සුදුසුකම් ලැබීමේ තරග සඳහා ශ්‍රී ලංකා කණ්ඩායම සහභාගි කරවීමට ශ්‍රී ලංකා පාපන්දු සම්මේලනය කටයුතු යෙදා තිබෙනවා.
ශ්‍රී ලංකා කණ්ඩායම මේ තරග සඳහා සූදානම් වූයේ අවුරුදු 23න් පහළ කණ්ඩායමේ ප්‍රධාන පුහුණුකරු කටාර් දේශයේ අහමඩ් අල්මන්නායිගේ අධීක්ෂණය යටතේ. කණ්ඩායම අද (23) දිවයිනෙන් පිටත්ව යාමට නියමිතව තිබුනා.
ශ්‍රී ලංකා පාපන්දු සම්මේලනය (FFSL) ඔවුන්ගේ දීර්ඝ කාලීන පාපන්දු සංවර්ධන සැලසුම්වල තවත් වැදගත් පියවරක් තබමින් ශ්‍රී ලංකා අවුරුදු 23න් පහළ යොවුන් ජාතික පාපන්දු කණ්ඩායමට ප්‍රධාන ජාත්‍යන්තර තරගාවලියන් දෙකකට සහභාගි වීමට වේදිකාව සකස් කර තිබෙනවා.
ඒ අනුව, සැප්තැම්බර් 1 සිට 11 දක්වා කසකස්තානයේ පැවැත්වෙන ආසියානු සුදුසුකම් ලබා ගැනීමේ තරගාවලියට අමතරව ශ්‍රී ලංකා කණ්ඩායම කටාර් හා සිරියාවේ අවුරුදු 23න් පහළ ජාතික කණ්ඩායම් සමග ද ජාත්‍යන්තර මිත්‍ර තරග දෙකක් ක්‍රීඩා කරනු ඇත්තේ ක්‍රීඩකයන්ගේ විදෙස් තරගවලට නිරාවරණය වීම තවත් ශක්තිමත් කරමින්.
මේ වැඩපිළිවෙල FFSL සභාපති ජස්වර් උමාර් මහතාගේ සංකල්පයේ කොටසක්. රටේ කණිෂ්ඨ ජාතික කණ්ඩායම්වලට ජාත්‍යන්තර තරග අවස්ථාවන් ලබා දීමේ වැදගත්කම ඒ මහතා දිගටම අවධාරණය කර තිබෙනවා. ඔහුගේ නායකත්වය යටතේ ශ්‍රී ලාංකේය පාපන්දුව දියුණුවේ නව යුගයක් දකිමින් සිටින්නේ ජ්‍යෙෂ්ඨ ජාතික කණ්ඩායම පසුගිය වසර දෙකේදී අත්කර ගත් සාර්ථකත්වය මත.
(සටහන | වර්නන් ගුණසේකර)ජ්‍යෙෂ්ඨ මාධ්‍යවේදී
gunasekera33@gmail.com
