ගෝලීය ආර්ථික අර්බුද සහ තීරුබදු අභියෝග ගැන ප්‍රධාන පෙළේ විද්වත් කතිකාවක්
දෙස් විදෙස් ආයෝජන දිනාගැනීම උදෙසා මෙරට ව්‍යාපාරික ක්ෂේත්‍රයේ විනිවිදභාවය සහ ආයතනික පාලනය ප්‍රමුඛ සාධකයක් බවට පත්ව ඇති පසුබිමක, ශ්‍රී ලංකා අධ්‍යක්ෂ මණ්ඩල ආයතනය (SLID) සිය 25 වැනි සංවත්සරය සහ වාර්ෂික මහා සභා රැස්වීම අද (14) කොළඹ දී පවත්වයි.
පසුගිය දශක දෙකහමාරක කාලය පුරා මෙරට සමාගම්වල අධ්‍යක්ෂ මණ්ඩල සාමාජිකයන්ගේ වෘත්තීය නිපුණතාව වර්ධනය කිරීම සහ ආයතනික ආචාරධර්ම ආරක්ෂා කිරීම වෙනුවෙන් ක්‍රියාකාරී මැදිහත්වීමක් සිදු කළ SLID ආයතනය, ශක්තිමත් ආයතන බිහි කිරීම තුළින් රටේ ආර්ථික සංවර්ධනයට සෘජු දායකත්වයක් ලබා දිය හැකි බව දිගින් දිගටම අවධාරණය කරයි.
රාජ්‍ය තාන්ත්‍රික සහ ආර්ථික ක්ෂේත්‍රයේ ප්‍රධානීන් එකම වේදිකාවකට
කොළඹ සිනමන් ග්‍රෑන්ඩ් හෝටලයේ පැවැත්වෙන මෙම සැමරුම් උළෙල සඳහා අග්‍රාමාත්‍ය ලේකම් ජී. ප්‍රදීප් සපුතන්ත්‍රි ප්‍රධාන ආරාධිතයා ලෙස එක්වන අතර, ශ්‍රී ලංකාවේ ඉන්දුනීසියානු තානාපතිනි ඩෙවි ගුස්තිනා ටොබිං ගෞරවනීය ආරාධිත අමුත්තිය ලෙස සහභාගී වේ. රාජ්‍ය යාන්ත්‍රණය සහ පෞද්ගලික අංශය අතර ප්‍රතිපත්තිමය අවබෝධය ගොඩනැංවීමට මෙවැනි සාකච්ඡා සහ හමුවීම් මනා පිටුබලයක් සපයයි.
ගෝලීය භූ-දේශපාලනික ආතතීන් හමුවේ ලෝක වෙළෙඳපොළේ සිදුවන සීඝ්‍ර විපර්යාසයන් පිළිබඳව මෙහිදී විශේෂ අවධානයක් යොමු කෙරේ. ඒ අනුව, "Tariffs: Defining the New World Order" (තීරුබදු: නව ලෝක ආර්ථික රටාව හැඩගැස්වීම) යන තේමාව යටතේ හිටපු තානාපති මහින්ද සමරසිංහ ප්‍රධාන දේශනය පවත්වමින්, ගෝලීය වෙළෙඳ තහංචි සහ ආරක්ෂණවාදී ප්‍රතිපත්ති දකුණු ආසියානු කලාපයේ ව්‍යාපාරික ව්‍යුහයට බලපාන අයුරු විශ්ලේෂණය කිරීමට නියමිතය.
ඩිජිටල් තාක්ෂණය සමඟ පෙරට යන නව මාවතක්
ව්‍යාපාරික නායකත්වයේ නව අවශ්‍යතාවන්ට ගැළපෙන පරිදි, සිය සාමාජික සේවාවන් විධිමත් කරමින් නවීකරණය කරන ලද වෙබ් අඩවිය සහ නව SLID ජංගම යෙදුම (Mobile App) එළිදැක්වීම ද මෙහිදී සිදුවේ. ලෝක මට්ටමේ පාලන දැනුම, ප්‍රතිපත්තිමය ලේඛන සහ සාමාජික සබඳතා පහසුවෙන් භාවිත කළ හැකි ඩිජිටල් මෙවලම් බවට පත් කිරීම මෙම පියවරේ අරමුණයි.
පසුගිය වසර 25 ක කාලය තුළ මෙරට ආයතනික පාලන ක්ෂේත්‍රය ගොඩනැංවීමට කැප වූ හිටපු ප්‍රධාන විධායක නිලධාරීන් සහ සභාපතිවරුන් ඇගයීමට ලක් කිරීම ද සිදු වන අතර, ඉදිරි අභියෝග හමුවේ ආයතන ස්ථාවරව පවත්වා ගැනීමට අවශ්‍ය වගකීම් සහගත අධ්‍යක්ෂ මණ්ඩල සංස්කෘතියක් පවත්වා ගැනීම පිළිබඳව මෙහිදී විශේෂ සාකච්ඡාවට ලක් කෙරේ.
