ශ්‍රී ලංකා ක්‍රිකට් ආයතනය සහ කාගිල්ස් සමාගම අතර වසර 2027 දක්වා දිවෙන මේ හවුල ඊයේ ප්‍රකාශයට පත්කෙරුනේ කොළඹ කිංග්ස්බරි හෝටලයේදී.
RIDE යනු ශ්‍රී ලංකාවේ පෙරමුණේ සිටින දේශීයව නිෂ්පාදනය කරන ශක්තිජනක පානයක්. මෙය ශ්‍රී ලංකා ක්‍රිකට් ආයතනය සමග සම්බන්ධ වීමෙන් එහි ව්‍යාප්තිය වැඩිවන බවට කාගිල්ස් විශ්වාස කරනවා. 2020 වසරේ ප්‍රථම වරට නිෂ්පාදනය කෙරුනු මේ පානය දැන් නැවත ශක්තිමත් කර තිබෙන්නේ ‘නියම ශක්තිය’ – Real Energy - යන ලාංජන පොරොන්දුව යටතේ.
ශ්‍රී ලංකා ක්‍රිකට් කණ්ඩායමට ජාත්‍යන්තර වේදිකාවේ තිබෙන ශක්තිමත් තානාපති තත්ත්වය මාර්ගයෙන් ගෝලීය වෙළඳපොලට පිවිසීම කාගිල්ස් සමාගමේ අභිලාෂය වී තිබෙනවා. මේ සහයෝගීත්වය අනුග්‍රාහකත්වයකට වඩා ඔබ්බට යන බවත් එය ශක්තිය, කාර්ය සාධනය හා විශිෂ්ටත්වය සඳහා බෙදාගත් උද්යෝගයේ පියවරක් බවත් කාගිල්ස් පවසනවා.
ක්‍රිකට් සහ වෙළෙඳාම එක් කරමින් ඊයේ පැවති මේ උත්සවයට ශ්‍රී ලංකා ක්‍රිකට් ආයතනයේ සහකාර ලේකම් ක්‍රිශාන්ත කපුවත්ත, කාගිල්ස් සමාගමේ කළමනාකාර අධ්‍යක්ෂ අර්ජුන කුමාරසිංහ, වෙළෙඳ කලමනාකාරිනී අචිනි විජේකෝන් යන මහත්ම මහත්මීන් සහ ශ්‍රී ලංකා ටෙස්ට් ක්‍රිකට් නායක ධනංජය ද සිල්වා, ශ්‍රී ලංකා ODI සහ T20 නායක චරිත් අසලංක හා ශ්‍රී ලංකා කාන්තා ක්‍රිකට් නායිකා චමරි අතපත්තු සහභාගි වුනා.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com