ලබන වසරේ පැවැත්වෙන ලෝක කුසලාන පාපන්දු තරගාවලියට සුදුසුකම් ලබා ගැනීමේ තරග වටයේ වෙනිසුවේලා කණ්ඩායමට එරෙහිව ආජන්ටිනාව බ්‍රහස්පතින්දා වාර්තා කළ ගෝල් 3-0ක ජයග්‍රහණයේදී මෙසී ගෝල් දෙකක් ලබා ගත්තේ ඔහුට සමුදීම පිණිස බුවනොස් අයිරස් අගනුවර Estadio Monumental ක්‍රීඩාංගණයට පැමිණ සිටි අතිවිශාල ක්‍රීඩා ලෝලීන් පිරිස අමන්දානන්දයට පත්කරමින්.
“මෙතැනදී මේ විදියට අවසානයක් දකින්නයි මම සැමවිටම සිහින මැවුවේ” යනුවෙන් මෙසී පැවසුවේ හැඟීම්බර වෙමින්. “මේ පිටියේදී මම බොහෝ දේවල් අත්විඳ තියෙනවා. හොඳ වගේම නරක දේවලුත් ඊට ඇතුළත්. නමුත් අපේ ක්‍රීඩා ලෝලීන් ඉදිරියේ ආජන්ටිනාවේ ක්‍රීඩා කරන්නට ලැබීම සැමවිටම ප්‍රීති ප්‍රමෝදය ගෙන දෙන අවස්ථාවක්.”
පාපන්දු ක්‍රීඩාවේ ඉහළම වේදිකාවෙන් විශ්‍රාම යන දිනයක් ගැන මෙසී තවමත් ඉඟියක් ලබා දී නැහැ. ලබන වසරේ අමෙරිකාව, මෙක්සිකෝව හා කැනඩාවේ පැවැත්වෙන ලෝක කුසලාන තරගාවලියට ක්‍රීඩා කරන්නේදැයි විමසූ විට මෙසී “අපි බලමු” යනුවෙන් කියා සිටියේ ඔහුගේ සහභාගිත්වය පිළිබඳව සහතික වීම ප්‍රතික්ෂේප කරමින්.
ආජන්ටිනා නායකයා 2026 ලෝක කුසලාන පාපන්දු තරගාවලිය සඳහා දකුණු අමෙරිකාවෙන් සුදුසුකම් ලැබීමේ තරගවලදී මේ වන විට ගෝල් 36ක් වාර්තා කර තිබෙනවා. ඒ අනුව ඔහු මේ මහාද්වීපයේ සුදුසුකම් ලබා ගැනීමේ තරගවල එදා මෙදා තුර වැඩිම ගෝල්ලාභියා ලෙස තවදුරටත් රැඳී සිටිනවා. ඔහුගේ ‘ඉන්ට මයාමි’ කණ්ඩායම් සගයා වන ලුඊස් ස්වාරස් ගෝල් 29ක් ලබා සිටිය ද ඔහු දැන් උරුගුවේ ජාතික පාපන්දු කණ්ඩායමෙන් විශ්‍රාම ගොස් සිටිනවා. බොලිවියාවේ මාසෙ‌ලෝ මොරීනෝ මාටිනස් ගෝල් 22ක් ලබා ගෙන තෙවැනි ස්ථානයේ පසුවනවා.
ලබන වසරේ ලෝක කුසලානයට තමා ක්‍රීඩා කරන්නේ තමා ශාරීරිකව හොඳ තත්ත්වයෙන් සිටින බව දැනුනොත් පමණක් බව මෙසී බ්‍රහස්පතින්දා තරගයෙන් පසුව අවධාරණය කර සිටියා.
“මම ඒ ගැන ඉන්නේ ප්‍රබෝධමත්ව හා මහත් ආශාවකින් යුතුවයි. මම දවසින් දවස මට දැනෙන හැඟීම් අනුව දේවල් බාර ගන්නවා. මට හොඳයි කියලා දැනුනොත් මම එයින් විනෝද වෙනවා. එහෙම නැත්නම්, මම එතැන ඉන්නේ නැහැ” මෙසී පැවසුවා. එම තරගාවලිය ආරම්භ වීමට තවත් තිබෙන මාස නවය “දීර්ඝ කාලයක්” බව මෙසී සඳහන් කළා.
“ලෝක කුසලාන තරගාවලිය සම්බන්ධයෙන් කලින් කියා ඇති පරිදි මම තවත් ලෝක කුසලානයක් ක්‍රීඩා කරාවිද කියා මම හිතන්නේ නැහැ. මගේ වයස නිසා, මම ක්‍රීඩා නොකරාවි කියන එකයි වඩාත්ම තර්කානුකූල වන්නේ” 38 හැවිරිදි ලයනල් මෙසී වැඩිදුරටත් ප්‍රකාශ කළා.
“ඒත් අපි බලමු. ලෝක කුසලාන තරගාවලිය ගැන මම තවම තීරණයක් අරගෙන නැහැ!”
(වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
