සිවිල් ගුවන් සේවා අධිකාරියට (CAASL) තවමත් ගෙවා නොමැත.
මගියාගෙන් රජය වෙනුවෙන් අයකරගත් මුදලක් ව්‍යවස්ථාපිත ආයතනයකට නොගෙවා රඳවා තබා ගැනීම මෙරට සමස්ත ගුවන් සේවා ක්ෂේත්‍රයේම මූල්‍ය ස්ථාවරත්වයට දැඩි බලපෑමක් එල්ල කර ඇත.
ප්‍රතිව්‍යුහගතකරණයෙන් ඔබ්බට ගිය වගවීමක්
ඩොලර් මිලියන 175ක ජාත්‍යන්තර බැඳුම්කර ප්‍රතිව්‍යුහගත කිරීම මඟින් ණය බරට තාවකාලික සහනයක් ලැබුණද, පාලන ව්‍යුහයේ වෙනසක් නොමැතිව ආයතනය යථා තත්ත්වයට පත්කළ නොහැකි බව ආර්ථික විශ්ලේෂකයන්ගේ මතයයි.
සභාපති සරත් ගණේගොඩගේ ඉල්ලා අස්වීමෙන් පසු ඇතිවූ අවිනිශ්චිතතාව හමුවේ, පොදු ව්‍යාපාර පිළිබඳ කාරක සභාව (COPE) විසින් අල්ලස් හෝ දූෂණ විමර්ශන කොමිසමට යොමුකළ ලිපිගොනු හුදු ලිපි හුවමාරුවකට පමණක් සීමා නොවිය යුතු බවට සමාජය අවධාරණය කරයි.