ශ්‍රී ලංකාව මියන්මාරයෙන් ඇනවුම්කර ඇති සහල් තොග වෙනුවෙන්,
මියන්මාරය වෙනත් රටවලට සහල් අලෙවි කරන මිලට වඩා රුපියල් කෝටි 305කට අධික මුදලක් ගෙවීමට සිදුව ඇතැයි 'අරුණ' පුවත්පත අනාවරණය කරයි.
මේවනවිට දෙරට රජයන් අතර අත්සන් තබා ඇති අවබෝධතා ගිවිසුමට අනුව ශ්‍රී ලංකාව මියන්මාරයෙන් සහල් මෙට්‍රික් ටොන් 01ක් මිලදී ගැනීමට ගැනීමට නියමිත වන්නේ, ඩොලර් 440ත් 450 ත් අතර මිලකටය.
එහෙත් මියන්මාරයේ දිනපතා ප්‍රමුඛ පුවත්පතක් වන Global New Light Of Myanmar අනාවරණය කර ඇති පරිදි මියෙන්මාරය මැත කාලයේ වෙනත් රටවලට සහල් අලෙවිකර ඇත්තේ, මෙට්‍රික් ටොන් එකක් ඩොලර් 340ත් 350 ත් අතර මිලකටය.
ඒ අනුව ශ්‍රී ලංකාව මියන්මාරයෙන් මිලදී ගන්නා සහල් මෙට්‍රික් ටොන් එකක් වෙනුවෙන් වැඩිපුර ගෙවනු ලබන මුදල ඩොලර් 100 කි.(රුපියල් 20,300කට වැඩි මුදලක් )
පුවත්පත් වාර්තාවට අනුව දෙරට අතර අත්සන් තබා ඇති ගිවිසුමට අනුව ශ්‍රී ලංකාව ආනයනය කිරීමට නියමිතව ඇති සහල් ප්‍රමාණය මෙට්‍රික් ටොන් එක්ලක්ෂ පනස්දහසකි (1,50,000කි)
මියන්මාර සහල් වෙළෙඳ සංගමයේ ලේකම් පසුගිය දිනෙක එරටේ මාධ්‍ය වලට ප්‍රකාශ කොට තිබුනේ වෙනත් රටවල් ටොන් එක ඩොලර් 350 ට ගනිද්දී ලංකාවේ රජය ටොන් එකක් ඩොලර් 450 කට මිලදී ගන්නා බවත්, ඔවුන් හාල් වල ගුණාත්මක භාවය ගැන සොයා නොබලන බවත්, ලංකාව සමග සහල් ගනුදෙනුව ඉතා වාසි සහගත බවත් මෙම පුවත්පත් වාර්තාවේ සඳහන් වේ.
ඒ අනුව රජයට සම්බන්ධ ප්‍රබලයෙක් ටොන් එකට ඩොලර් 100 බැගින් කොමිස් ගැනීමක් සිදුකරන බවත්, මෙම ගනුදෙනුවෙන් පමණක් වර්ෂ දෙකට ඩොලර් මිලියන 30 ක කොමිස් ගැහිල්ලක් සිදුවන බවත් ශ්‍රී ලංකා සංවර්ධන පරිපාලන ආයතනය (SLIDA ) හිටපු ජ්‍යෙෂ්ඨ උපදේශක අයි.එස්. ජයරත්න පවසයි.
මේ අතර අද (28) පැවති මාධ්‍ය හමුවක දී අදහස් දැක්වූ හිටපු අමාත්‍ය පාඨලී චම්පික රණවක ද පැවසුයේ, ඩොලර් මිලියන 15ක් රටට අහිමි වන මියන්මාර් සහල් ගණුදෙනුව සැක සහිතය බවයි.
මුලාශ්‍ර පුවත :
Myanmar’s rice export to Sri Lanka fetches high prices
