ජනමාධ්‍ය ඉදිරියේ සජිත්ගේ නායකත්වය ප්‍රශ්න කරමින් එය හාස්‍යයට ලක් කළ ෆොන්සේකා මාධ්‍යකාරයන් ඉදිරියේ සජිත්ව කිච කළේය. යුද්ධය ගැන කිසිවක් නොදන්නා මෝඩයෙකු ගානට සජිත්ව දමා කතා කිරීම නම් අනුමත කළ නොහැකිය. නමුත් එයින් පෙන්නුවේ ඔහු සජිත්ට කිසිසේත්ම යටත් නොවන බවයි. සජිත් කෙසේ හෝ ෆොන්සේකාව හලාගන්න හදන්නේත් ඒ නිසාය. සජබ ආණ්ඩුවක සජිත්ට එන ලොකුම වාතස්කන්ධය ෆොන්සේකා බව ඔහු දනී. ෆොන්සේකා සජිත්ට තබා කිසිවෙකුට යටත් නොවෙන දකුණේ මිනිහෙකි.
නමුත් ෆොන්සේකාගේ හයිකාරකම්වලට සජිත් දැන් ඒ තරම් බය වන්නේ නැත. මන්ද ෆොන්සේකාට සජබ කිසිවෙකුත් කැමති නැති බව සජිත් දනී. ෆොන්සේකා යනු සජබයේ අනෙක් සියලුම දෙනාට ලෝක ඇණයකි. සජිත් ගෝල්ෆේස් අරගලයට ගිය අවස්ථාවේ ගුටි පූජාවකට ලක් කළේ ෆොන්සේකාගේ මිනිසුන් විසින් යැයි සමහරු කීවත් ෆොන්සේකා ඒ තරම් පහත් තැනකට වැටේ යැයි මා සිතන්නේ නැත. ෆොන්සේකා සජිත්ට ගහනවා නම් ගහන්නේ එළිපිටමය. මාධ්‍ය සාකච්ඡාවේ ගැහුවේ එහෙමය.
ෆොන්සේකා සජබ සභාපතිය. නමුත් සජිත් පක්ෂයේ තීන්දු තීරණ ගන්නේ අඩුම තරමින් සභාපති සමග හෝ සාකච්ඡා කර නොවේ. ෆොන්සේකාම කියන හැටියට සජිත්ට අවශ්‍ය තීරණ ගැනීමට හැකිවන පරිදි නීතියක් සජිත් විසින් සම්මත කරගෙන තිබේ. සජිත් යනු ආර්. ප්‍රේමදාසගේ පුතාය. එයින් පෙනෙන්නේ ලෝකෙට පේන්න විශාල තනතුරු සංඛ්‍යාවක් පිරිනමා තිබුණත් ඔවුන්ට කිසිදු වැදගත් තීරක බලයක් එම පක්ෂයේ නොමැති බවයි. එය ඇත්තකි.
පොහොට්ටුවේ සිටින කාලයේ මහ හයියෙන් බිරූ ගොඩහේවා සජබයේ ඉන්නේ හක්ක පූට්ටු වුණා සේයා. සජිත් “හප්” කී ගමන් පක්ෂයේ සියලු දෙනා බිම බලාගෙන නිහඬ වෙයි. සජබ සියලු දෙනාම සජිත්ට මහත් සේ බයය. ටිකක් හෝ බය නැත්තේ ෆොන්සේකා පමණී.
සජබය ක්‍රියාත්මක වන්නේ සජිත් සහ ආර්යාවගේ කැමැත්ත අනුවය. එසේ නොමැතිව ලංකාවේ දේශපාලන පක්ෂයක් පාලනය කළ නොහැකිය. රාජපක්ෂලා මෙන් සියලු දෙනාගේම අදහස් විමසා ප්‍රජාතාන්ත්‍රිකව තීරණ ගැනීමට ගියහොත් වෙන්නේ පක්ෂයත් වසා දමා ගෙදර යන්නටය. පොහොට්ටුවේ නිදහස මදිය කියන ඇතැමුන්ට මා යෝජනා කරන්නේ කරුණාකර සජිත්ට එකතු වී බලන ලෙසය. නැත්නම් රනිල්ට එකතු වී බලන ලෙසය. නැත්නම් අනුරට එකතු වී බලන ලෙසය. “නිදහස” යනු කුමක්ද කියා එවිට ඔවුන්ට කණ හරහා මොළයට යනු ඇත.
නමුත් ෆොන්සේකා ඔය බෙරිහන් දුන්නාට ඔහුටත් යන්නට තැනක් නොමැත. වෙනත් කිසිවෙකු ඔහුට කැමති නැත. ඔහුට යම්තාක් හෝ වැඩ කළ හැක්කේ ගෝඨාභය රාජපක්ෂ සමග පමණී. ඒ ඔවුන්ගේ දීර්ඝකාලීන හමුදා සම්බන්ධය නිසාය. දයා රත්නායකලා එදා ෆොන්සේකාව හිරේ දාන්න වැඩ කළත් ගෝඨාභය එයට විරුද්ධ වූ බව ෆොන්සේකා දනී. ගෝඨාභය නියම ජෙන්ටල්මන් කෙනෙකි. තරුණ වියේදී උරෙන් උර ගැටී තම දිවි පරදුවට තබා මව්බිම වෙනුවෙන් දෙමළ කොටි ත්‍රස්තවාදියාට එරෙහිව සටන් කළ ඒ දෙදෙනා තුළ කිසියම් අන්‍යොන්‍ය වෘත්තීයමය ගෞරවයක් තිබේ. ෆොන්සේකා බ්‍රේක් නැතුව කට වාචාලකමට බැන්නත්, ගෝඨාභය කිසිම දවසක ඔහුට එරෙහිව ප්‍රසිද්ධියේ වචනයක් කියන්නේ නැත. ගෝඨාභය යනු වෙනම ක්ලාස් එකක මිනිහෙකි. ෆොන්සේකාට ගෝඨාභය සමග වැඩ කළ හැකිය. අගමැතිකම ගන්න කියා ආරාධනා කළෙත් ඒ නිසාය. වෙනත් කිසිවෙකු ෆොන්සේකාට කැමති නැත. එබැවින් ෆොන්සේකා ඔය මොන කයිවාරු ගැහුවත් අවසානයේ සජිත්ගේ අතපල්ලෙන් වැටෙන දෙයක් අහුලාගෙන ඔය විදිහට බුර බුරා ඉන්නට පමණක් සිදු වේ.
දිස් ඉස් පොලිටික්ස්.
(එරන්ද ගිනිගේ)
සමාජ ව්‍යවසායක සහ කර්තෘ
හිටපු ජනාධිපති ගෝඨාභය රාජපක්ෂගේ උපදේශක
eranda.ginige@gmail.com
2024 පෙබරවාරි 1
