වසරේ එක දිනකට පමණක් සීමා නොවී ''සෑම දරුවකුම සුවිශේෂයි'' කියා සිතා අපට වසර පුරාවටම කටයුතු කළ හැකි නම් අදට වඩා ලස්සන රටක් හෙට නිර්මාණය වනු ඇත.
දරුවකු මෙලොව බිහි කළ දින සිට දෙමාපියන් සිහින දකින්නේ කවද හෝ තම දරුවා පවුලට කීර්තියක් ගෙනදෙන සමාජයේ බැබළෙන පුද්ගලයකු වනු දැකීමටය. එම සිහිනය සැබෑ වීමටනම් දෙමාපියන් විසින් සිදු කළයුතු වැදගත් කරුණු කිහිපයකි.
සෑම දරුවකුටම කුමන හෝ ආකාරයකට අලුත් යමක් සිතීමට කිරීමට හැකි බව අමතක නොකරන්න. දරුවන්ට ඔබගේ සිතෙහි ඇති අසාවන් නොව ඔවුන්ගේ සිතෙහි ඇති දේ කිරීමට නිදහස සහ අවස්ථාව ලබා දෙන්න. තම දරුවා විශේෂ බව කිසිවිට අමතක නොකරන්න. එක් දරුවකු තවත් දරුවකුට සම කළ නොහැකි බව ඔබටත් තේරෙනවා ඇත.
ඔබගේ දරුවා නිතරම බොහෝ දේ ඉල්ලනවා විය හැක. එය දරුවන්ගේ ස්වභාවයයි. නමුත් ඔබට ඒ හැම දෙයක්ම ලබාදීමට ධනය සහ කාලය මදි විය හැක. අධෙර්යය නොවී හැකි පමණින් ළඟ තිබෙන දෙයින් දරුවාගේ අවශ්‍යතාවය ඉටු කිරීමට උත්සහ කරන්න. වැදගත් වන්නේ දරුවා දිරිමත් කිරීමය - ශක්තිමත් කිරීමය.
ලැබෙන දෙයින් සෑහීමට පත්වී අලුත් විදියට සිතා යමක් කිරීමට දරුවාට පුරුදු කරන්න.
දරුවන්ට කීමට බොහෝ කතා ඇත. එම කතා ඇසීමට ඔවුනට හිතවතකු වුවමනාය. දරුවන් සමඟ හැකි සැමවිටම සමීප වී කටයුතු කිරීමෙන් ඔවුන් තමාගේ හොඳම මිතුරා ලෙස මව හෝ පියා හෝ තෝරා ගන්නවා නොඅනුමානය. දෙමාපියන්ගෙන් දුරස් වන දරුවන් නොයෙකුත් නොගැලපෙන ක්‍රියාවන්ට යොමුවන බව නොරහසකි.
දරුවන්ට පාළුව තනිකම උහුලා ගත නොහැකි බව හොදින් මතක තබා ගන්න. ඔවුන් නිතරම සෙල්ලම් බඩු, සතුන්, ගහ කොළ සමඟ දොඩමළු වන්නේ පාළුව තනිකම නැති කර ගැනීමටය.
දෙමාපියන්, සහෝදරයින්, නෑදෑයින් සමඟ ඉතා කිට්ටුවෙන් සිටින දරුවන්ගේ මුහුණු බොහෝවිට සතුටුන් පිරී තිබෙන සැටි ඔබ දුටුවාද?
වැරැද්දක් කළ විට අවවාද කිරීමත් ජයග්‍රහණයක් ලබා ගත් විට එය අගය කිරීමත් තුළින් දරුවන්ගේ පෞරුෂය වර්ධනය වේ. නමුත් ඇතැම් වැරදි ක්‍රියාවන්ට අවවාද කිරීමේදී පළමු අවස්ථාවේදීම එය පිරිසක් ඉදිරියේ කළ යුතුද යන්න ඔබ දෙසැරයක් සිත බලන්න. ඔබ කුඩා කළ වැඩිහිටියන්ගෙන් ඔබට ලැබුණු අවවාද පැසසුම් තවමත් ඔබේ සිතේ දෝංකාර දෙනවා නේද? තම දරුවාටද එය එසේම බලපාන බව සිහියේ තබා ගන්න.
දරුවන්ට බොරු පොරොන්දු නොදී ඇත්ත ඇති සැටියෙන් වටහා දීම ඉතා වැදගත්ය. බොරු නොනිකයන, වංචා නොකරන යහපත් පුරවැසියකු නිර්මාණය කිරීමට හැක්කේ ඔබටම පමණයි. දරුවාගේ මනසට දරාගත හැකි, අවබෝධ කරගත හැකි, ආකාරයට කරුණු, සිද්ධි පැහැදිලි කර දීමට සැමවිට උත්සහ කරන්න.
දරුවන්ට ඉගෙනගැනීමට, විනෝද වීමට , නිදහසේ තම සිතුම් පැතුම් අදහස් ඉදිරිපත් කිරීමට අවස්ථාව දිය යුතුය. සාමුහික කටයුතු වලදී ඔවුන්ගේ අදහස් ද විමසා බැලීමට මතක තබා ගන්න.
වසරේ එක් දිනයක් පමණක් ළමා දිනය සැමරීමට වෙන්වුවත් උදාවන සෑම දිනයක්ම තම ළමයාගේ දිනය බවට සිතා කටයුතු කළ හැකි නම් ඔබට අනාගතයේ බොහෝ සතුටු විය හැකිය.
ළමයාගේ පළමු ගුරුවරුන් වන්නේ මව සහ පියායි. එසේනම් සමාජයට වැඩදායි සාර්ථක පුරවැසියකු නිර්මාණය කිරීමට ඔබට පැවරී තිබෙන වගකීම නිවැරදිව තේරුම් ගෙන කටයුතු කළ යුතුය. රටක අනාගතය යනු එරටෙහි දරුපරපුරයි.
සුන්දර රටක නිර්මාණකරු ඔබයි.
(ආචාර්ය නදී දිසානායක)
info@nadeed.org
Founder/Secretary - CUP
Senior Commissioner
Inland Revenue, Sri Lanka
සබැඳි පුවත් :
ළමා ගීතයෙහි නූතන ගමන් මග - (ආචාර්ය නදී දිසානායක)
පොතපත මිනිසා සම්පූර්ණ කරයි - (ආචාර්ය නදී දිසානායක)
නත්තලට පොඩ්ඩන්ට තෑග්ගක් !
දුවා දරුවන් 'වළාකුළු' අතරට ගෙන යන නදී...! - Kids Song (වීඩියෝ )
ආචාර්ය නදී දිසානායක සමඟ පිළිසඳරක්
