පද්ධති පාලන ඒකක වාර්තා අනුව විදුලි බල මණ්ඩල හා මහජන උපයෝගීතා කොමිසමේ වාර්තා අනුව 9 සහ 10 නැව් දෙකේම ගල් අගුරු බාල බවත් මෙගාවොට් 300ක් නිපදවිය යුතු තැන මෙගාවොට් 263ක් පළමු යුනිට් එකෙන් නිපදවන විට තුන් වැනි යුනිට් එක ද මෙගවොට් 275ක් පමණක් නිපදවන බවත් විපක්ෂ නායකවරයා පැවසීය.
මේ තුළින් මේ ගල් අගුරු බාල බවට පැහැදිලි බවත් දෙවැනි ඒකකයේ ඇත්තේ රුසියනු ගල් අගුරු නිසා හරියට මෙගවොට් 300 නිපදවන බවත් ඒ අනුව සමගි ජන බලවේගය දිගින් දිගටම පෙන්වා දී ඇති කරුණු ඇත්ත බවට පෙනී යන බවත් මෙයට හේතුව රජය බාල ගල් අගුරු ගෙන්වීම බවත් මෙවැනි තත්ත්වයක් තිබියදී රජය කරන්නේ හදිසි මිලදී ගැනීම් කිරීම බවත් මේ හදිසි මිලදී ගැනීමට හේතුව ප්‍රමිතියෙන් තොර ගල් අගුරු ගෙන ඒම බවත් විපක්ෂ නායකවරයා වැඩිදුරටත් පැවසීය.
නොරොච්චෝල බලගාරයේ වාර්තා ගැන රජය අවධානය යොමු නොකරන බවත් මේ ගල් අගුරු වංචාවට රජය සෘජුවම වගකිව යුතු බවත් අදටත් රටට ගෙන එන්නේ බාල ගල් අගුරු බවත් මේවාට හේතු ඉදිරිපත් කළ යුතු බවත් මෙහි වාසිය යන්නේ ඉන්දන මාෆියාවට බවත් විපක්ෂ නායක සජිත් ප්‍රේමදාස පැවසීය.
අප රටේ බලශක්ති සුරක්ෂිතභාවය සහ පාරිභෝගික අයිතිය සුරක්ෂා කිරීම වගකිවයුතු විපක්ෂයක් ලෙස සමගි ජන බලවේගය සහ සමගි ජන සන්ධානය ඉටු කරන බව ද විපක්ෂ නායකවරයා අවධාරණය කළේය.
ගල්අඟුරු සිද්ධිය බරපතළයි වංචාව බිලියන 7කට වැඩියි
මේ අතර සමගි ජන බලවේගයේ පාර්ලිමේන්තු මන්ත්‍රී වෛද්‍ය කවින්ද ජයවර්ධන පවසන්නේ, බාල ගල්අඟුරු නිසා නොරොච්චෝලේ බලාගාරය අක්‍රිය වීමේ අවදානමක් ඇති බවයි.
දූෂණය පිටුදැකීමට බලය ලබාගත් ජාතික ජන බලවේග ආණ්ඩුව විශාල දූෂණ සිදු කිරීම කනගාටුවට කරුණක් බව ද ඔහු කියා සිටියි.
නොරොච්චෝලේ බලාගාරයේ මෙගාවොට් 900ක් නිෂ්පාදනය කිරීමට තිබූ බලය, අද වන විට මෙගාවොට් 600ක් දක්වා අඩු වී ඇති බවත්, මීට හේතුව බාල ගල් අඟුරු බවත් අවධාරණය කළ මන්ත්‍රීවරයා, බලශක්ති නිෂ්පාදනයෙන් මෙගාවොට් 300ක් මේ නිසා අහිමි වන බව ද කියා සිටියි.
මෙසේ අහිමි වන බලශක්ති ප්‍රමාණය ඩීසල් බලාගාරවලින් සම්පූර්ණ කරගැනීමට සිදු වන බවත්, ඒ සඳහා විශාල පිරිවැයක් දැරීමට සිදු වන බවත් ඔහු වැඩිදුරටත් පැවසීය.
බාල ගල් අඟුරුවලින් පමණක් රුපියල් බිලියන 7ක වංචාවක් සිදු වී තිබෙන බවද පැවසූ ඔහු, මේ සියල්ල ජනතාව පිට පැටවෙන බවද කියා සිටියේය.
