*කෘෂි අගයදාමය නංවන්න කුඩා හා මධ්‍ය පරිමාණ ව්‍යවසායකයින්ට විශේෂ SME මණ්ඩපයක්
ශ්‍රී ලංකාවේ ආහාර, පාන සහ කෘෂි සැකසුම් ක්ෂේත්‍රයේ ප්‍රමුඛතම වාර්ෂික වෙළඳ ප්‍රදර්ශනය වන ‘Pro Food - Pro Pack - Ag Biz and Knowledge Hub 2026’ ප්‍රදර්ශනය කොළඹ බණ්ඩාරනායක ජාත්‍යන්තර සම්මන්ත්‍රණ ශාලා (BMICH) පරිශ්‍රයේදී ආරම්භ විය.
ශ්‍රී ලංකා ආහාර ඇසුරුම්කරුවන්ගේ සංගමය (SLFPA) සහ කර්මාන්ත සහ ව්‍යවසායකත්ව සංවර්ධන අමාත්‍යාංශය ඒකාබද්ධව සංවිධානය කරනු ලබන මෙම ප්‍රදර්ශනය මෙවර පැවැත්වෙන්නේ 23 වැනි වරටයි. අගෝස්තු 21, 22 සහ 23 යන තෙදින පුරා පැවැත්වෙන මෙම ප්‍රදර්ශනය සඳහා මෙරට ප්‍රමුඛ පෙළේ සමාගම්වලට අමතරව චීනය, ඉන්දියාව සහ ජර්මනිය ඇතුළු රටවල් ගණනාවක් නියෝජනය වන පරිදි ප්‍රදර්ශන කුටි 450කට අධික සංඛ්‍යාවක් එක්ව තිබේ.
B2B සහ B2C සම්බන්ධීකරණයට පුළුල් වේදිකාවක්
මෙම ප්‍රදර්ශනය හරහා පාරිභෝගිකයින්ට සෘජුවම නිෂ්පාදන මිලදී ගැනීමේ (B2C) අවස්ථාව හිමිවන අතරම, කර්මාන්තකරුවන් අතර ව්‍යාපාරික සබඳතා ගොඩනැංවීම (B2B) මූලික අරමුණක් කරගෙන ඇත. ආහාර සකස් කරන්නන්, ඇසුරුම්කරණ තාක්ෂණික විශේෂඥයින්, අපනයනකරුවන්, තොග හා සිල්ලර වෙළෙඳුන් මෙන්ම ක්ෂේත්‍රයේ ආයෝජකයින් අතර ජාලගත සබඳතා පුළුල් කරමින් දේශීය නිෂ්පාදන ජාත්‍යන්තර ප්‍රමිතීන්ට අනුව ඉහළ නැංවීමට අවශ්‍ය තාක්ෂණික දැනුම හුවමාරු කරගැනීම මෙහිදී ප්‍රධාන වශයෙන් සිදුවේ.
නූතන ගෝලීය වෙළඳපොළේ පවතින ඉල්ලුමට සරිලන පරිදි නවීන ඇසුරුම්කරණ විසඳුම්, ස්වයංක්‍රීය යන්ත්‍රෝපකරණ, තත්ත්ව පාලන ක්‍රමවේද සහ තිරසර ආහාර සුරක්ෂිතතා ප්‍රමිතීන් පිළිබඳවද ප්‍රදර්ශනය තුළ විශේෂ අවධානයක් යොමු කර තිබීම කැපී පෙනේ.
කුඩා හා මධ්‍ය පරිමාණ ව්‍යවසායකයින්ට විශේෂ අවස්ථාවක්
මෙවර ප්‍රදර්ශනයේ විශේෂත්වයක් වන්නේ කර්මාන්ත සහ ව්‍යවසායකත්ව සංවර්ධන අමාත්‍යාංශය මැදිහත් වෙමින් දිවයින පුරා විසිරී සිටින කුඩා හා මධ්‍ය පරිමාණ ආහාර සැකසුම්කරුවන් (SMEs) වෙනුවෙන් වෙනම ‘SME මණ්ඩපයක්’ ස්ථාපිත කර තිබීමයි. එමඟින් ග්‍රාමීය මට්ටමේ ව්‍යවසායකයින්ට සිය නවෝත්පාදන ප්‍රදර්ශනය කිරීමටත්, මහා පරිමාණ ගැනුම්කරුවන් හා අපනයනකරුවන් සමඟ සෘජුව සම්බන්ධ වීමටත් ප්‍රායෝගික ඉඩකඩක් නිර්මාණය වී ඇත.
කෘෂිකාර්මික අස්වැන්න අපතේ යාම අවම කර ගනිමින්, අගය එකතු කළ නිෂ්පාදන (Value-added products) ලෙස ගෝලීය වෙළඳපොළට ඉදිරිපත් කිරීමේ හැකියාව සහ ඒ සඳහා අවශ්‍ය පරිසර හිතකාමී ඇසුරුම් තාක්ෂණයන් හඳුන්වා දීම මෙම ප්‍රදර්ශනයේ ප්‍රධාන තේමාවන් අතර වේ.
නිල සමාරම්භය
ප්‍රදර්ශනයේ සමාරම්භක අවස්ථාවට කර්මාන්ත සහ ව්‍යවසායකත්ව සංවර්ධන අමාත්‍යාංශයේ ලේකම් තිලකා ජයසුන්දර, අතිරේක ලේකම් එස්.ඩබ්ලිව්.සී. ජයමිණී, ශ්‍රී ලංකා ආහාර ඇසුරුම්කරුවන්ගේ සංගමයේ සභාපති අරුණ සේනානායක ඇතුළු රාජ්‍ය හා පෞද්ගලික අංශයේ ක්ෂේත්‍ර නියෝජිතයින් සහ ව්‍යවසායකයින් පිරිසක් එක්ව සිටියහ.
කොළඹ සිරිමාවෝ බණ්ඩාරනායක ප්‍රදර්ශන ශාලා පරිශ්‍රයේදී පැවැත්වෙන මෙම ප්‍රදර්ශනය අගෝස්තු 23 වැනිදා දක්වා පෙ.ව. 10.00 සිට ප.ව. 8.00 දක්වා මහජනතාව සහ ව්‍යාපාරික ප්‍රජාව වෙනුවෙන් විවෘතව පවතී.
