ශ්‍රී ලංකා ක්‍රිකට් සභාපති ශම්මි සිල්වා මහතාගේ ආරාධනයෙන් මේ ව්‍යාපෘතිය සඳහා මුල්ගල තැබුවේ ජනාධිපති අනුර කුමාර දිසානායක මහතා. යාපනයේ මණ්ඩතිව් දූපතේ ඉදිවන මේ ක්‍රීඩාංගණය සඳහා සැප්තැම්බර් 1 වැනිදා පස්වරුවේ මුල්ගල තැබුනු අවස්ථාවට යෞවන කටයුතු හා ක්‍රීඩා ඇමති සුනිල් කුමාර ගමගේ මහතා ද සහභාගි වුනා.
යාපනය ජාත්‍යන්තර ක්‍රිකට් ක්‍රීඩාංගණය අක්කර 138ක භූමි ප්‍රමාණයක ඉදිවන්නේ ක්‍රීඩා නගරයක් ස්ථාපිත කිරීමේ ශ්‍රී ලංකා ක්‍රිකට් ආයතනයේ පළල් දැක්මේ කොටසක් වශයෙන්. ඉදිකිරීම් කටයුතු අවසන් වීමෙන් පසුව මේ යාපනය ක්‍රීඩා නගරය පිහිනුම් තටාක සංකීර්ණයක්, විවිධ ක්‍රීඩා සඳහා ගෘහස්ථ පිටි, තරු පන්තියේ හෝටල සහ අවන්හල්, වෙළඳ සංකීර්ණයක් හා විනෝදාංශ පහසුකම් සහ විනෝදාස්වාදය ගෙන එන තවත් නොයෙකුත් මධ්‍යස්ථානවලින් සමන්විත වීමට නියමිතයි.
මණ්ඩතිව් දූපතේ අක්කර 48 යි රූඩ් 2 යි පර්චස් 30.58ක භූමියක ඉදිකරන මේ ජාත්‍යන්තර ක්‍රිකට් පිටියට මධ්‍ය තණතීරු 10ක් ඇතුළත් වනවා. මේ පිටියේ තිබෙන තවත් විශේෂත්වයක් වන්නේ ජාත්‍යන්තර තරගයකදී ප්‍රධාන තණතීරුවේ සිට හතරේ සීමාව දක්වා අවම දුර ලෙසින් සැලකෙන මීටර 75 ට වඩා වැඩි දුරකින් හෙවත් මීටර 80කට වඩා වැඩි ඈතින් හතරේ සීමාව එළීමේ හැකියාවෙන් යුක්ත වීම.
ශ්‍රී ලංකා ක්‍රිකට් ආයතනය විසින් පූර්ණ වියදම දරනු ලබන මේ ක්‍රීඩාංගණයේ ඉදිකිරීම් කටයුතු සිදුවන්නේ අදියර හතරකින්. තරග පැවැත්විය හැකි මට්ටමට ක්‍රීඩාංගණය සහ ක්‍රීඩාගාරය ඉදිකිරීම පළමු අදියරයි. දෙවැනි අදියර යටතේ ප්‍රධාන ප්‍රෙක්ෂකාගාර සහ මාධ්‍ය කුටිය ඉදිවනවා. ක්‍රීඩාංගණ වටා වන ප්‍රේක්ෂක මණ්ඩප ඉදිකරනු ඇත්තේ තෙවැනි අදියර යටතේ වන අතර අවසන් අදියර යටතේ විදුලි ආලෝක පද්ධතිය ස්ථාපනය කිරීම සිදුවනවා.
මේ භූමිය ශ්‍රී ලංකා ක්‍රිකට් ආයතනය වෙත ලබා දී තිබෙන්නේ යාපනය වෙලනෙයි ප්‍රාදේශීය සභාව. එහි ඉදිවන ජාත්‍යන්තර මට්ටමේ ක්‍රිකට් ක්‍රීඩාංගණයේදී 40,000කට ආසන්න පිරිසකට තරග නැරඹීමේ හැකියාව තිබෙනවා.
මේ ඓතිහාසික මුල පිරීම හරහා උතුරු පළාතේ ක්‍රිකට් ක්‍රීඩාවේ යටිතල පහසුකම් සංවර්ධනය සඳහා වැදගත් සංධිස්ථානයක් සනිටුහන් කරනවා. ඊට අමතරව, ක්‍රීඩාව තුළින් ජාතීන් අතර සහජීවනය ඇති කිරීම සඳහා වන ශ්‍රී ලංකා ක්‍රිකට් ආයතනයේ දායකත්වය ද මෙහිදී සංකේතවත් කෙරෙනවා.
මෙතෙක් උතුර සහ නැගෙනහිර පළාත්වලට අඩුපාඩුවක්ව පැවති ජාත්‍යන්තර මට්ටමේ ක්‍රිකට් ක්‍රීඩාංගණයක අවශ්‍යතාව සපුරාලමින්, සහජ දක්ෂතා ඇති සෑම ක්‍රිකට් ක්‍රීඩක ක්‍රීඩිකාවක ට ම ජාතික කණ්ඩායම නියෝජනය කිරීමේ සමාන අවස්ථා ලබාදීමේ ‘ශ්‍රී ලංකා ක්‍රිකට් ජාතික සංවර්ධන ගමන් මඟ’ වැඩසටහන යටතේ ඉදිකරන යාපනය ජාත්‍යන්තර ක්‍රිකට් ක්‍රීඩාංගණය සඳහා මුල්ගල තැබීමේ අවස්ථාවට මහජන ආරක්ෂක හා පාර්ලිමේන්තු කටයුතු ඇමති ආනන්ද විජේපාල, ධීවර හා සාගර සම්පත් ඇමති රාමලිංගම් චන්ද්‍රසේකර සහ ක්‍රීඩා නියෝජ්‍ය ඇමති සුගත් තිලකරත්න යන මහත්වරු ද සහභාගි වුනා.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
