එම චෝදනාව සත්‍යය දැයි විමසීමට පෙරත් "එම කාන්තාව පවසන්නේ සත්‍යයකි" යන පූර්ව නිගමනය මත සමාජය හැසිරෙන ස්වභාවයක් ඇත. එයට හේතුව වන්නේ පිරිමින් අතින් කාන්තාවන් විවිධ හිංසනයන්ට ලක්වන බවට සමාජයේ ඇති පොදු පිළිගැනීමයි. එහි සත්‍යයක් නැතුවා නොවේ. නමුත් "සිංහල කාන්තාව" අරබයා ජවිපෙ පෙන්වන්නේ එයට පරස්පර හැසිරීමකි.
දොස්තර සාෆි විසින් සිංහල කාන්තාවන් පිරිසකගේ ප්‍රජනක අවයව හානි කිරීම පිළිබඳව ඔවුන් චෝදනා කළ විට ජවිපෙ වහාම ගත්තේ පිරිමියාගේ පැත්ත මිස එම කාන්තාවන්ගේ පැත්ත නොවේ. ජවිපෙ පමණක් නොව, කොළඹ සමාජයේ ඊනියා කාන්තා විමුක්තිකාමීන්, කාන්තා හිංසනයට එරෙහි සුචරිත සූචකයන් සහ සමාජ සාධාරණත්ව සටන්කරුවන් මෙන්ම මානව හිමිකම් ක්‍රියාකරුවන් පවා කීවේ මේ කාන්තාවන් කියන්නේ මුසාවක් කියාය. ඔවුන් කීවේ මෙය වඳ කොත්තු වඳ බ්‍රා වැනි තවත් නාඩගමක් පමණක් බවයි. (ඒවා නාඩගම් යැයි මම නොකියමි.) ඔවුන් කීවේ මෙය ජාතිකාගමිකයන් අතර අසමගිය ඇති කිරීමට අටවන දේශපාලන ව්‍යාපෘතියක් පමණක් බවයි.
මෙය ඉතා වැදගත් නිරීක්ෂණයකි. සාෆි විසින් එවැනි අපරාධයක් කළාද නැද්ද කියා නිසි වෛද්‍ය පර්යේෂණ ඇසුරෙන් සාධාරණ නඩු විභාගයක් පැවැත්වුණා දැයි මම නොදනිමි. සාෆි වරදකරුද නැද්ද කියා මා දන්නේ නැත. නමුත් වරදකරුවෙකු ලෙස උසාවියකින් විනිශ්චය කිරීමට පෙර ඕනෑම වැසියෙකු අහිංසකයෙකු ලෙස සැලකීම ව්‍යවස්ථාපිත ක්‍රමයයි. නමුත් ගැටලුව තිබෙන්නේ වෙනත් අවස්ථාවන් හිදී ඒ ආකාරයෙන් පිරිමියාගේ නිර්දෝෂිභාවය වෙනුවෙන් පෙනී නොසිටින පාර්ශව මේ අවස්ථාවේදී පමණක් පිරිමියා වෙනුවෙන් දැඩිව පෙනී සිටීමයි.
"සිංහල දොස්තරයෙකු අතින් දෙමළ කාන්තාවන් පිරිසක් ඒ ආකාරයෙන් ලිංගික හිංසනයට ලක් කළේය" කියා චෝදනාවක් කළොත් ජවිපෙ හැසිරෙනු ඇත්තේ කෙසේද? වසර 2,500 ක ශිෂ්ටාචාරයේ පටන් සිංහල බෞද්ධ සියල්ල වහාම පට්ට ගසනු ඇත. නිර්මාල් දේවසිරි පෝය දිනක මෙන් ට්‍රිගර් වනු ඇත. විදුලි වේගයෙන් කාටූන් ඇඳෙනු ඇත. දෙමළ කාන්තාව වෙනුවෙන් කව් ගී නිසැඳැස් හෑලි ලියවෙනු ඇත. දෙමළ ජන සංහාරයක් ගැන කියමින් ජිනීවාහී පාණ්ඩුකම්බල ශෛලාසන උණු වෙනු ඇත. නමුත් සිංහල කාන්තාවට එම උණු වීම නැත. සිංහල කාන්තාව වෙනුවෙන් #MeToo කියමින් ට්විටර් වීරයන් උද්ඝෝෂණය කරන්නේ නැත. සිස්ටෙමික් ජාතිවාදී ලිංගවාදය යනු මෙයයි.
අනෙක් පැත්තෙන් ජවිපෙ මේ කියන්නේ කාන්තාවක් විසින් පිරිමියෙකුට එරෙහිව චෝදනා කළ පළියට ඒවා සත්‍යය නොවන බවයි. එවැනි බොරු චෝදනා කරන කාන්තාවන්ද සිටී. බටහිර සමාජය තුළ නිර්මාණය වෙමින් තිබෙන ප්‍රති-කාන්තා-විමුක්ති නැගිටීම ජවිපෙ විසින් සාධාරණය කර තිබේ. එපමණක් නොව එවැනි චෝදනාවලට ලක් වූ පිරිමියා වීරයෙකු ලෙස උත්කර්ෂයට නංවා සිංහල කාන්තාව විසින් ඔහුගෙන් සමාව ගත යුතු බවට ඇතැම් පිරිමින් යෝජනා කරයි. මෙහි සියුම් පුරුෂාධිපත්‍යයක් ගැබ්ව තිබේ.
ධර්මය අපට මග වේවා!
(එරන්ද ගිනිගේ)
සමාජ ව්‍යවසායක සහ කර්තෘ
හිටපු ජනාධිපති උපදේශක
eranda.ginige@gmail.com
2023 ජූනි 5
