2021 වසරේ පැවති අබුඩාබි T10 ක්‍රිකට් ලීගයේ තරග දූෂිත කිරීමට උත්සාහ කිරීම සම්බන්ධයෙනුයි ඔහුට චෝදනා එල්ල වී තිබෙන්නේ. තරග පාවාදීමට උත්සාහ කිරීම හා දූෂිත ක්‍රීඩාවක් වෙනුවෙන් මුදල් යෝජනා කිරීම ඇතුළු චෝදනා තුනකට සමන් වරදකරු බවට තහවුරු වී තිබෙනවා.
සාලිය සමන්
මේ චෝදනාවලට ඔහු වරදකරු බවට ජගත් ක්‍රිකට් කවුන්සලයේ දූෂණ විරෝධී අධිකරණ මණ්ඩලය ස්ථිර කර තිබෙන්නේ ඔහු එමිරේට්ස් ක්‍රිකට් මණ්ඩලයේ දූෂණ විරෝධී ව්‍යවස්ථාව උල්ලංඝනය කර ඇති බව තහවුරු කර ගැනීමෙන් පසුව.
මේ ව්‍යවස්ථාව කඩ කළ බවට 2023 වසරේ සැප්තැම්බරයේදී චෝදනා ලැබූ පුද්ගලයන් අට දෙනාගෙන් සමන් ද කෙනෙක්. ඔහුගේ පස් වසරක තහනම 2023 සැප්තැම්බර් 13 දක්වා පෙර දාතමක් යොදා තිබෙන්නේ ඔහුට තාවකාලික තහනමක් පැනවූයේ එදින බැවින්. මේ අනුව සමන් ඔහුගේ දඬුවමෙන් වසර දෙකක් දැනටමත් ගෙවා අවසන්.
39 හැවිරිදි සාලිය සමන් දේශීය ක්‍රිකට් පිටියේ පළමු-පෙල තරග 101ක් සහ ‘ඒ’ ලැයිස්තුවේ තරග 77ක් ක්‍රීඩා කර තිබෙනවා.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
