ඉන්ස්ටග්‍රෑම් සමාජ මාධ්‍ය ඔස්සේ සටහනක් තබමින් ඔවුන් දෙදෙනා සඳහන් කරන්නේ බොහෝ අර්ථවත් සහ දුෂ්කර සංවාදවලින් පසුව වෙන්වීමට තීරණය කර ඇති නමුත් "එකිනෙකා කෙරෙහි ගැඹුරු සෙනෙහස මෙන්ම ගෞරවය මුසු සමීප පවුලක් ලෙස ඉදිරියටත් කටයුතු කරන'' බව යි.
මේ වනවිට 51 හැවිරිදි අගමැති ජස්ටින් ටෲඩෝ සහ 48 හැවිරිදි සොෆී ග්‍රෙගෝයර් දෙපළ විවාහ දිවියට එළඹ ඇත්තේ 2005 වසරේදීය. ඔවුන් දරුවන් තිදෙනෙකුගේ මව්පියන් වේ.
කැනඩා අගමැති කාර්යාලය නිවේදනය කර ඇත්තේ නීතිමය වශයෙන් දික්කසාදයට අත්සන් තබා ඇති නමුත් ඔවුන් දෙදෙනාම තව දුරටත් මහජන හමු සඳහා පෙනී සිටිනු ඇති බව යි.
ජස්ටින් ටෲඩෝ සහ සොෆී ග්‍රෙගෝයර් සෑම විටම දේශීය මෙන්ම විදේශීය උත්සව සහ සංචාරවලදී සමීපව සිටිනු දක්නට ලැබුන ද මෑත කාලීනව එවැනි අවස්ථා අවම වූ බව විදෙස් මාධ්‍ය වාර්තා කර යි.
කෙසේවෙතත් ඔවුන් දෙදෙනා ඉකුත් මැයි මාසයේ පැවැති බ්‍රිතාන්‍යයේ තුන්වැනි චාල්ස් රජුගේ රාජභිෂේකය සඳහා ලන්ඩන් නුවරට ගොස් සිටි අතර අමෙරිකානු ජනාධිපති ජෝ බයිඩන් ඉකුත් මාර්තු මාසයේ කැනඩාවට පැමිණි අවස්ථාවේදී ද සමීපව සිටින අයුරු දැක ගත හැකි විය.
යුද්ධයෙන් පීඩාවට පත් මෙරට දෙමල ජනයාගේ මානව හිමිකම් වෙනුවෙන් වගවන ලෙසට ශ්‍රී ලංකා රජයට බලපෑම් එල්ල කරන විදෙස් රාජ්‍ය නායකයෙක් ලෙස ජස්ටින් ටෲඩෝ ප්‍රකට අතර මෙරට මානව හිමිකම් උල්ලංඝනය කිරීම්වලට ප්‍රතිචාර වශයෙන්, ජස්ටින් ටෲඩෝ ප්‍රමුඛ කැනඩා රජය ශ්‍රී ලංකා රජයේ නිලධාරීන් හතර දෙනෙකුට එරෙහිව 2023 ජනවාරි මාසයේදී සම්බාධක පැනවීය.
