මිනිසුන් සමග රොබෝලා එක්වූ ලොව පළමු මානව රූපී මැරතන් තරගය

මානව රූපී රො‌බෝලා ට එරෙහිව මිනිසුන් ප්‍රථම වතාවට පසුගිය සතිඅන්තයේ චීනයේ බෙයිජිං නුවර පැවති යිස්වොං අර්ධ  මැරතන් තරගයේ (Yizhuang half-Marathon) ධාවනයේ යෙදුනා. පසුගිය වසරේ චීනයේ පැවති විවිධ උත්සව හා තරගවල මානව රූපී රොබෝලා පෙනී සිට තිබුන ද, ඔවුන් මිනිසුන් සමග තරග කළ ප්‍රථම අවස්ථාව මෙය වුනා.

 

උසින් සෙන්ටිමීටර් 75 සිට 180 දක්වාත්, බරින් කිලෝග්‍රෑම් 88 දක්වාත් නොයෙකුත් හැඩයන්ගෙන් යුත් රොබෝලා මේ තරගයට සහභාගි වුනා. සමහර රොබෝලා සිනහවේ සිට කෙළිලොල් ඇස් ගැහීම දක්වා අසම්පූර්ණ චිත්තවේගී හැඟීම් පවා පළ කරන අයුරු දක්නට ලැබුණා. ආරක්ෂක පියවරක් ලෙස, මිනිස් තරගකරුවන්ට සමාන්තරව දිවෙන බාධකයක් විසින් මානවයන් හා රොබෝවරුන් සඳහා තරග මාර්ගය බෙදා වෙන්කර තිබුනා.

චීනය හරහා ඇති විශ්ව විද්‍යාල හා තාක්ෂණික ආයතනවලින් නිෂ්පාදනය කර තිබූ මේ රෝබෝලා විසි දෙනා කිලෝමීටර් 21 (සැතපුම් 13) දුරැති ධාවනයේ යෙදුනේ දහස් ගණන් මිනිස් තරගකරුවන් සමග.

අර්ධ මැරතන් තරගය ජනතාව සම්ප්‍රදායානුකූල නීති යටතේ තරග වදිද්දී රොබෝලා වෙනුවෙන් බැටරි මාරුකරන සේවා ස්ථාන ඇතුළු විශේෂයෙන් සකස් කළ නිර්ණායකයන් තිබුණා.

සමහර රොබෝලා තරගය සම්පූර්ණ කළ අතර අනෙක් රොබෝලා ආරම්භයේ සිටම දඟලන්නට වුනා. එක් රොබෝ තරගකරුවෙක් තරග ආරම්භක රේඛාවේදී ම බිම ඇද වැටුනු අතර නැවත නැගිට ධාවනය ආරම්භ කළේ මිනිත්තු කිහිපයක් බිම දිගාවී සිටීමෙන් පසුව.

 

ලොව පළමු මානව රූපී අර්ධ මැරතන් තරගය (World’s first humanoid half-marathon) ලෙසින් මෙය හඳුන්වා තිබෙනවා. බෙයිජිං අගනුවර යිස්වොං නමැති අධි තාක්ෂණ කලාපයේ පසුගිය සෙනසුරාදා පැවති මේ තරගය චීන කෘතිම බුද්ධිය හා රොබෝ නිර්මාණ විශේෂඥතාවේ ප්‍රදර්ශනයක් පමණක් නෙවෙයි. එය සැබෑ ලෝකයේ දරා සිටීමේ ශක්තිය, ස්වයං පාලනයට ඇති අයිතිය සහ තාක්ෂණික පරිණත බවේ පරීක්ෂණයක් ද වුනා.

 

මීට පෙර චීන වසන්ත උත්සවයේදී රොබෝලා තරු බවට පත්ව සිටි අතර ඔවුන් ෂැංහයි මෝස්තර සතියේ පලස මතින් ඇවිද ගියා. පසුගිය සතිඅන්තයේ ඔවුන් බෙයිජිං තාර පාරේ නියම පිරිමින් හා කාන්තාවන් 12,000කට පමණ එරෙහිව පාදයෙන් පාදය තබමින් ගියා.

 

මේ කිසිම රොබෝට්ටෙක් මිනිස් තරග කාලය අසලටවත් නොපැමිණි අතර කිලෝමීටර් 21 දුර ධාවනය පිරිමි ජයග්‍රාහකයා සම්පූර්ණ කළේ පැය 1යි මිනිත්තු 2කින්. බෙයිජිං මානව රොබෝ නවෝත්පාදන මධ්‍යස්ථානය විසින් නිර්මාණය කරන ලද රොබෝ ජයග්‍රාහක Tiangong Ultra ට තරගයේ අවසන් රේඛාව පසු කිරීමට පැය 2යි මිනිත්තු 40ක් ගතවුණා.

(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com