ෆියුරි ඔහුගේ මේ අදහස ප්‍රකාශ කරන්නේ ඔලෙක්සැන්ඩ ඌසික් සමග හෙට සෙනසුරාදා දැවැන්ත සටනකට සූදානම් වෙමින් සිටින මොහොතක.
ලෙනික්ස් ලුවිස් ට පසුව ලෝකයේ පළමු අවිවාදිත හෙවිවේට් බොක්සිං ශූරයා බවට පත්වීමට උත්සාහ කරමින් මේ තරගකරුවන් දෙදෙනා මේ සතිඅන්තයේ සෞදි අරාබියේ රියාද් නුවරදී එකිනෙකා සමග ගැටෙනවා.
පුහුණු වෙමින් සිටියදී ෆියුරිගේ ඇසට උඩින් සිදුවූ දරුණු තුවාලයක්
මේ සටන පැවැත්වීමට මුලින් තීරණය වී තිබුනේ පෙබරවාරියේ. නමුත් පුහුණු වෙමින් සිටියදී ෆියුරිගේ ඇසට උඩින් සිදුවූ දරුණු තුවාලයක් හේතුවෙන් තරගය මැයි 18 වැනිදාට කල්තැබුනා.
36 වැනි උපන්දිනයක් හා ඓතිහාසික ජයග්‍රහණයක් කරා ළඟාවෙමින් සිටින ‘ජිප්සි රජු’ ලෙසින් ප්‍රකට ටයිසන් ෆියුරි තමා ළඟදීම තරග බිමෙන් සමුගන්නා බවට ප්‍රකාශ කළහොත් එය එතරම් අරුමයක් නොවීමට ඉඩ තිබුනා.
නමුත් සෙනසුරාදා තරගයට පෙර සිය අරමුණ ලෝකයට දන්වමින්, තමා වයස අවුරුදු 40 වන තෙක් තවත් තරග අටක් හා දහයක් අතර ප්‍රමාණයකට සහභාගි වන බව ෆියුරි පවසා තිබෙන්නේ ඔහුගේ අවසාන ඉලක්කය අනාවරණය කරමින්.
ඒ තරගවලින් මම පවුම් මිලියන 500කින් පොහොසත් ඉතිහාසයේ පළමු හෙවිවේට් බොක්සිංකාරයා බවට පත්වේවි. එය සැලකිය යුතු තරමේ උරුමයක් වේවි”
“ඒ තරගවලින් මම පවුම් මිලියන 500කින් පොහොසත් ඉතිහාසයේ පළමු හෙවිවේට් බොක්සිංකාරයා බවට පත්වේවි. එය සැලකිය යුතු තරමේ උරුමයක් වේවි” යනුවෙන් ෆියුරි කියනවා.
තමා බොක්සිං සටන් කරන්නේ මුදල් උපයා ගැනීමට පමණක් බව ෆියුරි සඳහන් කරනවා.
“වෘත්තීය බොක්සිං ක්‍රීඩාවේ යෙදී සිටින කවුරු හරි මට කීවොත් ඔවුන් එය කරන්නේ මුදලට නෙවෙයි කියලා, ඔවුන් කරන්නේ බොරුවක්. මම කතා කරන්නේ මගේ හද පත්ලෙනුයි” ෆියුරි පවසනවා.
“මම මේක කරන්නේ මුදලටයි. ගනුදෙනුව වැඩිවන තරමට වඩා හොඳයි. මම මුදලින් ලැබෙන ත්‍යාග වෙනුවෙන් සටන් කරන බොක්සිං විශාරදයෙක්. ඒක තමයි මගේ රස්සාව. ඒක රත්තරංවලින් ද,රන් කාසිවලින් ද, මුදල්වලින් ද, කාර්වලින් ද කියලා මට කමක් නැහැ. මල්ල පිරෙන්න මට ඒවයින් ගෙවනවා නම් එච්චරයි. මට ඕන සල්ලි.”
ගල්ෆ් දේශයේ මූල්‍ය බලවත්කම සහ බොක්සිං සටන්වලට සෞදි අරාබියේ ඇමතිවරයෙකු වන Turki Alalshikhගේ තිබෙන දැඩි ආශාව නිසා ෆියුරිගේ මේ අභිප්‍රාය මුදුන්පත් කර ගැනීමට අවස්ථාව උදා වී තිබෙනවා.
ගල්ෆ් දේශයේ මූල්‍ය බලවත්කම සහ බොක්සිං සටන්වලට සෞදි අරාබියේ ඇමතිවරයෙකු වන Turki Alalshikhගේ තිබෙන දැඩි ආශාව නිසා ෆියුරිගේ මේ අභිප්‍රාය මුදුන්පත් කර ගැනීමට අවස්ථාව උදා වී තිබෙනවා.
රියාද් නුවර සෙනසුරාදා පැවැත්වෙන තරගයේ සම්පූර්ණ මුදල් පසුම්බියෙන් සියයට 70ක් ෆියුරි ට ලැබෙන පරිදියි ගිවිසුම්ගතව තිබෙන්නේ. පවුම් මිලියන 116කින් ඒ පසුම්බිය පිම්බී තිබෙන අතර එයින් තේරුම් ගත යුත්තේ ෆියුරි ට පවුම් මිලියන 81.2ක් ලැබිය යුතු බව.
කෙසේ වෙතත්, ඒ මුදලින් පවුම් මිලියනයක් රුසියාවේ ආක්‍රමණයට ලක්ව සිටින ඌසික්ගේ උපන්බිම වන යුක්රේනයට පරිත්‍යාග කිරීමට ෆියුරි ට සිදුවන්නේ ඒ අවශ්‍යතාව ඔහුගේ තරග කොන්ත්‍රාත්තුවට ඇතුළත් කර තිබෙන බැවින්.
කණ්ඩායම් දෙක මාලිගාවක් වැනි රියාද් හෝටලයේ මුහුණට මුහුණ හමුවූ අවස්ථාවේදී ප්‍රතිවාදී කඳවුරු දෙකේ කෝපය ඇවිස්සුනා.
මේ සටන් සතියේ පළමු ඉසව්ව ලෙසින් පෙරේදා පැවති රැස්වීමට පැමිණි කණ්ඩායම් දෙක මාලිගාවක් වැනි රියාද් හෝටලයේ මුහුණට මුහුණ හමුවූ අවස්ථාවේදී ප්‍රතිවාදී කඳවුරු දෙකේ කෝපය ඇවිස්සුනා.
ෆියුරිගේ ආධාරකරුවන් ඉදිරියේ ඌසික්ගේ ආධාරකරුවන් නොනවත්වා ඌසික්ගේ නම කෑගැසීම නිසා කෝපයට පත් ෆියුරිගේ පියා එම කණ්ඩායමේ සිටි කෙනෙකුට හිසෙන් ඇන්නා. මේ අශෝභන සිදුවීම ඔහුගේ පුතා නොදුටුවේ ඒ අවස්ථාවේ ඔහු වෙනත් කාමරයක මාධ්‍ය සාකච්ඡාවක නියැලී සිටි නිසා. පසුව ඔහුට සිද්ධිය ගැන දැන්වූ විට ෆියුරි එය තුට්ටුවකට හෝ මායිම් නොකළේ, “මම ඔයිට වැඩිය දරුණු දේවල් දැක තියෙනවා” යනුවෙන් පවසමින්.
ඔහුගේ පියා වන ජෝන් ෆියුරි එංගලන්තයේදී පුද්ගලයෙකුට පහර දීම හේතුවෙන් වසර තුනක් සිරබත් කෑ මිනිසෙක්. පියාව ටයිසන් ෆියුරි පුතුගේ පුහුණු කඳවුරට නැවත ඇතුළත් කර ගත්තේ ඉතාමත් මෑතකදී.
ඔහුගේ පියා වන ජෝන් ෆියුරි එංගලන්තයේදී පුද්ගලයෙකුට පහර දීම හේතුවෙන් වසර තුනක් සිරබත් කෑ මිනිසෙක්
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com