පාර්ලිමේන්තු මහ ලේකම් නීතිඥ කුෂානි රෝහණධීර වෙත විපක්ෂයේ මන්ත්‍රී කණ්ඩායම විසින් මෙම යෝජනාව අද පෙරවරුවේ බාරදෙනු ලැබුවේ පාර්ලිමේන්තු පරිශ්‍රයේ පිහිටි ඇයගේ කාර්යාලයේදීය.
ශ්‍රී ලංකා පාර්ලිමේන්තු ඉතිහාසයේ කථානායක ධුරය දරන අයෙකුට එරෙහිව එකවර මෙතරම් චෝදනා සංඛ්‍යාවක් ගොනු කෙරුණු පළමු අවස්ථාව මෙය ලෙස දේශපාලන නිරීක්ෂකයෝ පෙන්වා දෙති.
උල්ලංඝනය කළ බව කියන නීතිමය පදනම
විපක්ෂය සිය විශ්වාසභංග යෝජනාව කෙටුම්පත් කර ඇත්තේ මෙරට බලාත්මක ප්‍රධාන නීති කිහිපයක් පදනම් කරගනිමිනි:
* දූෂණ විරෝධී පනත සහ පොදු දේපළ පනත
* තොරතුරු දැනගැනීමේ අයිතිය පිළිබඳ පනත (RTI)
* පාර්ලිමේන්තු බලතල හා වරප්‍රසාද පනත
* මන්ත්‍රී ආචාරධර්ම සංග්‍රහය හා පාර්ලිමේන්තු ස්ථාවර නියෝග
ඉදිරිපත් කර ඇති ප්‍රධාන චෝදනා
පිටු ගණනාවකින් යුත් චෝදනා පත්‍රයේ පරිපාලනමය මෙන්ම මූල්‍යමය විෂමාචාර රැසක් ලේඛනගත කර තිබේ. ඉන් වඩාත් අවධානයට ලක්ව ඇති කරුණු කිහිපයකි:
* ද්විත්ව නිල නිවාස භාවිතය: කථානායක නිල නිවස පරිහරණය කරන අතරතුර, අමාත්‍යවරුන්ට හා උසස් නිලධාරීන්ට වෙන් කෙරෙන කොළඹ 04, ලොරිස් පටුමගේ පිහිටි නිල නිවසක්ද ලබාගැනීම.
* කාර්ය මණ්ඩල වියදම්: නිල නිවසේ නඩත්තුවට අට දෙනෙකු යොදවා, ඔවුන්ගේ මාසික වැටුප් හා දීමනා ලෙස රුපියල් 760,000ක මුදලක් සහ ජල, විදුලි බිල්පත් පාර්ලිමේන්තු අරමුදලින් පියවීම.
* පෞද්ගලික ලේකම්වරයාගේ නිවාස ගනුදෙනුව: ලොරිස් පටුමගේ නිවාස සංකීර්ණයේ අංක 4-3 දරන නිවස පෞද්ගලික ලේකම් චමීර ගාල්ලගේ මහතාට ලබාදීමට මැදිහත්වීම හරහා රජයට පාඩු සිදුකිරීම.
* අමතර වාහන හා උපකරණ පරිහරණය: හිමි නිල වාහන දෙකට අමතරව WP NC-4923 දරන පාර්ලිමේන්තු වෑන් රථය හා ඉන්ධන ලබාගැනීම මෙන්ම, සන්නිවේදන අංශයේ උපකරණ අනීතිකව වෙනම මාධ්‍ය ඒකකයකට යොමුකිරීම.
* භෝජනාගාර ගෙවීම් සහ පරිපාලන බලපෑම්: පෞද්ගලික භෝජනාගාරයේ අමුත්තන්ගේ ආහාර බිල්පත් නිසි පරිදි නොගෙවීම සහ ඉල්ලීම් ඉටුනොකරන කාර්ය මණ්ඩල සාමාජිකයන්ට දෝෂාරෝපණය කරමින් ස්ථාන මාරු කිරීම.
ඉදිරි පාර්ලිමේන්තු ක්‍රියාමාර්ග
මෙම යෝජනාව සම්බන්ධයෙන් විවාදයක් පැවැත්වීමට ලබන පාර්ලිමේන්තු සතියේදී දින දෙකක කාලයක් ලබාදෙන ලෙස විපක්ෂය ඉල්ලා සිටීමට නියමිතය. විපක්ෂයේ සියලු දේශපාලන පක්ෂ මේ සඳහා සහාය පළකිරීමට දැනටමත් එකඟතාවකට පැමිණ ඇති බව වාර්තා වේ.
විශ්වාසභංග යෝජනාවක් පාර්ලිමේන්තු න්‍යාය පත්‍රයට ඇතුළත් කිරීම, ස්ථාවර නියෝග අනුව දින නියම කිරීම සහ එහි නීතිමය වලංගුභාවය පිළිබඳ තීන්දුව ඉදිරි පක්ෂ නායක රැස්වීමේදී තීරණය වීමට නියමිතය.
කථානායකවරයාට එරෙහි විශ්වාසභංග යෝජනාව පහතින් කියවන්න.