මහනුවර කිංස්වුඩ්/උසස් බාලිකා ඒකාබද්ධ විදුහල් කණ්ඩායම තරගාවලියේ ‘ප්ලේට්’ ශූරයන් වුනා. ඔවුන් එම ශූරතාව හිමිකර ගත්තේ කොළඹ තර්ස්ටන්/දේවි බාලිකා ඒකාබද්ධ පිලට එරෙහිව ලැබූ 2-1ක ජයග්‍රහණයකින්.
කොළඹ වෙස්ලි/මෙතෝදිස්ත ඒකාබද්ධ විදුහල් කණ්ඩායම ‘බෝල්’ කිරුළ හිමිකර ගත් අතර ඔවුන් හමුවේ 1-0කින් පරාජය වුනේ මහනුවර ධර්මරාජ/මහමායා ඒකාබද්ධ කණ්ඩායම.
ඉතා ජනප්‍රිය වාර්ෂික තරගාවලියක් වන මේ ඉසව්වට කණ්ඩායම් 16ක් සහභාගි වුනා. මෙහිදී විද්‍යාර්ථ විදුහලේ හෂාන් පෙරේරා තරගාවලියේ වඩාත්ම වටිනා ක්‍රීඩකයා ලෙස තේරුණු අතර වඩාත්ම වටිනා ක්‍රීඩිකාව ලෙස නම් කෙරුනේ පුෂ්පදාන විදුහලේ හෂිනි මාලව තෙන්නකෝන්.
මෙරට වාර්ෂික රග්බි කැලැන්ඩරයේ මේ තරගාවලිය ජනප්‍රියත්වයක් උසුලන්නේ පසුගිය වසරේ පාසල් රග්බි තරු නැවත පිටියට පිවිසීම නිසා. බාලිකා පාසල් ඔවුන්ගේ සමාන බාලක පාසල් සමග එක්වන මේ තරගාවලිය ශ්‍රී ලංකා රග්බි ඉතිහාසයේ මේ ආකාරයේ පළමු තරගාවලිය ලෙස සැලකෙනවා.
සැණකෙලි සිරියෙන් යුතුව සී.ආර්. ඇන්ඩ් එෆ්.සී. ක්‍රීඩාංගණයේදී පසුගියදා පැවැති මේ තරගාවලිය 9 වැනි වසරටත් සංවිධානය කළේ ප්‍රසිද්ධ ජාත්‍යන්තර රග්බි විනිසුරුවකු වන ඩිල්රෝයි ප්‍රනාන්දුගේ ප්‍රධානත්වයෙන් යුත් Agoal රග්බි ප්‍රවර්ධන ආයතනය.
(වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
