බලකණුවක් බවට පත්ව සිටි කුවේට් රාජ්‍යයේ Ahmad Al-Fahad Al-Sabah ෂෙඉක්වරයාට ඔහු දැරූ සියළුම ඔලිම්පික් තනතුරුවල වසර 15ක තහනමක් පනවා තිබෙනවා.
ඔලිම්පික් පාලකයන් විසින් ෂෙඉක්වරයාට මේ තහනම පනවා තිබෙන්නේ ආචාරධර්ම උල්ලංඝනය කිරීම හේතුවෙන්.
ස්විට්සලන්තයේ පැවති නඩු විභාගයක් සම්බන්ධයෙන් ෂෙඉක් අහමඩ් ට මේ තහනම පැනවීමේ තීරණය පිළිබඳව IOC අධ්‍යක්ෂ ජෙනරාල් Christophe De Kepper විසින් ජගත් ඔලිම්පික් කමිටුවේ විධායක මණ්ඩලයේ සියළුම සාමාජිකයන්ව ලිපියකින් දැනුවත් කර තිබෙනවා.
“ෂෙඉක් අහමඩ් ඔහුගේ IOC සාමාජික ප්‍රතිඥාව කඩ කිරීම මෙන්ම ජගත් ඔලිම්පික් කමිටුවේ කටයුතු අනතුරෙහි හෙළමින් කමිටුවේ කීර්තියට සිදු කළ හානියේ බරපතළකම ඇතුළුව සදාචාරමය ප්‍රතිපත්ති උල්ලංඝනය කර ඇති බවට ස්ථිර කිරීමට IOC විධායක මණ්ඩලය තීරණය කළා” යැයි De Kepper එම ලිපියෙන් කියනවා.
“ඒ අනුව ෂෙඉක් අහමඩ් අල්-සබා ඔහුගේ IOC සාමාජිකත්වයෙන් හිමිකර ගත් සියළුම අයිතීන්, වරප්‍රසාද සහ කටයුතු ඔහුට තහනම් කිරීමටත් එම තහනම IOC විධායක මණ්ඩලය විසින් 2023 ජූලි 27 වැනි දින ගත් සම්බාධක පැනවීමේ තීරණ දිනයේ සිට බලපැවැත්වෙන පරිදි වසර 15ක් යනතුරු ක්‍රියාත්මක කිරීමටත් තීරණය කර තිබෙනවා.”
ඛනිජ තෙල් අපනයනය කරන රටවල සංවිධානයේ (OPEC) හිටපු මහ ලේකම්වරයෙකු ද වන ෂෙඉක් අහමඩ් ව්‍යාජ ලේඛණ සෑදීම සහ ප්‍රයෝගකාරී විනිශ්චය ක්‍රියාපටිපාටියකට වරදකරු ලෙස 2021 වසරේදී ස්විට්සලන්ත උසාවියක් මගින් තීරණය කළා. එම තීරණය ජිනීවා නුවර ඇපැල් අධිකරණය විසින් ද පසුව අනුමත කර තිබුනා.
“එහි ප්‍රතිඵලයක් ලෙස, IOC ප්‍රතිපත්ති කොමිසම සලකන්නේ, ෂෙඉක් අහමඩ් අල්-සබාගේ පෞද්ගලික වාසියට සිදු කළ ප්‍රයෝගකාරී ක්‍රියාව IOC සාමාජිකයෙකුට ආචාර සම්පන්න නොවන බවටයි” එම කොමිසම ඔවුන්ගේ ලිපියෙන් කියා සිටිනවා.
පසුගිය වසරේදී IOC විධායක මණ්ඩලය විසින් ඔහුට පැනවූ තෙවසරක තහනමේ තීරණයට එරෙහිව තරග කිරීමෙන් ඔහු සාමාජිකයෙකු ලෙස දී තිබෙන ප්‍රතිඥාව කඩකර ඇතැයි ද එම ලිපියේ සඳහන් වනවා.
ආසියානු ඔලිම්පික් කවුන්සලයේ නිලවරණයට මැදිහත් වීම සම්බන්ධයෙන් ඔහුට 2023 වසරේදී තෙවසරක තහනමක් පනවනු ලැබුවා.
ව්‍යාජ ලිපි ලේඛණ සෑදීම සම්බන්ධයෙන් ස්විට්සලන්ත අපරාධ අධිකරණයක් විසින් 2021දී වරදකරු කිරීමෙන් පසුව ඔහුගේ IOC සාමාජිකත්වය අත්හිටුවනු ලැබූ අතර ඉන්පසුව ඔහු ආසියානු ඔලිම්පික් කවුන්සලයේ සභාපති ධූරයෙන් ඉවත් වුනා.
ක්‍රීඩා දේශපාලනයේ කලක් බලසම්පන්න පුද්ගලයෙකු බවට ෂෙඉක් අහමඩ් පත්ව සිටියේ ජගත් ඔලිම්පික් කමිටුවේ මෙන්ම ජගත් පාපන්දු සම්මේලනයේ ද ප්‍රබල තනතුරු හොබවමින්. ඔහු කුවේට් රාජ්‍යයේ ආරක්ෂක ඇමතිවරයා ලෙසින් ද පසුගිය වසරේ නම් කරනු ලැබුවා.
වර්තමාන IOC සභාපති Thomas Bach 2013 වසරේදී සභාපති තනතුරට තරග කළ අවස්ථාවේදී ඔහුගේ සමීපතම මිතුරෙකු ලෙස කටයුතු කළ ෂෙඉක් අහමඩ් ජාතික ඔලිම්පික් කමිටුවල සම්මේලනයේ ද මූලිකත්වය දැරුවා.
ක්‍රීඩක ක්‍රීඩිකාවන් සහ ජාතික ඔලිම්පික් කමිටුවලට මූල්‍ය ආධාර ලබා දෙන ඔලිම්පික් සහයෝගිතාවේ IOC මුදල් පසුම්බිය භාරව සිටියේත් මේ කුවේට් ෂෙඉක්වරයා ම යි.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com