නොවැම්බර් 25 වෙනකල්ම, එයාලා කලේ කාලගුණ අනාවැකි කීම විතරයි.
බරපතළ අනතුරු ඇඟවීමක් ඒ එකකවත් තිබ්බේ නෑ.
ඒකට ඒ අයට බැනලා වැඩක් නෑ.
එයාලා කලේ ඒ අයට තිබ්බ තාක්ෂණික පහසුකම් හා, එයාලගේ දැනුම සහ පලපුරුද්ද අනුව තමන්ට දැනුණ දේ ගැන කියපු එක විතරයි.
හැබැයි 24, 25 වෙනකොට ලැබුණු චන්ද්‍රිකා ඡායාරූප බැලුවම, කාලගුණ විද්‍යාව ගැන මෙලෝ අලබෝලෙක දැනුමක් නැති අපිටත් තේරුනා, බරපතළ අවපීඩන කලාපයක් දිවයින අවට හොල්මං කරමිං සිටින වග.
අන්න ඒ අනතුරුදායක තත්වය මං දන්න විදියට එයාලා ප්‍රසිද්ධියේ දැනුම් දුන්නා.
ඒ දැනුම් දුන්නෙත් බෝමයක් ප්‍රදේශවලට 200mm ඉක්මවා වැසි ඇති වීමේ අවදානමක් පවතින බවයි.
ඒ ඇර ඔය කියන විදියේ 300- 500 mm වර්ෂාපතනයක් ගැන අනතුරු ඇඟවීමක්නං මං දැක්කේ නෑ.
ඒකටත් කාලගුණ අධ්‍යක්ෂ ඇතුළු පිරිසටවත් රජයටවත් බැනලා වැඩක් නෑ.
මොකද, අර සුනාමිය වගේ මේකත් අපි කවුරුත් බලාපොරොත්තු නොවුනු ඉතාමත් අනපේක්ෂිත තත්වයක්.
හැබැයි, අඩුම තරමිං අර කඩුගන්නාවේ නාය යාම වුනාට පස්සේ හරි, අවදානම තේරුං අරං , සනිකව ඒකට මූණ දීමේ ක්‍රමවේදයක් හදන්න තිබ්බා.
01.සුනාමි අවදනම හරියට කලමනාකරනය කර ගන්ඩ බැරි වුනාම , ඒ සඳහා විධිමත් නීතිමය තත්වයක් නොතිබුනාම, ඉන් ඉදිරියට එන එවැනි විපත් කළමනාකරණය කර ගැනිමෙ අරමුනින් පාර්ලිමේන්තුවේ සම්මත කර ගත් ආපදා කළමනාකරණ පනතේ විධිවිධාන ප්‍රකාරව රට තුළ හදිසි ආපදා තත්වයක් ප්‍රකාශයට පත් කිරීම ජනාධිපතිවරයා විසින් කල යුතුව තිබුනා.
02.ඒ අනුව ජාතික ආපදා කලමනාකරන සභාව කැඳවා ආපදාව අවම කර ගැනීමට ඔවුන්ගේ අදහස් විමසා ගත යුතු සනික පියවර ගත යුතුව තිබුනා.
උදා.
*ප්‍රාදේශීය ලේකම් කොට්ඨාස මට්ටමිං නාය යෑම් අනතුරු (රතු නිවේදන) නිකුත් කිරීම පල රහිත ක්‍රියාවක් හෙයින්, ජා. ගොඩනැගිලි.ප.ආයතනය හරහා නාය යාමේ අවදානම් ඇති ස්ථාන නිශ්චිතව හඳුනා ගැනීම හා එකී ස්ථාන ප්‍රසිද්ධියට පත් කිරීම.
* ගං වතුර හා සුළි සුළං තත්වයක් දුරකථන ඇතුළු බෝමයක් සන්නිවේදන කටයුතු ඇන හිටින හෙයින්, එවැනි අවස්ථාවකදී ගත යුතු පියවර ජනතාවට හා ග්‍රාම නිලධාරින් වැනි බිම් මට්ටමේ රජයේ නිලධාරින්ට හඳුන්වා දීම හා 1947 වැනි එක් හදිසි ඇමතුම් අංකයක් වෙනුවට, අවම තරමේ ප්‍රාදේශීය ලේකම් කොට්ඨාශයක් පාසා හදිසි දුරකථන අංකයක් හඳුන්වා දීම.
03.රට තුළ හදිසි නීතිය පනවා, මහජන ආරක්ෂක පනත යටතේ අවශ්‍ය නියෝග නිකුත් කල යුතුව තිබුනා.
උදා.
* ත්‍රිවිධ හමුදාවට පොලිස් බලතල පවරා, නාය යාමේ අවදානම් තිබූ ස්ථාන අවට පදිංචිකරුවන් , ඔවුන්ගේ කැමැත්ත ඇතුව හෝ නැතුව ඒ ස්ථානවලිං ඉවත් කර සුරක්ෂිත යැයි හැඟෙන ඕනෑම ස්ථානයක රඳවා තබා ගැනීම.
* ඒ සඳහා ඕනෑම වාහනයක්, බෝට්ටුවක් , රජයේ හෝ නොවන ඕනෑම ගොඩනැගිල්ලක් හිමිකරුවන්ට කරන කෙටි ලිඛ්ත දැනුම්දීමක් මත තම බාරයට ගැනීමට ඔවුන්ට හා ආපදා කළමනාකරණයේ යෙදෙන ඕනෑම රජයේ විධායක නිලධාරියෙකුට බලය පැවරීම.
*වාසස්ථානවලිං පුද්ගලයින් ඉවත් කල පසු එවැනි ස්ථාන, ගම් බිම් ආදියට පිටස්තර කිසිදු පුද්ගලයන්ට ප්‍රවේශවීම වලක්වාලමින් ඇඳිරි නීතිය පැනවීම හා ඒ සඳහා සහකාර පොලිස් අධිකාරිවරයෙකුගේ ධූරයකට නොඅඩු නිලධාරියෙකුට බලය පැවරීම.
ඒමයි කියලා, වෙච්ච ව්‍යසනයට මේ ආණ්ඩුවට දෙස් දෙවෙල් තිබ්බා කියලා වැඩක් නෑ.
මේ ආණ්ඩුව නෙවෙයි, මොන ආණ්ඩුව තිබ්බත්, අන්තිමට වෙන්නේ මේ සෙතේම තමා.
"ගිය හකුරට නාඩන්නේ. තියෙන හකුර රැක ගන්නේ"
කියලා කියමනක් තියෙනවනේ....
(Wasantha Siri Watagoda)
Attorney at Law
උපුටා ගැනීම - Wasantha Siri Watagoda ෆේස්බුක් පිටුවෙන්....
