පොලිස් නිලධාරීන්ට සහ රජයේ හා පොදු ප්‍රජාවගේ කටයුතු කරන නිලධාරීන්ට තිබෙන නීතිමය ආරක්ෂාව තරග නිලධාරීන්ට ද ඉතාලි රජය විසින් ලබා දී තිබෙන්නේ ඔවුන්ගේ දණ්ඩ නීති සංග්‍රහය වෙනස් කරමින්.
තරග විනිසුරුවන්ට පහර දීමේ සිද්ධීන්වල වැඩිවීමකින් පසුව වෙනස් කර තිබෙන මේ නීතියට අනුව, තරග නිලධාරීන්ව තල්ලු කරන, පහර දෙන හෝ තර්ජනය කරන පුද්ගලයන්ට දැනට ක්‍රියාත්මක දඬුවම්වලට වඩා වැඩි දඬුවම් නියම වනවා.
“ක්‍රීඩාව යනු පක්ෂපාතිත්වය හා බෙදා ගැනීමයි. එය පිළිනොගන්නා අයට අනතුරු අඟවනවා: හෙට සිට තරග විනිසුරුවන්ට එරෙහිව සිදුකරන ප්‍රචණ්ඩකාරී හැසිරීම සහ ආරවුල් ඇති කිරීමට ප්‍රමාදයකින් තොරව දඬුවම් කරනවා. සමහර විට බන්ධනාගාරගත කරන්නත් ඉඩ තිබෙනවා” යනුවෙන් සිකුරාදා මේ නව නීතිය ගෙන එමින් කණිෂ්ඨ අධිකරණ ඇමති Andrea Ostellari ප්‍රකාශ කළා.
තරග විනිසුරුවන්ට එල්ල වන ප්‍රහාරයන් පිළිබඳව ඉතාලි රජය පසුගිය දෙසැම්බරයේ සිට ඉතාලි පාපන්දු විනිසුරුවන්ගේ සංගමය සමග සාකච්ඡා කරමින් සිටියා.
ඒ මාසයේදී ඉතාලියේ ප්‍රධානතම පාපන්දු තරගාවලිය වන Serie A ලීගයේ විනිසුරුවන් ඔවුන්ට එල්ල වන පරිභව කිරීම්වල වැඩිවීම සම්බන්ධයෙන් විරෝධතාව පළ කළේ ඔවුන්ගේ කම්මුලේ කළු පැල්ලමක් ඇඳගෙන තරග විනිශ්චයේ යෙදෙමින්.
සිසිලි නුවර පැවති පසුගිය ක්‍රීඩා වාරයේ යොවුන් තරගයකදී 19 හැවිරිදි Diego Alfonzetti ට පහර දීමක් සිදුවුනා.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com