ජාත්‍යන්තර විස්සයි20 (T20) ක්‍රිකට් ක්‍රීඩාවේ කඩුලු 200ක් ලබා ගත් පළමු පන්දු යවන්නා බවට ඇෆ්ගනිස්තානයේ රෂිඩ් ඛාන් පත්ව සිටිනවා. හිටපු ඇෆ්ගන් ක්‍රිකට් නායකයා මේ කඩඉමට පිවිසියේ ෂාජා හිදී සිම්බාබ්වේ ට එරෙහිව පැවති ඇෆ්ගනිස්තාන කණ්ඩායමේ දෙවැනි විස්සයි20 තරගයේ.
ද්විත්ව ශතක කඩුල්ලේ සුවිශේෂී මොහොත
මේ පා-දඟ පන්දු යවන්නා ඔහුගේ ද්විත්ව ශතක කඩුල්ල වාර්තා කළේ නව වැනි ඔ්වරයේදී ටඩිවනාශී මරුමානි කඩුල්ල මුවා කිරීමේ වරදට හසුකර ගනිමින්.
රෂිඩ් මේ වික්‍රමය සටහන් කළේ ඔහු සහභාගි වූ 120 වැනි ජාත්‍යන්තර T20 තරගයේ. 28 හැවිරිදි පන්දු යවන්නා 13.96ක සාමාන්‍යයක් සතුකර ගෙන සිටින්නේ මේ ශෛලියේ ක්‍රිකට් ක්‍රීඩාවේ 6.13ක සකසුරුවම් අගයක් වාර්තා කරමින්. ලකුණු 3කට කඩුලු 5ක හොඳම දක්ෂතාවක් සමග තරගයකදී කඩුලු පහක් ලබා ගැනීම් දෙකක් ඔහුගේ වාර්තාවට ඇතුළත්.
ලොව අංක එකේ කඩුලුලාභියා ලෙස පෙරමුණේ
ජාත්‍යන්තර විස්සයි20 තරග බිමේ පෙරමුණේ සිටින කඩුලුලාභීන්ගේ ලැයිස්තුවේ කඩුලු 200ක් සමග ඉහළින් ම සිටීමට රෂිඩ් ඛාන් ට හැකිව තිබෙන්නේ ඔහු එහි දෙවැනි ස්ථානයේ පසුවන එංගලන්තයේ අඩිල් රෂිඩ් ට වඩා කඩුලු 39ක් වැඩියෙන් ලබා ගෙන සිටින බැවින්.
(සටහන | වර්නන් ගුණසේකර)
