ඉතාලියේ සාම්ප්‍රදායික සූපශාස්ත්‍රය යනු දැඩි නීතිරීති සහ සංස්කෘතික ගෞරවය මත පදනම් වූවකි. නිවර්තන පලතුරක් වන අන්නාසි සාම්ප්‍රදායික පීසාවකට එක්කිරීම ඉතාලි ජාතිකයන් සලකන්නේ සිය උරුමයට කෙරෙන විකෘතියක් ලෙසයි.
මේ සූපවේදී ප්‍රතිපත්තිය නිසා ඔස්ට්‍රේලියාවේ බ්‍රිස්බේන් නුවර පිහිටි 'ලා කොස්තා' (La Costa) සුඛෝපභෝගී ඉතාලි අවන්හලේ ප්‍රධාන සූපවේදී ඩේවිඩ් ටැම්බුරෙල්ලාට (Davide Tamburella) සිය රැකියාව අහිමිවීමේ සිදුවීමක් එරට සාධාරණ වැඩ කොමිසමෙන් (Fair Work Commission) වාර්තා වේ.
ඩොලර් 15,000ක ඕඩරය හමුවේ මතුවූ ගැටුම
අදාළ අවන්හලට පැමිණි විශේෂ උත්සවයකදී පාරිභෝගිකයෙකු ඕස්ට්‍රේලියානුවන් අතර ජනප්‍රිය 'හැම් සහ අන්නාසි' සහිත පීසා වර්ගයක් (Hawaiian Pizza) ඇණවුම් කර ඇත්තේ සමස්ත බිල්පත ඩොලර් 15,000 ඉක්මවූ පසුබිමකය.
අවන්හල් හිමිකරු එලියට් ඉන්ග්‍රම් (Elliot Ingram) එම පීසා සකසන ලෙස සූපවේදියාට උපදෙස් ලබාදුන්නද, ටැම්බුරෙල්ලා එය සෘජුවම ප්‍රතික්ෂේප කළේය. පීසා මත අන්නාසි තැබීම තම ජාතික සංස්කෘතියට කරන නිග්‍රහයක් බව පවසමින් ඔහු එම ඉල්ලීම බැහැර කර ඇත්තේ තුන්වන වතාවටයි.
අන්නාසි වගාව සඳහා පවා දැවැන්ත ස්මාරක ඉදිකර ඇති ක්වීන්ස්ලන්ත ප්‍රාන්තයේදී, පාරිභෝගික ඉල්ලුම නොසලකා හැරීම ව්‍යාපාරික පැවැත්මට තර්ජනයක් බව අවන්හල් හිමිකරුගේ ස්ථාවරය විය.
ව්‍යාපාරික පාඩුව සහ ස්ථිර වීසා සිහිනය බිඳවැටීම
ආගන්තුක සත්කාරක ක්ෂේත්‍රයේ වසර 17ක පළපුරුද්දක් ඇති හිමිකරු පෙන්වා දෙන්නේ, තමන්ගේ පෞද්ගලික රුචිකත්වය නොවුණද පාරිභෝගිකයාගේ තේරීමට ගරු කිරීම ව්‍යාපාරයක මූලික අවශ්‍යතාවක් බවයි. සේවායෝජකයාගේ උපදෙස් කඩකිරීම මත ටැම්බුරෙල්ලාගේ සේවය අවසන් කිරීමට අවන්හල් පාලනාධිකාරිය තීරණය කළේය.
මෙම නෙරපාහැරීම හේතුවෙන් ටැම්බුරෙල්ලාගේ ඔස්ට්‍රේලියානු ස්ථිර පදිංචිය (PR) අහිමිවීමේ දැඩි අවදානමක් මතුවිය. ඔහු වසර තුනකට වැඩි කාලයක් බලා සිටි 186 කාණ්ඩයේ සේවායෝජක අනුග්‍රාහක වීසා ක්‍රියාවලියද (Employer Nomination Scheme) රැකියාව අහිමිවීමත් සමඟ අතරමග ඇණහිට තිබේ.
සාධාරණ වැඩ කොමිසමේ නඩු තීන්දුව
තමන් අසාධාරණ ලෙස සේවයෙන් පහකළ බව පවසමින් ටැම්බුරෙල්ලා ඕස්ට්‍රේලියාවේ සාධාරණ වැඩ කොමිසම හමුවේ පෙත්සමක් ගොනු කළේය. සේවා ස්ථානයේදී සිදුවූ අතෙහි අස්ථි බිඳීමක් මුල්කරගෙන තමන්ව නෙරපා හැරි බවටද ඔහු තර්ක කළේය.
නඩු විභාගය මෙහෙයවූ කොමසාරිස් ජෙනිෆර් හන්ට් (Jennifer Hunt) ප්‍රකාශ කළේ, අදාළ නීතිමය ඉල්ලුම්පත නියමිත කාලසීමාව ඉක්මවා ප්‍රමාද වී ඉදිරිපත් කර ඇති බවයි. ප්‍රමාදයට සාධාරණ හේතුවක් පෙන්වාදීමට සේවක පාර්ශ්වය අපොහොසත් වීම නිසා පෙත්සම විභාගයට නොගෙන නිෂ්ප්‍රභ කෙරිණි.
අධික නඩත්තු වියදම් හමුවේ අදාළ අවන්හල පසුගිය ජූලි මාසයේදී වසා දමා ඇති අතර, ටැම්බුරෙල්ලා මේ වන විට වෙනත් ඉතාලි අවන්හලක ප්‍රධාන සූපවේදියා ලෙස කටයුතු කරයි. එම නව අවන්හලේ ආහාර ලැයිස්තුවේ අන්නාසි කිසිසේත්ම අඩංගු නොවේ.
වැඩිදුර තොරතුරු ඇතුළත් විශ්වාසනීය මූලාශ්‍ර සබැඳි :