හිටපු අධිකරණ අමාත්‍ය ආචාර්ය විජයදාස රාජපක්ෂ මහතාගේ පුත්‍රයෙකු වන නීතිඥ රඛිත රාජපක්ෂ මහතා සතු බැංකු ගිණුම් හතරක් සහ මෝටර් රථ තුනක් ලබන වසරේ පෙබරවාරි 05 වැනිදා දක්වා අත්හිටුවීමට කොළඹ මහාධිකරණය නියෝග කර තිබේ.
අල්ලස් හෝ දූෂණ චෝදනා විමර්ශන කොමිෂන් සභාව කළ කරුණු දැක්වීමක් සලකා බැලීමෙන් අනතුරුව, මහාධිකරණ විනිසුරුවරයා විසින් මෙම නියෝගය ප්‍රකාශයට පත් කරන ලදී.
කෝටි 12ක අල්ලස් ගනුදෙනුව
දැනට බන්ධනාගාරගතව සිටින සංවිධානාත්මක අපරාධකරුවෙකු මෙන්ම මත්ද්‍රව්‍ය ජාවාරම්කරුවෙකු ලෙස සැලකෙන ‘හරක් කටා’ හෙවත් නඳුන් චින්තක වික්‍රමරත්නගේ ආරක්ෂාව තහවුරු කිරීම සහ ආරක්ෂිත බන්ධනාගාරයකට මාරු කිරීම වෙනුවෙන් මෙම අල්ලස ඉල්ලා ඇති බවට චෝදනා එල්ල වී ඇත.
එම කටයුතු වෙනුවෙන් ඔහුගේ බිරිඳගෙන් ඩුබායිහිදී රුපියල් කෝටි 12ක (රුපියල් ලක්ෂ 1,200ක) මුදලක් ලබාගත් බව කියන සිද්ධියක් සම්බන්ධයෙන් අල්ලස් කොමිසම පුළුල් විමර්ශනයක් අරඹා තිබේ.
මෙම නඩුවේ පළමු සැකකරු ලෙස චරිත අබේසිංහ, දෙවන සැකකරු ලෙස නීතිඥ රඛිත රාජපක්ෂ සහ තෙවන සැකකරු ලෙස වරුණ හැන්දිගේ අරුණ චතුරංග යන අය නම් කර ඇති අතර, ඔවුන් මීට පෙර රක්ෂිත බන්ධනාගාරගතව සිට මේ වන විට ඇප මත මුදාහැර සිටියි.
නව දේපළ පනතේ බලතල
අල්ලස් කොමිසමේ සහකාර අධ්‍යක්ෂ ජනරාල්වරිය අධිකරණය හමුවේ කරුණු දක්වමින් පෙන්වා දුන්නේ, '2025 අංක 5 දරන අපරාධයකින් උත්පාදිත දේපළ පිළිබඳ පනත' ප්‍රකාරව මෙම විමර්ශනය ක්‍රියාත්මක වන බවයි.
අදාළ පනතට අනුව, යම් දේපළක් අපරාධයකින් උපයාගත් බවට සැක කෙරේ නම්, කොමිසමට දින 7ක කාලයකට එම දේපළ අත්හිටුවීමේ බලය හිමිවේ. එම කාලසීමාව තුළ මහාධිකරණය හමුවට කරුණු වාර්තා කර දීර්ඝ කාලීන නියෝගයක් ලබාගත යුතුය.
ඒ අනුව පසුගිය ඔක්තෝබර් අගභාගයේදී අල්ලස් කොමිසම පැනවූ අත්හිටුවීම තහවුරු කරමින්, පනතේ 75 වැනි වගන්තිය යටතේ මාස තුනක කාලසීමාවක් සඳහා අදාළ දේපළ අක්‍රිය කර තැබීමේ නියෝගයක් නිකුත් කරන ලෙස කොමිසම ඉල්ලා සිටියේය.
විත්තියේ විරෝධය සහ අධිකරණ තීන්දුව
නීතිඥ රඛිත රාජපක්ෂ මහතා වෙනුවෙන් පෙනී සිටි නීතිඥ චමින්ද අතුකෝරළ මහතා අධිකරණයට ප්‍රකාශ කළේ, අදාළ බැංකු ගිණුම් සහ වාහන අපරාධයකින් උපයාගත් බවට සනාථ වන කිසිදු ප්‍රමාණවත් සාක්ෂියක් මෙතෙක් අධිකරණයට ඉදිරිපත් කර නොමැති බවයි. එමෙන්ම අදාළ ගිණුම් මෙම සිදුවීමට බොහෝ කලකට පෙර විවෘත කරන ලද ඒවා බවද ඔහු පෙන්වා දුන්නේය.
දෙපාර්ශ්වයේ කරුණු විමසා බැලූ විනිසුරුවරයා තීන්දු කළේ, අපරාධයකින් උත්පාදිත දේපළ පිළිබඳ පනතේ විධිවිධාන යටතේ විමර්ශනයක් පවතින අවස්ථාවක මෙවැනි අක්‍රිය කිරීමේ නියෝගයක් නිකුත් කිරීමට අධිකරණයට පූර්ණ බලය පවතින බවයි.
ඒ අනුව ලබන පෙබරවාරි 05 වැනිදා දක්වා අදාළ බැංකු ගිණුම් 4 සහ වාහන 3 අක්‍රිය කරන ලෙස නියෝග කළ අධිකරණය, ඒ සම්බන්ධයෙන් අදාළ වාණිජ බැංකු වෙත සහ මෝටර් රථ ප්‍රවාහන කොමසාරිස් ජනරාල්වරයා වෙත විධිමත් සංරක්ෂණ නිවේදන යොමු කිරීමටද පියවර ගත්තේය.