රාජ්‍ය - පෞද්ගලික හවුල්කාරීත්වය දිරිගන්වමින් ආයෝජන මණ්ඩලයෙන් (BOI) ධනාත්මක ප්‍රතිචාරයක්
ආයෝජන සහ මූල්‍ය වර්ධනය සඳහා නව වේදිකාවක්
ශ්‍රී ලංකාවේ ආර්ථික වර්ධනය, ආයෝජන ප්‍රවර්ධනය සහ මූල්‍ය සාක්ෂරතාව නංවාලීමේ අරමුණින් සංවිධානය කෙරෙන ‘MOBIZ Expo 2026’ ජාත්‍යන්තර ආයෝජන, මූල්‍ය සහ ව්‍යාපාරික වර්ධන ප්‍රදර්ශනය එළඹෙන ඔක්තෝබර් මස 09 වැනිදා සිට 11 වැනිදා දක්වා කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේදී (BMICH) පැවැත්වීමට නියමිතය.
දේශීය සහ විදේශීය ආයෝජකයින්, රාජ්‍ය ආයතන, මූල්‍ය ආයතන, ව්‍යවසායකයින්, සුළු හා මධ්‍ය පරිමාණ ව්‍යාපාරිකයින් (SMEs), ආරම්භක ව්‍යාපාර (Startups) මෙන්ම ප්‍රමුඛ පෙළේ පෞද්ගලික අංශයේ ආයතන එකම ජාලයක් යටතට ගෙන ඒම මෙම සමුළුවේ ප්‍රධාන අරමුණ වී තිබේ.
රාජ්‍ය සහ පෞද්ගලික අංශයේ ඒකාබද්ධතාව (PPP)
වත්මන් ආර්ථික තත්ත්වය හමුවේ රාජ්‍ය සහ පෞද්ගලික අංශයේ හවුල්කාරීත්ව (Public-Private Partnerships - PPP) සංකල්පය රජය විසින් සක්‍රීයව ප්‍රවර්ධනය කරමින් පවතින පසුබිමක, මෙම ජාත්‍යන්තර ප්‍රදර්ශනය සඳහා රජයේ අනුග්‍රහය සහ සහභාගීත්වය අතිශය තීරණාත්මක සාධකයක් බව සංවිධායකයෝ පෙන්වා දෙති.
ශ්‍රී ලංකාව සතු නව ආයෝජන අවස්ථා ලෝකයට විවර කර දීමටත්, ප්‍රතිපත්ති සම්පාදකයින් සහ ආයෝජකයින් අතර ඍජු සබඳතා ගොඩනැගීම හරහා ආයෝජක විශ්වාසය තහවුරු කිරීමටත් මෙම ප්‍රදර්ශනය කදිම තෝතැන්නක් වනු ඇත.
MOBIZ Expo 2026 ජාත්‍යන්තර ප්‍රදර්ශනය පිළිබඳ ප්‍රධාන තොරතුරු
| * පැවැත්වෙන දිනයන්: 2026 ඔක්තෝබර් 09 සිට 11 දක්වා
| * ස්ථානය: බණ්ඩාරනායක ජාත්‍යන්තර සම්මන්ත්‍රණ ශාලාව (BMICH), කොළඹ
| * මූලික අරමුණු: විදේශීය ආයෝජන ආකර්ෂණය, සුළු හා මධ්‍ය පරිමාණ ව්‍යාපාර සවිබල ගැන්වීම සහ මූල්‍ය සාක්ෂරතාව ඉහළ නැංවීම
| * ඉලක්කගත පාර්ශ්ව: ආයෝජකයින්, රාජ්‍ය හා මූල්‍ය ආයතන, ප්‍රතිපත්ති සම්පාදකයින් සහ පෞද්ගලික අංශයේ ව්‍යවසායකයින්
විධිමත්ව ආර්ථිකය තුළට නව ආයෝජන ගලා ඒම දිරිගන්වමින්, මෙරට ව්‍යාපාරික ක්ෂේත්‍රයේ පුළුල් ප්‍රසාරණයක් ඇති කිරීම සඳහා රජය සහ පෞද්ගලික අංශය අතර සහයෝගීතාව වර්ධනය කිරීමට මෙම ජාත්‍යන්තර ප්‍රදර්ශනය සුවිශේෂී කාර්යභාරයක් ඉටු කරනු ඇතැයි අපේක්ෂා කෙරේ.
