රාජපක්ෂලා එක්ක මට පුද්ගලික ප්‍රශ්න කිසිවක් නෑ. ඒත් පවුල මූලික දේශපාලනය සහ චූලවාංශික පිරිමි මතවාදය එක්ක මට පෑහීමක් නෑ.
ඒත් අද මං සන්නා නාමල් එක්ක කරපු සාකච්ඡාව බැලුවා. නාමල් කතා කරන විලාසය, තැන්පත්කම, දේවල් දිහා බලන ආකාරය මට උනන්දුවක් ඇති කළා. ඒ වගේම අවුරුදු 39ක වයසට ලංකාවෙ දේශපාලනයේ ඉතාම දැඩි වෙනස්කම්, සුවපහසුකම්, පීඩනයන්, ඇදවැටීම් මැද වැඩිම පන්නරයක් ලැබූ තරුණයා වෙන්නෙ නාමල්.
හොරකම්, දූෂන, ඝාතන, ලැම්බොගිනි, උගන්ඩා සල්ලි, රත්තරං අශ්වයො ආදී සියලු චෝදනා මැද නාමල් හිනාවෙවී තාම දේශපාලනය කරනවා. තමන්ගේ දේශපාලන කඳවුරට ප්‍රතිවිරුද්ධ මහා අරගලයකින් පස්සෙ පත්වුනු ආණ්ඩුවක් ඉස්සරහ නාමල් තව තවත් ශක්තිමත් වෙමින් ඉන්නවා. මෙච්චර කල් නාමල් පිපෙනවා කිව්වට මං එහෙම එකක් දැක්කෙ නෑ. ඒත් දැන් නාමල් ඇත්තටම පිපෙනවා.
කවදාහරි නාමල් මේ රටේ නායකත්වය ගන්නවා. ඒක 2029ද 2034ද කියලා ඉලක්කම් වෙනසක් විතරයි තියෙන්නෙ. මේ රටේ යක්ඛ පරම්පරාවෙ උරුමය ඒ විදිහට බලය ගැනීම ගැන මට අර්බුදයක් නෑ. ඇත්තටම ඒ ගැන තිබුනු මගේ සංකා වේදනා ගොඩක් ඉවර කරන්න මාලිමා ආන්ඩුව බලයට පත්වීම හේතු වුනා. සහතික ලත් බොරුකාරයන්ට වඩා දක්ෂ චෞරයන් වුනත් ගෞරවාන්විතයි කියල මාලිමා ආණ්ඩුකරණය ඇතුලෙ ප්‍රත්‍යක්ෂ වුනා.
මේ රටේ ඕනෑම දේශපාලන කඳවුරක මතවාදය ඉවසන්න, එය නියෝජනය කරන ජනතාවට ගරු කරන්න වගේම මතවාදීව ඊට එරෙහිව ශිෂ්ටසම්පන්නව වැඩ කරන්න පුළුවන්කමක් අතිපාරිශුද්ධ බවේ මිත්‍යාවක් විසින් රටේ බලය ලබාගැනීමෙන් පස්සෙ මගේ ඇතුලෙ නිර්මාණය වුනා.
නාමල් විශිෂ්ට නම්‍යශීලීත්වයක් පෙන්නුම් කරනවා. ඕනෑම පක්ෂයක් එක්ක එකට වැඩකිරීමේ හැකියාවක් පෙන්නුම් කරනවා. ඒත් එක්කම දැවැන්ත විපක්ෂ රැලියකට නායකත්වය දෙනවා. උඩම තැනට ගිහින් බිංදුවටම වැටිලත් ආපහු හිනාවෙවී නැගිටින්න හයිය තියෙන මේ තරුණයාට මං සුබ පතනවා.
අපි ආපහු දවසක මූනට මූන මාරාන්තිකව ගැටෙයි. ඒත් මේ මොහොතෙ නාමල් කරන වැඩකොටස අගය නොකරන කුහකයෙක් වෙන්න මට පුළුවන්කමක් නෑ.
(සටහන | චින්තන ධර්මදාස)
දේශපාලන හා සමාජ විශ්ලේෂක
අධ්‍යක්ෂ - facultyofsex
vyadhadeva@gmail.com
(උපුටා ගැනීම -Chinthana Dharmadasa ෆේස්බුක් පිටුවෙන්..)
