දළදා වීදීය යටිනුවර වීදීය, කොළඹ වීදීය, කොටුගොඩැල්ල වීදීය, මහනුවර මාර්කට් එක ඉදිරිපිට පදික වෙළඳාම තහනම් කර ඇතිබවත් එම ස්ථාන වල වෙළඳාම් කල පිරිස් සඳහා රෝහලට යන මාර්ගයේ ස්ථාන කීපයක් සහ මහනුවර දුම්රිය ස්ථානයට යාබද විදුලිබල මණ්ඩල කාර්යාලය ආසන්නයේ පිහිටි නගර සභාව සතු වානිජ ගොඩනැගිල්ලේ වෙළඳාම් කිරීමට ඉඩ ලබා දෙන බවද මහනුවර පුරපති වරයා පැවසීය.
මහනුවර මහ නගර සභාවේ සියලුම මන්ත්‍රී වරුන්ගේ එකඟතාවයෙන් මෙම තීරණය ගෙන තිබෙන අතර පදික වේදිකාවේ වෙළඳාම් කිරීමට මින් ඉදිරියට කිසිවෙකුට ඉඩ ලබා නොදෙන බවද මහනුවර පුරපති වරයා කීය.
පදික වේදිකාවල ගමන් කරන මහජනතාව නිතර නිතර පදික වේදිකා අවහිර කොට කෙරෙන අනවසර වෙළඳාම් නිසා තමන්ට දැඩි අපහසුතාවයන්ට මුහුණ දීමට සිදව ඇතැයි නගර සභාවට කරන ලද පැමිණිළි සහ නගර සභාවේ සියලුම සභිකයන් එක්ව කරන ලද ඉල්ලීම මත මෙම තීරණය ගත් බවද පුරපති වරයා පැවසීය.
වසර ගනනාවක් තිස්සේ මහනුවර නගරයේ පදික වේදිකාවල වෙළඳාම් කල වෙළඳුන්ට අසාධාරණයක් නොවන පරිදි ,ඔවුනට විකල්ප ස්ථාන ලබාදී ඔවුන්ව පදික වේදිකාවලින් ඉවත් කිරීම කරන බවද ,මහනුවර පුරපති චන්ද්‍රසිරි විජේනායක විශේෂයෙන් සඳහන් කළේය.
(සටහන | ජේ ඒ එල් ජයසිංහ)
