එක ම ලකුණක් හෝ ලබා නොගෙන විස්සයි20 - T20 ලෝක කුසලාන ක්‍රිකට් තරගාවලියක වීරයා බවට පත්වූ පළමුවැන්නා
ලෙසින් ඉන්දියාවේ ජස්ප්‍රිට් බුම්රා ඉතිහාසගතව සිටිනවා.
2024 විස්සයි20 ලෝක කුසලාන තරගාවලියේදී බුම්රා ට පිතිකරණයේ යෙදීමට සිදුවූයේ එක් වතාවක් පමණයි. පාකිස්තානය ට එරෙහි ඒ අවස්ථාවේදී ඔහු බින්දුවකට දැවී ගියා.
මෙවැනි හපන්කමක් පෑ තවත් ක්‍රීඩකයන් දෙදෙනෙකු සිටිය ද එය වාර්තා වන්නේ ජාත්‍යන්තර එක්දින - ODI - ලෝක කුසලානයෙන්. මේ දෙදෙනා ම ඔස්ට්‍රේලියානු වේග පන්දු යවන්නන් වීම විශේෂත්වයක්. 2007 වසරේදී ග්ලෙන් මැග්‍රාත් තරග 11කදී එක් වතාවක් හෝ පිතිකරණයේ නොයෙදෙමින් ද, 2015 වසරේදී මිචල් ස්ටාක් ඉනිම තුනකදී පන්දු තුනකට මුහුණ දෙමින් එක ලකුණක් හෝ ලබා නොගනිමින් ද, තරගාවලියේ වීරයන් බවට පත්වුනා.
2024 තරගාවලියේ බුම්රාගේ වේග පන්දු යැවීමේ 4.17ක සකසුරුවම් අගය විස්සයි20 ලෝක කුසලාන තරගාවලියක පන්දු 100කට වඩා වැඩියෙන් යැවූ ඔ්නෑම පන්දු යවන්නෙකුගේ හොඳම දක්ෂතාව යි. බුම්රා මේ තරගාවලියේදී ක්‍රීඩා කළ තරග අටේදී ඔහු වැඩියෙන්ම ලබා දුන් ලකුණු ප්‍රමාණය වූයේ ඔස්ට්‍රේලියාව ට එරෙහිව ලකුණු 29.
බුම්රා මේ තරගාවලියේදී ඔ්වර 29.4ක් යවමින් කඩුලු 15ක් ලබා ගැනීමට සමත් වුනා. ඔහුගේ පන්දුවලින් පිතිකරුවන්ට ලබා ගත හැකි වූයේ හයේ පහර 2ක් සහ හතරේ පහර 10ක් පමණයි.
ජස්ප්‍රිට් බුම්රා මෙවර තරගාවලියේදී විස්සයි20 ක්‍රිකට් ක්‍රීඩාවේ වඩාත්ම සම්පූර්ණ වේග පන්දු යවන්නා බවට පත්වෙමින් අවසානයේ ලෝකය පරාජය කරන්නෙක් බවට වාර්තා පොතට ඇතුළත් වුනා. සිය පන්දු යැවීමේ අංග සම්පූර්ණ විවිධත්වය ඔහු මේ තරගාවලිය පුරා ප්‍රදර්ශනය කළේ පිතිකරුවන්ගේ මනස අවුල් කරමින්.
වේලාසනින් කඩුලු ලබා ගෙන අවසන් අවස්ථාවලදී තරගයක් මරා දැමීමේ දක්ෂතාවක් බුම්රා සතුව තිබෙනවා. නමුත් ඔහුගේ නියම වටිනාකම වන්නේ තරගයේ අවාසිදායක මොහොතේ ඔහු කෙරෙහි විශ්වාසස තැබිය හැකි වීම. එවැනි තීරණාත්මක අවස්ථාවන්හිදී සුවිශේෂ ක්‍රීඩාවක නියැලීමට බුම්රා කිසිවිටකත් අසමත් වන්නේ නැහැ.
පාකිස්තානය ට එරෙහිව පන්දු 36කින් ආරක්ෂා කිරීමට සිදුව තිබුනේ ලකුණු 40ක් පමණක්ව තිබියදී නායක රෝහිත් ෂර්මා පන්දුව බුම්රා ට බාර දුන් අවස්ථාවේ ඔහු, ඒ වන විට කඩුල්ලේ ස්ථාවර වී සිටි මොහමඩ් රිස්වාන් දවාලුවා.
අවසාන මහා තරගයේදී හයින්රිච් ක්ලාසන් ඉන්දියාවේ අක්සා පටල් ට එරෙහිව ඕවරයකින් ලකුණු 24ක් ලබා ගෙන සිටියේ දකුණු අප්‍රිකාව කඩුලු 6ක් අතැතිව පන්දු 30කින් ලකුණු 30ක් ලබා ගැනීමේ සාර්ථක තත්ත්වයකට ගෙන එමින්.
මෙවැනි තත්ත්වයකදී අවසාන මහා තරගයක් ආපසු හරවා ජයග්‍රහණය කළ හැක්කේ කෙසේද? ඉන්දියා නායකයා සතුව තිබුනු අන්තිම තුරුම්පුව වූයේ බුම්රා. මේ ඉන්දියානු සුපිරි වේග පන්දු යවන්නා ලකුණු 4ක් පමණක් ලබා දුන් ඕවරයක් යවමින් අනෙක් අන්තයෙන් කඩුල්ලක් ලබා ගැනීමේ පීඩනයක් නිර්මාණය කර ඉන්පසුව ‘රිවර්ස් ස්වින්ග්’ පන්දුවකින් මාකෝ ජැන්සන් ආපසු ක්‍රීඩාගාරයට යැවීමට සමත් වුනේ ඉන්දියාව ට ජයග්‍රහණයේ මාවත විවර කර දෙමින්.
වේග රිද්මයේ පිතිහරඹවලින් සමන්විත T20 ක්‍රිකට් තරගාවලියක පන්දු යවන්නෙක් වීරයා වනු සාමාන්‍යයෙන් දක්නට නොලැබෙන දෙයක්. නමුත් ජස්ප්‍රිට් බුම්රා යනු අසාමාන්‍ය පන්දු යවන්නෙක්.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
