දෙපිල අතර සවුත්ඇම්ප්ටන් හි පැවති තෙවැනි හා අවසාන තරගයේදී වේග පන්දු යවන ජොෆ්රා ආචර් කඩුලු හතරක් ලබා ගනිමින් එංගලන්තය ට යම් තරමක ආඩම්බරයක් ලබා දුන්නේ දකුණු අප්‍රිකාව සමග පැවති තරග තුනකින් සමන්විත ODI තරගමාලාව එංගලන්තය සම්පූර්ණයෙන්ම පරාජය වීම වළක්වමින්.
කාසියේ වාසිය අහිමි වීමෙන් පසුව පළමුව පන්දුවට පහර දුන් එංගලන්තය ඕවර 50 තුළ කඩුලු 5ක් පමණක් දැවී ලකුණු 414ක් වාර්තා කළේ ජෝ රූට් (100) සහ විසිඑක් හැවිරිදි ජේකබ් බෙතල්ගේ (110) ශතක සමග.
පිළිතුරු වශයෙන් දකුණු අප්‍රිකාව ඕවර 20 යි පන්දු 5ක් ඇතුළත ලකුණු 72කට දැවී ගියා.
සිය පළමු ඕවර පහේදී ලකුණු පහක් පමණක් ලබා දෙමින් කඩුලු හතරක් ලබා ගත් ආචර් ඔහුගේ ඕවර නවය අවසන් කළේ ලකුණු 18කට කඩුලු 4ක් ලෙසින්.
මීට පෙර ජාත්‍යන්තර එක්දින ක්‍රිකට් ක්‍රීඩාවේ වැඩිම ලකුණු පරතරයකින් යුත් ජයග්‍රහණය වාර්තා කර තිබුනේ ඉන්දියාව. 2023 වසරේදී ඔවුන් 317ක ලකුණු පරතරයකින් ශ්‍රී ලංකාව පරාජය කරමින් ඒ ජයග්‍රහණය සටහන් කළා.
කණ්ඩායම් දුසිම් ගණනක් උපරිම කඩුලු ප්‍රමාණය වන කඩුලු 10කින් ජයග්‍රහණ වාර්තා කර තිබෙනවා. නමුත් ලකුණු පරතරය අතින් මෙතෙක් වාර්තා වූ ලොකුම ජයග්‍රහණය මෙයයි.
(වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
