චෝ යාචින් (Zhou Yaqin) නමැති 18 හැවිරිදි චීන ක්‍රීඩිකාව ඇගේ පවුලේ අවන්හලේ සේවය කරමින් සිටින අයුරු දිස්වන වීඩියෝවක් සමාජ මාධ්‍යයේ ඉතාමත් ජනප්‍රියව තිබෙනවා.
චෝ යාචින් ඇයගේ ඔලිම්පික් නිල ඇඳුම පැළඳ පාරිභෝගිකයන්ට ආහාර පිළිගන්වමින් සේවයේ නිරතව සිටින අයුරු එම වීඩියෝවේ දැක්වෙනවා.
චෝ ජයග්‍රහණය කළ රිදී පදක්කම ඉතාමත් ඉහළින් අගය කෙරෙමින් ඇය බොහෝ දෙනාගේ අවධානයට ලක්වූයේ ඇය තවමත් 18 වැනි වියේ පසුවෙමින් සිටියදීත් ලෝකයේ බොහෝ ප්‍රබල තරගකාරියන් අතර කැපී පෙනීමට සමත් වූ නිසා.
චෝ මේ වසරේ පැරිස් ඔලිම්පික් ක්‍රීඩා උළෙලට චීනයෙන් සහභාගි වූ ජිම්නාස්ටික් ක්‍රීඩිකාවන් පස් දෙනාගෙන් කෙනෙක්. චීන කාන්තා ජිම්නාස්ටික් කණ්ඩායම රිදී පදක්කම් දෙකක් දිනා ගත් අතර චෝ ඇයගේ රිදී පදක්කම හිමිකර ගත්තේ balance beam ඉසව්වෙන්.
සිය මවුපියන් විසින් පවත්වා ගෙන යනු ලබන අවන්හලේ මේ ළාබාල ක්‍රීඩිකාව සේවය කරන අයුරු දැක්වෙන වීඩියෝව ShanghaiPanda විසින් පෝස්ට් කර තිබෙන්නේ X වේදිකාවේ. මේ අවන්හල තිබෙන්නේ චීනය මධ්‍යයේ Hunan පළාතේ Hengyang නගරයේ.
වීඩියෝව ජනප්‍රියව පැතිර ගොස් තිබුනේ මේ කැප්ෂනයත් සමග. “අර ලස්සණ චීන ජිම්නාස්ටික් ක්‍රීඩිකා චෝ යාචින් මතකද? ඔලිම්පික් රිදී පදක්කම දිනා ගැනීමෙන් පසුව, ඇය නිවාඩුවක් සඳහා ඇගේ මවුපියන්ගේ නිවසට පැමිණ සිටිනවා. ඇත්තටම, ඒක නිවාඩුවක් කියල හඳුන්වන්න බැහැ. මොකද, ඇය ඇගේ මවුපියන් විසින් පවත්වා ගෙන යන රෙස්ටෝරන්ට් එකේ වැඩවලට උදව් කළ යුතුයි.”
වේගයෙන් ජනප්‍රිය වූ මේ වීඩියෝවට ලැබුනු ප්‍රතිචාරවලින් කිහිපයකි මේ.....
“චෝ යාචින් ඇගේ ඔලිම්පික් සාර්ථකත්වය පවුලේ වගකීම් සමග සමව තබා ගන්නා ආකාරය හද උණුසුම් කරනවා. හරිම නිහතමානීයි!”
“වෙහෙස වෙලා වැඩ කරල පවුල වෙනුවෙන් මුදල් උපයන එක උතුම් රැකියාවක්. ඇය ආඩම්බර විය යුතුයි. ඇය පදක්කමක් දිනා ගත් අවස්ථාව අන්තර්ජාල ලෝකයේ අමරණීය යි.”
“එය ඇදහිය නොහැකියි. ඇය හරිම නිහතමානීයි. මම ආහාර ගන්න යන චීන අවන්හල්වල තමන්ගේ මවුපියන්ට හා පවුලට උදව් කරන බොහෝ ළමයින් සෑම ගිම්හානයකම මම දකිනවා. මම මේ ආකල්පයට හරි කැමතියි.”
“ඇයට ලැබුනේ රිදී පදක්කමක් වුනත් ඇය ඇගේ මවුපියන්ගේ රෙස්ටෝරන්ට් එකේ කෑම කන්න එන අයට ලබා දෙන්නේ රත්තරං සේවාවක්. ඇය පැළඳ සිටියේ ඇගේ ක්‍රීඩා ඇඳුම. කොච්චර හොඳ වෙළඳ උපායක්ද එය මේ රෙස්ටෝරන්ට් එකට.”
වීඩියෝව ඉතාම ජනප්‍රිය වී තිබෙනවා. විශිෂ්ට සාර්ථකත්වය හමුවේ වූව ද නිහතමානකම හා පවුලට තිබෙන වැදගත්කම පිළිබඳව ප්‍රබල සිහිගැන්වීමකි මේ වීඩියෝව.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com