ජාත්‍යන්තර පාපන්දු සම්මේලනයේ (FIFA) ලෝක ශ්‍රේණිගත කිරීම්වල ශ්‍රී ලංකාවේ වැදගත් නැගිටීමෙන් ආසියානු කලාපය තුළ ශ්‍රී ලාංකේය පාපන්දුවේ දියුණු වීමේ හැකියාව සහ අභිලාෂය පිළිබිඹු කරන බව ආසියානු පාපන්දු ප්‍රධානියා පවසනවා.
ශ්‍රී ලංකා ජාතික පාපන්දු කණ්ඩායමේ මෑත කාලීන ප්‍රගතිය පිළිබඳව ෂේක් සල්මාන් බින් ඉබ්‍රාහිම් අල් කලීෆා මෙසේ වර්ණනා කළේ ජපානයේ ටෝකියෝ අගනගරයේ පැවති ආසියානු පාපන්දු සම්මේලනයේ (AFC) අතිවිශේෂ කොංග්‍රසයේදී ශ්‍රී ලංකා පාපන්දු සම්මේලනයේ සභාපති ජස්වර් උමාර් හමුවූ අවස්ථාවේ.
ශ්‍රී ලංකා (FFSL) හා ආසියා (AFC) පාපන්දු ප්‍රධානීන් දෙදෙන ටෝකියෝ අගනුවරදී මුණගැසුණු අවස්ථාව
මේ සාකච්ඡාවේදී උමාර් ඔහුගේ අවංක කෘතඥතාව AFC නායකත්වයට ප්‍රකාශ කර සිටියේ විශේෂයෙන් ශ්‍රී ලංකාවේ පාපන්දු යටිතලය ශක්තිමත් කිරීම පිණිස උසස් තත්ත්වයේ පාපන්දු පිටි දෙකක් ප්‍රදානය කරමින් ශ්‍රී ලංකාවේ පාපන්දු ක්‍රීඩාවේ සංවර්ධනය වෙනුවෙන් ඔවුන් නිරන්තරයෙන් දක්වන සහයෝගය හා කැපවීම අගය කරමින්.
මූල්‍ය ප්‍රදානයන්ට අමතරව, AFCය පාපන්දු ක්‍රීඩාව මූලික පදනමෙන් මෙන්ම සුපිරි මට්ටමෙන් ද සංවර්ධනය කිරීම සඳහා සහාය වෙමින් අත්‍යවශ්‍ය යටිතල හා තාක්ෂණික සහය ශ්‍රී ලංකාව ට නොකඩවා ලබා දෙමින් සිටිනවා.
ශ්‍රී ලාංකික පාපන්දුව එහි වර්තමාන ප්‍රධානියාගේ උපායමාර්ගික දැක්ම යටතේ පසුගිය දෙවසර තිස්සේ සැලකිය යුතු පරිවර්තනයක යෙදී සිටිනවා. මේ ප්‍රගතිය වැඩිවෙමින් තිබෙන බවට ප්‍රත්‍යක්ෂ වන්නේ ජාතික කණ්ඩායමේ දියුණු වූ ජාත්‍යන්තර ක්‍රීඩාව, එහි FIFA ශ්‍රේණිවල ඉහළ යාම සහ දේශීය තරගාවලියන් හා පාපන්දු යටිතල පහසුකම්වල දිගටම සිදුවෙමින් පවතින වර්ධනය හරහා යි.
අලුත් අභිලාෂයක්, වඩාත් ශක්තිමත් පදනමක් හා අනාගතය වෙනුවෙන් පැහැදිලි දර්ශනයක් සහිතව ඉදිරියට යන ශ්‍රී ලංකා පාපන්දුවේ ගමනට ආසියානු පාපන්දු ප්‍රධානියාගෙන් ලැබුණු පිළිගැනුම තවත් හයියක් වී තිබෙනවා.
වර්නන් ගුණසේකර
(ක්‍රීඩා සංස්කාරක)
