ජනාධිපතිවරයා විසින් නිර්දේශ කරනු ලැබූ සමුදිකා ජයරත්න ගේ නම ආණ්ඩුක්‍රම ව්‍යවස්ථා සභාව ඒකමතිකව අනුමත කර ඇතැයි ආරංචි මාර්ග සඳහන් කළේය.
ආණ්ඩුක්‍රම ව්‍යවස්ථා සභාව කථානායක වෛද්‍ය ජගත් වික්‍රමරත්න ගේ ප්‍රධානත්වයෙන් පාර්ලිමේන්තු සංකීර්ණයේදී අද (3) රැස්විය.
විගණකාධිපති තනතුර සඳහා ජනාධිපතිවරයා විසින් මීට පෙර නිර්දේශ කරනු ලැබූ නම් හතරක් විවිධ හේතු මත ආණ්ඩුක්‍රම ව්‍යවස්ථා සභාවේ බහුතරය විසින් ප්‍රතික්ෂේප කරනු ලැබීය.
මාස 10ක් තිස්සේ නොපිරවූ පුරප්පාඩුව
ශ්‍රී ලංකාවේ 41 වන විගණකාධිපතිවරයා වූ චූලන්ත වික්‍රමරත්න, වසර 6ක සේවා කාලයකින් පසු 2025 අප්‍රේල් මාසයේදී විශ්‍රාම යෑමෙන් පසු විගණකාධිපති ධුරය පුරප්පාඩු විය.
අනතුරුව එම තනතුරේ වැඩ බැලීමට ජ්‍යෙෂ්ඨ නියෝජ්‍ය විගණකාධිපති ධර්මපාල ගම්මන්පිල පත් කෙරුණු අතර ඔහුගේ වැඩ බැලීමේ කාලය ද පසුගිය දෙසැම්බර් මස අවසන් විය.
විගණකාධිපති දෙපාර්තමේන්තුවේ සිටින ජ්‍යෙෂ්ඨතම නිලධාරියා වන ධර්මපාල ගම්මන්පිල එම තනතුරට පත් කරන ලෙස ත්‍රෛනිකායික මහනාහිමිවරුන් සහ සිවිල් සංවිධාන වෘත්තීයවේදින් ඇතුළු පිරිස් පසුගිය කාලයේදී රජයෙන් දිගින් දිගටම ඉල්ලීම් කළහ.
