මේ නියෝගයට අනුව හාසින් ජහාන් ට මසකට රුපියල් ලක්ෂ 1.50ක් සහ ආයිරා ට මසකට රුපියල් ලක්ෂ 2.50ක් බැගින් ගෙවීමට ෂාමි ට සිදුවනවා.
මේ මුදල් ගෙවීමේ නියෝගය පනවා තිබෙන්නේ වසර හතක පෙර දාතමක් යොදමින්. මාස හයක් ඇතුළත මේ නඩුවේ කටයුතු අවසන් කරන ලෙසට පහළ උසාවියට නියෝගයක් ද ලබා දී තිබෙනවා. ‘ගෘහස්ථ ප්‍රචණ්ඩත්වයෙන් කාන්තාවන් ආරක්ෂා කිරීම’ යන පනත යටතේ මේ නඩුව පවරා තිබුණා.
ඉන්දියා ක්‍රිකට් කණ්ඩායමේ සුපිරි ක්‍රීඩක මොහමඩ් ෂාමි සහ ඔහුගේ දියණිය ආයිරා අතර චිත්තවේගාත්මක හමුවීමක් පසුගිය වසරේ සිදුවුනා. බොහෝ කලකට පසුව මුණගැසුනු දියණිය සමග ෂොපිං යන අයුරු එහිදී දක්නට ලැබුනු අතර, “දිගු කලකට පසුව මම ඇය දුටු මොහොතේ කාලය නතර වුණා. වචනවලින් කියන්න බැරි තරමට මම ඔයාට ආදරෙයි” යනුවෙන් ෂාමි එ අවස්ථාවේ ඉන්ස්ටග්‍රෑම් හි පෝස්ටුවක් දමා තිබුණා.
එම පෝස්ටුවට පැයක් ඇතුළත ‘ලයික්ස්’ ලක්ෂ 1.60කට වැඩියෙන් ලැබී තිබුණා. කෙසේ වෙතත්, ෂාමිගෙන් වෙන්ව සිටින බිරිඳ හාසින් ජහාන් එම හමුව සම්බන්ධයෙන් බරපතල චෝදනා නගා තිබුණා.
“එය ලෝකෙට පේන්න කළ දෙයක් පමණයි. මගේ දුවගේ පාස්පෝට් එක අවසන් වෙලයි තිබුනේ. අලුත් පාස්පෝට් එකට ෂාමිගේ අත්සන ඕන. එයා එයාගෙ තාත්තව හම්බු වෙන්න ගියේ ඒ නිසයි. නමුත් ෂාමි අත්සන් කළේ නැහැ. ඔහු දුවත් එක්ක ෂොපිං මෝල් එකකට ගියා. එයා දුවව අරගෙන ගියේ ෂාමි දැන්වීම්වලට පෙනී සිටින ආයතනයටයි. මගේ දුව සපත්තු හා ඇඳුම් එ සාප්පුවෙන් ගත්තා. එතනින් මොනවා හරි ගන්නවා නම් ෂාමි ගෙවන්න ඕන නැහැ. ඒ නිසයි එයා දුව එතනට එක්ක ගියේ. මගේ දුවට ගිටාරයකුයි කැමරාවකුයි ඕන වෙලා තිබුණා. එයා දුවට ඒවා අරන් දුන්නේ නැහැ” යනුවෙන් හාසින් ජහාන් ප්‍රකාශ කර තිබුණා.
වෘත්තීය මට්ටමෙන් මොහමඩ් ෂාමි විස්මිත හැකියාවන් තිබෙන ක්‍රීඩකයෙකු ලෙස සැමවිටම අගය කෙරුන ද, පෞද්ගලික මට්ටමෙන් ගනුදෙනු කිරීමට ප්‍රශ්න ගණනාවක් ඔහුට තිබුණා. බිරිඳ සමග තිබූ සබඳතා බිඳ වැටීමෙන් පසුව චෝදනා ගණනාවක් ඔහුට එරෙහිව නගා තිබුණා. ඔහුගේ බිරිඳ මේ වේග පන්දු යවන්නා තරග පාවාදුන් බවට ද චෝදනා නැගීම හේතුවෙන් ඒ පිළිබඳව අප්‍රමාදව පරීක්ෂණයක් පැවැත්වීමට ඉන්දියා ක්‍රිකට් පාලක මණ්ඩලයේ දූෂණ විරෝධී ඒකකයට සිදුවුනා.
