T20 හෝ සීමිත ඕවර ක්‍රිකට් ක්‍රීඩාවේ පළමු වතාවට මෙසේ සුපර් ඕවර ත්‍රිත්වයක් ක්‍රීඩා කර තිබෙන්නේ නෙදර්ලන්තය හා නේපාලය අතර පැවති විස්සයි20 ජාත්‍යන්තර තුන්කොන් තරගාවලියක තරගයේ.
මෙහිදී නෙදර්ලන්තය විසින් නේපාලය පරාජය කරනු ලැබූව ද ඒ සඳහා වාර්තාගත සුපර් ඕවර තුනක් අවශ්‍ය වුනා. කඩුලු 7කට ලකුණු 152ක් ලබා ගෙන සිටි නෙදර්ලන්ත කණ්ඩායම ජයග්‍රහණය බලාපොරොත්තුවෙන් සිටියේ නේපාලය ට අවසන් ඕවරයේදී ලකුණු 16ක් අවශ්‍යව තිබූ බැවින්.
නමුත් නන්දන් යාදව් අවසන් පන්දුවට හතරේ පහරක් එල්ල කිරීම නිසා තරගයට සුපර් ඕවරයක් දක්වා යාමට සිදුවුනා.
එම ඕවරයේදී නේපාලය ලකුණු 19ක් රැස් කළ අතර මැක්ස් ඔඩෝඩ් අවසන් පන්දුවට එල්ල කළ හයේ පහරට ස්තූතිවන්ත වන්නට නෙදර්ලන්තය එම ලකුණු සම කළා.
මේ අනුව ජාත්‍යන්තර පිරිමි ක්‍රිකට් ක්‍රීඩාවේ දෙවැනි වතාවට දෙවැනි සුපර් ඕවරයක් අවශ්‍ය වුනා. මෙවැනි සිදුවීමක් පළමු වතාවට වාර්තා වුනේ පසුගිය වසරේ ඉන්දියාව හා ඇෆ්ගනිස්තානය අතර පැවති තරගයේ.
පළමුව පන්දුවට පහර දුන් නෙදර්ලන්තය ලකුණු 17ක් ලබා ගත් අතර නේපාලය නැවතත් තරගයේ සිටියේ ඩිපෙන්ද්‍ර සිං අයිරී අවසන් පන්දුවට හයේ පහරක් එල්ල කළ නිසා. ඒ සමග ප්‍රථම වතාවට තෙවැනි සුපර් ඕවරකට යාමට සිදුවුනා.
එහිදී පෙර ක්‍රීඩා කළ ඕවර දෙකේ තිබූ තියුණු ක්‍රීඩාව දිස් නොවුනේ නේපාලය එකම ලකුණක් හෝ ලබා ගැනීමට අසමත් වෙමින් නෙදර්ලන්තය ට එක ලකුණක් පමණක් අවශ්‍ය වූ බැවින්.
මයිකල් ලෙවිට් හයේ පහරක් එල්ල කරමින් අවසානයේ නෙදර්ලන්තයේ ජයග්‍රහණය තහවුරු කළා.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com