ශ්‍රී ලංකාවේ ප්‍රමුඛතම ව්‍යාපාරික සමූහයක් වන LOLC Holdings PLC ආයතනයේ 'දිවි සවිය' (LOLC Divi Saviya) ප්‍රජා සත්කාරක වැඩපිළිවෙළ, ජාත්‍යන්තරයේ ඉහළම ඇගයීමට ලක්වෙමින් බ්‍රිතාන්‍යයේ "International CSR Excellence Award 2026" සම්මානයෙන් පිදුම් ලබා ඇත.
ලන්ඩනයේ ඓතිහාසික ශාන්ත පාවුළු ආසන දෙව්මැදුරේ (St. Paul’s Cathedral) පැවැති උත්කර්ෂවත් උළෙලකදී බ්‍රිතාන්‍යයේ Green Organisation හි අනුබද්ධිත ආයතනයක් වන The CSR Society මඟින් මෙම සම්මානය පිරිනමා තිබේ.
වත්මන් ගෝලීය ආයෝජන ප්‍රවණතාවන් තුළ ව්‍යාපාරයක සාර්ථකත්වය මනින්නේ මූල්‍ය ලාභයෙන් පමණක් නොවේ. පාරිසරික, සමාජයීය සහ යහපාලන (ESG - Environmental, Social, and Governance) ප්‍රමිතීන් එම ව්‍යාපාරය කොතරම් දුරට රකිනවාද යන්න ලෝකයම විමසිල්ලෙන් පසුවෙයි. ශ්‍රී ලංකාව දැඩි ආර්ථික සහ කාලගුණික අර්බුදවලට මුහුණ දුන් වටපිටාවක, පෞද්ගලික අංශයේ මැදිහත් වීමෙන් මෙරට ප්‍රජාව ශක්තිමත් කිරීමට LOLC දියත් කළ මෙම ව්‍යාපෘතිය ගෝලීය මට්ටමින් ඇගයීමට ලක්වීම, සමස්ත ශ්‍රී ලාංකීය ව්‍යාපාරික ක්ෂේත්‍රයටම ජාත්‍යන්තර වේදිකාවේ ලැබුණු සාධනීය සහතික කිරීමකි.
'දිවි සවිය' ක්‍රියාත්මක වූ ප්‍රධාන අදියර 3
සාමාන්‍ය පරිත්‍යාගශීලී වැඩසටහන් මෙන් නොව, මෙම ව්‍යාපෘතිය අර්බුද කළමනාකරණය ඉලක්ක කරගනිමින් ව්‍යුහාත්මකව (Structured Interventions) ක්‍රියාත්මක වූ ආකාරය ආර්ථික විශ්ලේෂකයන් පෙන්වා දෙන්නේ මෙසේය.
පළමු අදියර (ආහාර සුරක්ෂිතතාව):
2022 ආර්ථික අර්බුදය සහ අධික උද්ධමනය හමුවේ පීඩාවට පත් දිස්ත්‍රික්ක 25කම වෙසෙන අඩු ආදායම්ලාභී පවුල් 150,000ක් සඳහා වියළි සලාක පැකේජ බෙදාදෙමින් ක්ෂණික සහන සැලසීම.
දෙවැනි අදියර (අධ්‍යාපන සුරක්ෂිතතාව):
ආර්ථික අපහසුතා මැද දරුවන්ගේ පාසල් ගමන නතරවීම වැළැක්වීම සඳහා දිවයින පුරා පාසල් 4,000කට අධික ප්‍රමාණයකට අත්‍යවශ්‍ය පොත්පත් සහ ලිපිද්‍රව්‍ය ලබාදීම. මෙය ශ්‍රී ලංකාවේ සමස්ත පාසල් පද්ධතියෙන් 40%ක ප්‍රතිශතයක් ආවරණය කිරීමකි.
තුන්වැනි අදියර (ආපදා පුනරුත්ථාපනය):
2025 වසරේ ඇතිවූ 'ඩිට්වා' (Ditwah) සුළි කුණාටුවෙන් පීඩාවට පත් පවුල් නඩත්තු කිරීම සහ දිස්ත්‍රික්ක 6ක හානියට පත් පාසල් 200ක යටිතල පහසුකම් නැවත ගොඩනැඟීම.
ආර්ථික විචාරකයන් පෙන්වා දෙන පරිදි, LOLC ආයතනයේ මෙම CSR උපායමාර්ගය සාම්ප්‍රදායික "පුණ්‍ය කර්ම" (Philanthropy) රටාවෙන් බැහැර වූවකි. රජයකට පමණක් තනිවම සියලු සමාජ අවශ්‍යතා සපුරාලීමට නොහැකි මෙවැනි අසීරු කාල වකවානුවක, ජාතික ප්‍රමුඛතාවලට (National Priorities) අනුකූලව ආහාර සුරක්ෂිතතාව, අධ්‍යාපනය සහ ආපදා කළමනාකරණය වැනි සංවේදී ක්ෂේත්‍රයන්ට පෞද්ගලික අංශය ක්‍රමවත්ව දායක වීම අගය කළ යුතුය.
මෙවැනි මහා පරිමාණ තිරසාර ව්‍යාපෘති හරහා ශ්‍රී ලාංකීය සමාගම්වලට ජාත්‍යන්තර ආයෝජකයන්ගේ විශ්වාසය මෙන්ම ආයතනික කීර්ති නාමය (Corporate Reputation) ද උපරිම මට්ටමකින් සුරක්ෂිත කරගත හැකි බව විශ්ලේෂකයෝ වැඩිදුරටත් පවසති.
(සටහන | සම්පත් ධීරසේකර)
මුලාශ්‍රය :
LOLC’s Global CSR Triumph Highlights Growing Social Impact Legacy
