පසුගිය දින කිහිපය තුළ රැස්වූ පාර්ලිමේන්තුව මහ පාරේ ජනතා අරගලයට කිසිදු සාධනීය ප්‍රතිචාරයක් දක්වන්නට සමත් වී නොමැත.
පාර්ලිමේන්තුව නියෝජනය කරන සියළුම පක්ෂ ක්‍රියා කරන්නේ ඉදිරි මැතිවරණ ජයග්‍රහණ පිළිබඳ ඉලක්කයන් මුලට දමාගෙන බව තවදුරටත් රහසක් නොවේ.
ජනතාවගේ ස්වේච්ජාමය නැගී සිටීම තම මැතිවරණ ඉලක්ක සඳහා හසුරුවා ගන්නේ කෙසේදැයි උත්සුක වන පක්ෂ දේශපාලනයකින් දැන් ඇති පලක් නැත.
මැතිවරණ මගින් හැඩ ගස්වන ලද දේශපාලන කාල-සටහනද දැන් වෙනසකට ලක් වී ඇත. 2024 සහ 2029 (පරිකල්පිත) මැතිවරණවලදී බලයට පත්වන්නේ ගෝඨාද, සජිත්ද, නාමල්ද, අනුරද, විමල්ද, චම්පිකද යන ප්‍රශ්නය වටා කැරකෙමින් තිබූ පටු සංවාදයද අවසන්ය. මෙතැන් පටන් ඓතිහාසික සිද්ධිදාමය නිශ්චය කෙරෙන්නේ ජන අරගලය විසිනි.
කෙසේ උවත්, නෛතික තලයේ කටයුතු සඳහාත්, රාජ්‍ය ප්‍රතිපත්ති සහ රාජ්‍ය මූල්‍ය හැසිරවීම සඳහාත්, ජාත්‍යන්තර සබඳතා සඳහාත් බලය සහ හැකියාව ඇත්තේ දියවන්නාවේ පාර්ලිමේන්තුවටය. එම පාර්ලිමේන්තුවේ සුජාතභාවය අභියෝගයට ලක්ව තිබුණද, ජනතාව පෙළන ප්‍රශ්නවලට ප්‍රායෝගික විසඳුම් සොයා ගැනීමේදී එහි කාර්යභාරය නොතකා හැරිය නොහැකිය.
මේ තත්ත්වය තුළ ජන අරගලය තුළින්ම දියවන්නාවේ පාර්ලිමේන්තුවට ශක්තිමත් ලෙස බලපෑම් කළ හැකි අන්දමේ ජනතා පාර්ලිමේන්තුවක් වහ වහාම කැඳවීමේ ඇරයුම ඉදිරියට ගත යුතුව තිබේ. රාජපක්ෂලා ගෙදර යැවීමේ සහ සොරා කෑ මහජන දේපළ ජනසතු කිරීමේ සීමිත සටන් පාඨවලින් ඔබ්බට ගොස් පුළුල් හා ගැඹුරු ප්‍රජාතාන්ත්‍රික පරිවර්තනයක් කරා අරගලය දිශානත කිරීම සඳහා එවන් ජනතා පාර්ලිමේන්තුවක් වුවමනා වී තිබේ.
සෑම ප්‍රදේශයකම උද්ඝෝෂණවල නිරත ජනතාවගෙන් අප ඉල්ලා සිටිය යුත්තේ ජනතා පාර්ලිමේන්තුවක් සඳහා වන යෝජනා සම්මතයක් ඇති කර ගන්නා ලෙසයි.
දියවන්නාවේ පාර්ලිමේන්තුවෙන් පිටත ජනතා සභාවක සාකච්ජාවට ලක් කළ යුතු යෝජනා සහ වැඩ පිළිවෙලවල් ගැන පුළුල් ජනතා සංවාදයක් සහ එකඟතා ඇති කර ගන්නා ලෙසයි.
ජනතා පාර්ලිමේන්තුවක් ගොඩ නැගීමේ සමාජ මාධ්‍ය වේදිකාවක් (social media platform) නිර්මාණය කිරීමෙන් මේ කාර්යය ආරම්භ කළ හැකිය.
ඉදිරි පාර්ලිමේන්තු මැතිවරණයේදී එම ජනතා පාර්ලිමේන්තුවේ නියෝජිතයින් දියවන්නාවට යැවීමේ ව්‍යාපාරයක් ආරම්භ කරමු.
The Leader TV අද වීඩියෝ
