ශෂිකලා සිරිවර්ධන මෙල්බර්න් ක්‍රිකට් පුහුණුකාරිත්වයට පිවිසෙයි

මෙල්බර්න් තණතීරුවේ ඇරඹි නව ඉනිම

වසර 17ක දීර්ඝ ජාත්‍යන්තර ක්‍රිකට් දිවියට 2020 මෙල්බර්න් පිටියේදී සමුදුන් ශ්‍රී ලංකා හිටපු නායිකා ශෂිකලා සිරිවර්ධන, එම නගරයට කිලෝමීටර් 55ක් ඔබ්බෙන් පිහිටි තණතීරුවකින් සිය නව ගමන අරඹා තිබේ.

වික්ටෝරියා ප්‍රාන්තයේ ප්ලෙන්ටි වැලී (Plenty Valley) ක්‍රිකට් සමාජයේ කාන්තා කණ්ඩායමේ ප්‍රධාන පුහුණුකාරිණිය ලෙස ඇය මෙවර 2026–27 තරගවාරයේදී වගකීම් භාරගෙන ඇත.

පසුගිය තරගවාරයේ නායිකාව මෙන්ම පුහුණුකාරිණිය ලෙස කටයුතු කළ ඇය, මෙවර ක්‍රීඩිකාවකගේ භූමිකාවෙන් මුළුමනින්ම ඉවත්ව පුහුණුකාරිත්වය කෙරෙහි පමණක් අවධානය යොමුකරන පළමු අවස්ථාව මෙයයි.

බිම් මට්ටමේ සිට උගත් පාඩම්

කාන්තා එක්දින පිටියේ ලකුණු 1,000 සීමාව (ලකුණු 2,029) සහ කඩුලු 100 සීමාව (කඩුලු 124) පසුකළ එකම ශ්‍රී ලාංකික ක්‍රීඩිකාව වන ශෂිකලා, විශ්‍රාම ගැනීමෙන් අනතුරුව සිය දෙවන පෙළ (Level 2) පුහුණුකාර සුදුසුකම් සපුරා ගත්තාය.

ශ්‍රී ලංකා වයස 19න් පහළ කාන්තා කණ්ඩායම සමඟ ලැබූ පන්නරයෙන් පසු, ඕස්ට්‍රේලියානු ක්‍රිකට් වටපිටාව බිම් මට්ටමේ සිට හැදෑරීම ඇගේ තීරණය විය.

බ්‍රිස්බේන් නුවර වයිනම්-මැන්ලි (Wynnum-Manly) සහ මෙල්බර්න් බොක්ස් හිල් (Box Hill) ක්‍රීඩා සමාජ නියෝජනය කරමින් ලද අත්දැකීම්, නව සංස්කෘතියක් තුළ ඇගේ පුහුණුකාර දිවියට ශක්තිමත් පදනමක් සැපයීය.

ක්ලබ් 6 කින් ඇරඹි ගමන සහ ගෝලීය රැල්ල

තමන් ජාත්‍යන්තර ක්‍රිකට් දිවිය ඇරඹූ 2003 වකවානුව සිහිපත් කරන ශෂිකලා, එදා මෙරට කාන්තා ක්‍රිකට් පාලනය වූයේ ශ්‍රී ලංකා ක්‍රිකට් ආයතනය යටතේ නොවන බව පෙන්වා දෙයි. ක්‍රීඩා සමාජ හයක් සහ ක්‍රීඩිකාවන් 200–400කට සීමා වූ වටපිටාවකින් බිහිවූ ඇය, අද කාන්තා ක්‍රිකට් ලොව පුරා වෘත්තීය මට්ටමේ කර්මාන්තයක් බවට පත්වීම සතුටින් දකින්නීය.

ලොව පුරා කාන්තා පුහුණුකාරිණියන් පෙරමුණට එන ප්‍රවණතාවක් ද මේ වන විට නිර්මාණය වී තිබේ. ඕස්ට්‍රේලියාවේ ෂෙලී නිච්කේ (Shelley Nitschke) සහ එංගලන්තයේ චාලට් එඩ්වර්ඩ්ස් (Charlotte Edwards) ප්‍රධාන පුහුණුකාර ධුර දරද්දී, සාරා ටේලර් එංගලන්ත පිරිමි කණ්ඩායමේ සහාය පුහුණුකාරිණියක ලෙස කටයුතු කරයි.

"ක්‍රීඩාවෙන් ලැබුණු දේ පෙරළා දිය යුතුයි"

"අපිට ක්‍රීඩාවෙන් ලැබුණු දේ නැවත ක්‍රීඩාවට ලබා දීම අතිශය වැදගත්. එකම එක තරුණ ක්‍රීඩිකාවකට හෝ අපෙන් යමක් ඉගෙන ගෙන ඉදිරියට එන්න පුළුවන් නම්, එය තමයි ලොකුම තෘප්තිය," යනුවෙන් ශෂිකලා cricket.com.au වෙත සඳහන් කර තිබේ.

ඉදිරියේදී ඕස්ට්‍රේලියාවේ ප්‍රාන්ත මට්ටමේ කණ්ඩායමකට හෝ යම් දිනෙක ශ්‍රී ලංකා ජාතික කාන්තා කණ්ඩායමට මඟපෙන්වීම සිය දිගුකාලීන අභිප්‍රාය බව පවසන ඇය, තවමත් තමන් සිටින්නේ අඛණ්ඩව ඉගෙන ගන්නා ශිෂ්‍යාවකගේ මානසිකත්වයේ බව අවධාරණය කරයි.


මූලාශ්‍ර සබැඳිය :  

Cricket Australia නිල වාර්තාව: Ex-Sri Lanka skipper's newfound passion in Melbourne's north