අඩ සියවසක නීත්‍යානුකූල බදු පදනම සහ සංචාරක සන්නාමය ආරක්ෂා කරගැනීමට අවන්හල් පාලනාධිකාරිය අධිකරණය හමුවට
කොළඹ වැල්ලවත්ත මුහුදු තීරයේ පිහිටි දේශීය මෙන්ම ජාත්‍යන්තර වශයෙන් දැඩි ප්‍රසිද්ධියක් උසුලන "බීච් වාඩිය" (Beach Wadiya) අවන්හල අනවසර ඉදිකිරීමක් ලෙස සලකා කඩා ඉවත් කිරීමට වෙරළ සංරක්ෂණ හා වෙරළ සම්පත් කළමනාකරණ දෙපාර්තමේන්තුව නිකුත් කර තිබූ නොතීසිය ක්‍රියාත්මක කිරීම වළක්වාලමින් අභියාචනාධිකරණය අතුරු තහනම් නියෝගයක් නිකුත් කර තිබේ. මෙම වාරණ නියෝගය එළඹෙන සැප්තැම්බර් මස 21 වනදා දක්වා බලපැවැත්වේ.
අදාළ අවන්හල පවත්වාගෙන යනු ලබන බීච් වාඩිය පෞද්ගලික සමාගම (Beach Wadiya (Pvt.) Ltd.) විසින් සිය නීතිඥ සංජීව කළුආරච්චි මාර්ගයෙන් ගොනුකළ රිට් පෙත්සමක් සලකා බැලීමෙන් අනතුරුව අධිකරණය විසින් මෙම තීරණය ලබාදී ඇත. පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ ෆයිසර් මුස්තාපා සමග නීතිඥ පුලස්ති රූපසිංහ සහ නිමන්ත චන්ද්‍රසේන අධිකරණය හමුවේ කරුණු තහවුරු කළහ.
අඩ සියවසක නීත්‍යානුකූල හිමිකම පිළිබඳ කරුණු දැක්වීම
1981 අංක 57 දරන වෙරළ සංරක්ෂණ හා වෙරළ සම්පත් කළමනාකරණ පනතේ 31(2) වගන්තිය යටතේ පසුගිය සැප්තැම්බර් 07 වනදා වෙරළ සංරක්ෂණ අධ්‍යක්ෂ ජනරාල් මහාචාර්ය පී.බී. ටර්නි ප්‍රදීප් කුමාර විසින් මෙම ඉවත් කිරීමේ නියෝගය නිකුත් කර තිබිණි. එමඟින් දින තුනක් ඇතුළත අදාළ ඉදිකිරීම් ඉවත් කරගන්නා ලෙස දැනුම් දී තිබූ අතර, ඊට එරෙහිව පරිසර අමාත්‍යාංශයේ ලේකම්වරයා වෙත අභියාචනයක් ඉදිරිපත් කිරීමට දින තුනක කාලයක් ලබා දී තිබුණි.
කෙසේවෙතත්, බම්බලපිටියේ සිට දෙහිවල දක්වා වූ වෙරළ තීරයේ අනවසර ඉදිකිරීම් ඉවත් කිරීමේ රාජ්‍ය මෙහෙයුම යටතේ නීත්‍යානුකූල අභියාචනය සලකා බැලීමට පෙර තම ව්‍යාපාරික ස්ථානය කඩා බිඳ දැමීමේ දැඩි අවදානමක් පවතින බව පෙන්වා දෙමින් පෙත්සම්කරුවන් අභියාචනාධිකරණයේ මැදිහත්වීම ඉල්ලා සිටියේය.
නීතිඥවරුන් අධිකරණයට පෙන්වා දුන්නේ මෙම අවන්හල අනවසර ඉදිකිරීමක් නොවන බවත්, එය 1973 වසරේදී ඔල්වින් වීරසේකර විසින් ආරම්භ කර පසුව දුම්රිය දෙපාර්තමේන්තුවෙන් නීත්‍යානුකූලව ලබාගත් බදු ගිවිසුම් මත අඛණ්ඩව පවත්වාගෙන යන්නක් බවත්ය. වත්මන් බදු ගිවිසුම 2029 වසර දක්වා වලංගුව පවතින බවද, කොළඹ මහ නගර සභාවේ ගොඩනැගිලි අනුමැතිය සහ 2026 වසර සඳහා වලංගු වෙළඳ බලපත්‍ර මෙන්ම රාජ්‍ය බදු නිසි පරිදි ගෙවමින් පවත්වාගෙන යන ස්ථානයක් බවද ලේඛන මඟින් තහවුරු කර තිබේ.
ශ්‍රී ලාංකේය සංචාරක ක්ෂේත්‍රයට එක් කළ ජාත්‍යන්තර කීර්තිය
සාමාන්‍ය වෙරළබඩ ආපනශාලාවකට එහා ගිය සුවිශේෂී සන්නාමයක් හිමි "බීච් වාඩිය", මෙරට මුහුදු ආහාර සංස්කෘතිය ලොව පුරා ප්‍රචලිත කිරීමෙහිලා පුරෝගාමී මෙහෙවරක් ඉටුකළ ස්ථානයකි. බ්‍රිතාන්‍යයේ ඈන් කුමරිය, කෝටිපති ව්‍යාපාරික රිචඩ් බ්‍රැන්සන්, නේපාල රාජකීය පවුලේ සාමාජිකයන්, ලෝක ප්‍රකට ඉන්දීය ගායන ශිල්පිනී අශා බෝස්ලේ මෙන්ම සුනිල් ගවස්කාර්, ක්ලයිව් ලොයිඩ්, මයිකල් හෝල්ඩින්ග්, ටෝනි ග්‍රේග් සහ සචින් තෙන්ඩුල්කාර් වැනි ප්‍රවීණ ක්‍රිකට් තරු මෙහි ආගන්තුක සත්කාර අත්විඳ ඇත්තන් අතර වේ.
එමෙන්ම මෙරට ප්‍රවීණ සිනමාවේදී ආචාර්ය ලෙස්ටර් ජේම්ස් පීරිස් සහ ප්‍රකට ලේඛක කාල් මුලර් වැනි කලාකරුවන්ගේ නිර්මාණ කාර්යයන් සඳහා ආශ්වාදයක් ලබාදුන් ස්ථානයක් ලෙසද මෙය සැලකේ. 2004 සුනාමි ව්‍යසනයෙන් පවා ගොඩනැගිලි ව්‍යුහය සුරක්ෂිතව පැවති මෙම පවුලේ ව්‍යාපාරය, අදාළ වෙරළ සංරක්ෂණ පනත බලාත්මක වූ 1983 ඔක්තෝබර් 01 වන දිනට පෙර සිටම පැවති එකක් බැවින් පනතේ අදාළ වගන්ති යටතේ මෙය අනවසර ඉදිකිරීමක් ලෙස සැලකිය නොහැකි බව පෙත්සම්කාර පාර්ශ්වයේ ප්‍රධාන නෛතික තර්කය වී තිබේ.
ඉදිරි නීතිමය ක්‍රියාමාර්ග
වෙරළ සංරක්ෂණ අධ්‍යක්ෂ ජනරාල්වරයා, පරිසර අමාත්‍ය වෛද්‍ය ධම්මික පටබැඳි සහ අමාත්‍යාංශ ලේකම් කේ.ආර්. උඩුවාවල මෙම පෙත්සමේ වගඋත්තරකරුවන් ලෙස නම් කර ඇත.
පෙත්සම මඟින් ඉල්ලා ඇති පරිදි, නීත්‍යානුකූල පදනමකින් තොරව නිකුත් කර ඇති ඉවත් කිරීමේ නොතීසිය අහෝසි කරන සෙල්සියොරාරි (Certiorari) ආඥාවක් සහ අභියාචනය පිළිබඳ ස්වාධීන පරීක්ෂණයක් පවත්වා තීන්දුවක් ලබා දෙන තෙක් පරිශ්‍රයට හානි කිරීම වැළැක්වීමේ තහනම් නියෝගයක් ලබාගැනීම පෙත්සම්කරුවන්ගේ අපේක්ෂාවයි. ඒ අනුව, අධිකරණය විසින් නිකුත් කරන ලද මෙම අතුරු තහනම් නියෝගය හේතුවෙන් අදාළ නීතිමය ක්‍රියාවලිය විභාග වන තෙක් අවන්හල කඩා ඉවත් කිරීමේ මෙහෙයුම තාවකාලිකව අත්හිටුවීමට බලධාරීන්ට සිදුව ඇත.
