පාකිස්තාන ජාතිකයෙක් ආසියානු ක්‍රිකට් කවුන්සලයේ (ACC) ප්‍රධානියා ලෙස සිටීම හා මීට දින කිහිපයකට පෙර ඉන්දියාව හා පාකිස්තානය යුද්ධයකට පැටලී සිටි නිසා එම කවුන්සලය මෙහෙයවන මේ තරගාවලි දෙකට ඉන්දියා කණ්ඩායම්වලට සහභාගි වීමට BCCI ඉඩ නොදෙන බව එම වාර්තාවෙන් කියා තිබුණා.
පාකිස්තානයේ අභ්‍යන්තර කටයුතු ඇමතිවරයා මෙන්ම පාකිස්තාන ක්‍රිකට් මණ්ඩලයේ සභාපතිවරයා ද වන මෝසින් නක්වි ACCයේ සභාපතිවරයා ද වනවා.
විස්සයි20 ව්‍යුහයෙන් සැප්තැම්බරයේ පැවැත්වීමට නියමිත පිරිමි ආසියානු කුසලාන තරගාවලියේ සත්කාරකයන් වන්නේ වර්තමානයේ එම ශූරතාව හිමිකර ගෙන සිටින ඉන්දියාව වන අතර කාන්තා නැගීඑන කණ්ඩායම් ආසියානු කුසලාන තරගාවලියේ සත්කාරකත්වය ලැබී තිබෙන්නේ ශ්‍රී ලංකාව ට.
දේවාජිට් සයිකියා
“ආසියානු කුසලානය හා කාන්තා නැගීඑන කණ්ඩායම් ආසියානු කුසලානය යන ACC ඉසව්වලට සහභාගි නොවීමේ BCCI තීරණයක් ගැන පළවූ ප්‍රවෘත්ති කිහිපයක් ගැන අපට දැනගන්නට ලැබී තිබෙනවා. එවැනි ප්‍රවෘත්ති මේ මොහොත වන විට කිසිම සත්‍යයක් නැති හිස් ඒවායි. ACCයට කිසිම දෙයක් ලිඛිතව දැන්වීම කෙසේ වෙතත් ACCයේ තරගාවලියන් සම්බන්ධයෙන් එවැනි පියවරක් ගැනීමක් හෝ එවැන්නක් ගැන සාකච්ඡා කිරීමක්වත් BCCI විසින් සිදුකර නැහැ” යනුවෙන් BCCI ලේකම් දේවාජිට් සයිකියා ‘පී.ටී.අයි.’ පුවත් සේවයකට ප්‍රකාශ කර තිබෙනවා.
ඉන්දියා ක්‍රිකට් පාලක මණ්ඩලය මේ අවස්ථාවේ ඔවුන්ගේ ප්‍රධාන අවධානය යොමුකර තිබෙන්නේ ඉන්දියා ප්‍රිමිය ලීගය (IPL) ගැටළුවකින් තොරව පවත්වා ගෙන යාමට සහ ලබන මාසයේ ආරම්භ වන එංගලන්තය ට එරෙහි තරග පහකින් සමන්විත ටෙස්ට් තරගමාලාවට බව සයිකියා පවසනවා.
“ආසියානු කුසලානය හෝ ආසියානු ක්‍රිකට් කවුන්සලයේ වෙනත් කිසිම කාරණයක් පිළිබඳව හෝ කිසිම මට්ටමකින් සාකච්ඡා වෙලා නැහැ. ඒ නිසා ඒ සම්බන්ධයෙන් පළවන ඕනෑම ප්‍රවෘත්තියක් හෝ වාර්තාවක් හිතලුවක් පමණයි.”
“ACCයේ තරගාවලි සම්බන්ධයෙන් ඕනෑම සාකච්ඡාවක් පැවැත්වුනොත් සහ වැදගත් තීරණවලට එළැඹුනොත් ඒවා BCCI විසින් මාධ්‍ය හරහා නිවේදනය කරනවා” යනුවෙන් ඔහු වැඩිදුරටත් සඳහන් කරනවා.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com